《小傳日記》一如預期，花旗國根本就未有能力提早加息，噚晚（１７日）聯儲局就宣布，
繼續零利率，仲話有大把工無人做，根本就唔急於加息，但就再一次減少買債１００億美金，而
整個買債計劃就會喺下個月正式結束；換句話說，即係唔再向孖屐「揼水」啦！
雖然一切在預估之內，但今日（１８日）魚缸又再次向下插，仲一度嘔凸噚日升幅，低見
２４１０３，係２０１４年７月２５號以來新低。最終魚缸埋單唔見２０７點收２４１６８，國
貨佬就碌低９３點收１０７９９，全日成交有７０２億銀。
花旗國「息魔」提早殺埋身嘅憂慮暫且告一段落；不過另一邊廂，將會影響米字國命運嘅蘇
格蘭獨立公投，就將會最快喺香江時間聽日下午約２點鐘有結果！雖然孖屐都估計，蘇獨最終唔
能夠成功，而英鎊就可以企番穩，香江亦唔會受波及。
＊蘇格蘭公投走難留亦難，大象與渣打企定畀個讚＊
今次米字國面臨歷史性一刻，首相卡梅倫就梗係驚到「有得震，無得瞓」啦。不過，總部喺
當地嘅大象（００００５）同渣打（０２８８８）今日股價就相當硬淨，只係跌咗ＤＤ，明顯跑
贏大隻佬指數，分別收８２﹒８銀同１５５銀。唔通意味今次蘇格蘭獨立失敗機會好大？！
另一重磅股祖國移動（００９４１）今日就無晒心機，皆因據祖國官媒報道，「唉瘋６」仲
未獲得工信部入網認可證，即係祖國仲未有得賣呀！搞到祖國移動都好頭痕，無機賣畀客仔，今
日股價繼續向下跌逾１巴仙收９４﹒７銀。
股王ＱＱ（００７００）都一樣頭耷耷，風頭畀阿里巴巴搶晒，全城焦點都放晒喺阿里身上
，個個都等緊喺花旗國時間１９號見證科網巨無霸登場嘅時刻，ＱＱ要碌低近１巴仙收
１２２﹒９銀。
話時話，《經濟通》派咗記者去美國直擊阿里巴巴上市，記得昅實呀！
＊巴巴明上市經濟通直擊，未賣唉瘋６中移似無力＊
魚缸打回原形，但喺近期畀人質到體無完膚嘅濠賭股今日就大打「爭氣波」，尤其係兩隻藍
籌大隻佬，１４日ＲＳＩ連２０都唔夠，已經處於嚴重超賣，缸友終於等到佢地技術反彈。金沙
（０１９２８）今日最高見過４３﹒９銀，全日收報４３﹒１銀升１﹒４個巴仙，為全日表現最
好藍籌。銀娛（０００２７）走勢都唔錯，盤中曾經試過升３個巴仙有多，不過食完飯番嚟腳仔
軟，只升得約１巴仙收４９﹒８５銀
全日升得最勁嘅喺永利澳門（０１１２８），完場彈高近３巴仙收報２４﹒９５銀；可惜澳
博（００８８０）全日浮浮沉沉，收市都唔係好彈得起。美高梅（０２２８２）同新濠國際
（００２００）表現就中規中矩，兩個分別袋咗０﹒７巴仙及近２巴仙。
＊濠賭終反彈永利最靚仔，內銀一日嬌今天有點翳＊
一班濠賭股係真反彈定假反彈，小傳就拭目以待。不過祖國錢莊就真係反彈一日就玩完，噚
日孖屐先傳出阿爺突然放水５０００億人仔畀五大行，缸友就即刻衝入去掃貨；點知今日又有消
息話，人行其實到依家都仲只係審批緊，簡直係消息滿天飛。
睇番傳聞入面五大行表現，噚日升得最多嘅交行（０３３２８）只係跌番ＤＤ，唔見０﹒２
巴仙收５﹒７３銀，其他建工中農就嘔番差唔多一半升幅，跌０﹒５巴仙至１﹒４巴仙。
反而信行（００９９８）（滬：６０１９９８）今日就好古怪，明明開市後一直都升唔起，
但喺１０點５０分左右，突然之間抽高咗上去，Ａ股仲曾喺上半場一度漲停板，雖然收市時縮番
ＤＤ，但Ａ股都有４﹒６巴仙進帳收４﹒５８銀人仔，Ｈ股又逆市升１巴仙收４﹒８８銀。逆市
上升必有因？！
＊德國佬發功光伏光燦燦，炒股不炒市禾雀續亂飛＊
今日光伏股都被缸友睇中，原來德銀喺背後發功，話祖國最近兩星期光伏需求升番另一方面
。又有資料顯示，多晶硅價格已經逐步走出低谷，一眾光伏股成功喺跌市日發光發亮，龍頭協鑫
（０３８００）以３﹒９億銀彈高逾４巴仙，收３﹒０１銀，信義光能（００９６８）都唔執輸
，升逾３巴仙收２﹒６９銀。其他街坊都有２至３巴仙進帳，成績相當唔錯。
成班細股繼續喺「炒股樂園」玩到癲晒，頭十名升得最勁嘅股仔，有九隻成交都超過成千萬
，最多嗰隻僑雄能源（００３８１）仲有成九千幾萬添，全部升幅就介乎１７至３２巴仙，鑊氣
夠晒熱辣辣！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
