《小傳日記》美聯儲局終於宣布咗議息結果，一如預期暫停買債計劃，唔再向孖屐「放水」
。雖然係意料中事，不過道指噚晚（２９日）都一度跌逾百點，好彩收市前就升番唔少，埋單只
係跌咗３１點收１６９７４，無驚無險又一天。
至於Ａ仔場就表現唔錯，早排上番二千三關之後，氣勢如虹，今日又再抽高０﹒８巴仙收報
２３９１點，差些少連二千四都收復埋，勁！只不過，香江魚缸已經連升兩日，殺咗唔少熊仔，
今日（３０日）點都要唞一唞，回一回氣喇。開場嗰陣微升廿幾點後就無晒力，尾市仲愈跌愈多
，最多唔見２０４點。好彩收市前都有番啲力水，就終喺期指結算日只係唔見咗１１７點收
２３７０２，國貨佬就碌低９５點收１０６２８。
全日成交當然無噚日咁多啦，但都有約６７６億銀。
＊中海油績差缸友搖搖頭，連累埋街坊中石油呻慘＊
議息結果塵埃落定，就梗係要返番嚟睇公司業績啦。中海油（００８８３）啱啱公布嗰季度
營運數字，總淨產量１０３百萬桶油當量，不過油氣銷售收入就得５３５﹒７億人仔，跌咗成
４﹒６個巴仙。唉！唔使問油價跌成咁，唔拖低嗰收入就至奇喇。咁都未算最慘，有幾間大行輪
住出嚟落井下石，富瑞將中海油目標價大削成２４嗰巴仙，得１７﹒５銀。
結果，中海油今日就唔見咗４﹒５個巴仙，喺跌得最甘嘅大隻佬，收報１２銀，仲試過連
１２蚊大關都守唔住添。本來以為股價沿住條１０天徘徊，點知今日裂口插咗落去，睇怕都有排
「濕滯」。再睇埋街坊中石油（００８５７）都唔好得去邊，跌咗２個巴仙收９﹒６５銀，喺表
現第二差藍籌。
＊同系姊妹花國貨佬最差，迪仔兩母子重創黑暗時＊
中海油跌得咁甘，佢同系姊妹中海油服（０２８８３）都跌到阿媽都唔認得，做咗最差國貨
佬。至於第二差國貨，呢個「殊榮」就由深得阿爺寵幸嘅比亞迪（０１２１１）奪得。噚日先話
「迪仔」好消息一籮籮，點知一派完成績表，一切都要回歸現實…第三季盈利竟然倒退２６巴仙
之外，仲講定畀大家知，全年盈利將會跌最多２２巴仙，簡直令粉絲跌晒眼鏡！再加埋巴克萊狠
狠地淋盤冷水落嚟，指「迪仔」盈利表現實在太弱，叫缸友唔使留戀，繼續掟貨。結果，「迪仔
」就大插逾８巴仙收４９﹒４銀，傷。
阿媽受重創，囝囝比亞迪電子（００２８５）都一樣咁傷，無辜被牽連，今日約２﹒４億銀
大成交碌低逾６巴仙收９﹒３９銀，真係「母子情深」…
＊新政或出爐電力股風騷，華電最巴閉街坊中最威＊
魚缸今日腳仔軟無晒力，不過祖國電力股仲好有ｐｏｗｅｒ！有報道話，電改新方案可能年
內會出爐，包括對加強監管電網公司、剝離電網公司非主營業務等等，而生產效率高嘅企業仲可
以有更多嘅上網電量。呢嗰咁筍嘅消息對啲規模大，又上咗市嘅電企好有著數。
華能（００９０２）今日就升咗近３巴仙，收報９﹒３５銀，差少少就可以做全日表現最好
嘅國貨佬。最巴閉嘅就要數到華電國際（０１０７１）（滬：６０００２７），今日升咗成
５﹒２個巴仙收５﹒８９銀，其Ａ股仲要升到停埋板。街坊大唐發電（００９９１）等緊收市後
派成績，都有近４個巴仙升幅，齊齊開心。
＊內銀齊放榜難見好風光，志道想轉型粉絲掃不停＊
至於噚日排住隊放榜嘅祖國錢莊，工行（０１３９８）、信行（００９９８）等，無論成績
好定係壞，今日都係無厘神氣升唔起。反而啲細價股就繼續炒到上太空，做紡織嘅迅捷
（００５４０）突然爆升近５５巴仙收０﹒６５銀，係升得最癲股份，但成交就只得千六萬銀左
右。
志道國際（０１２２０）就真係不得了，以約１億銀大成交，抽高近２８巴仙收０﹒７４銀
。原來公司想轉型，本來做鋁製品生意，但依家係度傾緊買祖國資訊科技業務，雖然唔知買唔買
得成，但至少識得靈活變通，讚！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
