《小傳日記》上星期當全城缸友都話「滬港通」雷聲大、雨點小，對成交又毫無幫助之際，
阿爺竟然喺上星期五（２１日）收市之後送上「意外驚喜」，突然宣布下調存貸利率，係
２０１２年７月以來首次減息。忽然間收到闊別超過兩年嘅「喜訊」，有貨缸友就梗係想快啲到
星期一（２４日），迎接大升市啦！
對於阿爺突然減息，原因眾說紛紜，主流講法都係話祖國經濟唔多掂，驚經濟增長惡化，要
出招谷經濟；另一個傳聞就係，想藉住減息令中港兩地股市衝高，或者可以提振「滬港通」。無
論邊個講法先係啱，總之今日（２４日）中港魚缸都一樣咁開心，Ａ仔場踢高近２％巴仙，帶動
香江彈高４５６點或２巴仙，收２３８９３同二萬四關仲係緣慳一面，國貨場就更巴閉，漲
３９５點或３﹒８巴仙，收１０８４２，勁！
＊是日大升市港股通仍靜，券商齊起舞港所冷清清＊
個市旺咗咁多，缸友見到減息受惠股就衝入去，刺激全日成交急升４８巴仙，超過１０５２
億銀，係自４月１０號李克強總理宣布「滬港通」將面世以來新高，萬眾期待嘅破千億成交終於
再出現啦！只可惜，港股通繼續拍烏蠅，只係用咗１﹒４１億人仔，噢！反而「滬股通」就明顯
旺埸番，用咗５４巴仙額度，難怪生發發（００３８８）衝一衝高去１７１﹒３銀後就無咩力，
收升只約１巴仙收１６９﹒１銀，跑輸大市。
但係一班券商就跳晒開心舞，皆因減息之後，孖屐短期唔怕出現「旱災」，券商生意都會多
Ｄ，結果海通證券（０６８３７）就強勢跑出，逾１２億銀大成交炒高１１巴仙，下半場仲創埋
上市新高見１６﹒１６銀，勁！中信証券（０６０３０）都飆升至２１﹒９５銀破頂，收
２１﹒８銀踢高逾８巴仙，大大隻嘅中國銀河（０６８８１）都唔執輸，收高近８巴仙報
７﹒２３銀，強勢收復失地！
＊忽然玩減息內房笑爆嘴，你漲我更漲細摩潑冷水＊
講到強勢，最受惠減息嘅祖國內房股，缸友簡直瞌埋對眼揀一隻都無得輸！唔單止負債較高
嘅、平時比較難借到錢嘅二、三線房企受追捧，好似融創（０１９１８）、富力（０２７７７）
、合景（０１８１３）、碧桂園（０２００７）、綠地香港（００３３７）閒閒地都有１０至
１７巴仙升幅落袋，就連龍頭祖國海外（００６８８）、巨舞霸萬科企業（０２２０２）、潤地
（０１１０９）都飛升１０至１３巴仙，齊齊開Ｐａｒｔｙ！
不過，摩通就出報告提一提缸友，話減息雖然可以減低財務同營運上嘅風險，不過相信唔會
即刻可以吸引到買家入市，估計阿爺可能未來幾季會至少減息一次，最快出年３月之後交投先會
明顯回升番。聽日（２５日）仲想高追嘅缸友真係要諗諗。
＊Ａ仔場旺極Ａ５０飲勝，壽仔與街坊熱到叫冷靜＊
難得等到減息，Ａ仔場就梗係夠晒熱鬧啦，踢高近２巴仙收２５３２點，創逾三年新高。
Ａ５０中國（０２８２３）同南方Ａ５０（０２８２２）、華夏滬深（０３１８８）又再一次受
到缸友追捧，齊齊踢高近３巴仙，當中Ａ５０同南方Ａ５０成交仲分別高達３６億銀及３１億銀
，係全日最多人玩第一名及第三名。
Ａ仔場升得咁勁，一向都有投資Ａ仔場嘅「燕疏」一族就梗係笑到合唔埋口啦，龍頭國壽
（０２６２８）由頭升到落尾，近２９億銀飆升逾８巴仙，收２４﹒９５銀，升近一年新高；街
坊表現都好麗亮，新華保險（０１３３６）、中國太保（０２６０１）都踢高逾８巴仙，跑贏其
他成員！
＊大摩來踐踏內銀懶得理，阿爺送祝福鐵路添動力＊
個市旺起上嚟，真係受害股都可以跟市升！阿爺無端端減息，祖國錢莊收少咗息，盈利恐怕
受到影響。大摩就出報告，話出年錢莊盈利可能減少４至１０巴仙添。不過，缸友一於少理，照
樣入貨，工行（０１３９８）、中行（０３９８８）、建行（００９３９）、農行
（０１２８８）都逾２巴仙進帳。資產質數一向受關注嘅民行（０１９８８）就升得仲勁，踢高
４巴仙收７﹒９７銀。
最後不得不提，基建股都係今次受惠股之一，今期極受阿爺寵幸嘅鐵路股，又再炒穩經濟憧
憬，再加埋中印籌建２０００億元高鐵線，中交建（０１８００）即爆升近１３巴仙收７﹒７６
銀，中鐵（００３９０）、中鐵建（０１１８６）都有５巴仙落袋。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
