《小傳日記》噚日（２６日）上海推出「國十條」夾高最多三百幾點，恆指上番二萬四。雖
然今日（２７日）Ａ仔場都仲有Ｄ力，收高二千六之上，寫上六連升佳績！不過香江呢邊就已經
回番落去，喺關口前窄幅上落，好明顯未有方向。完場大隻佬跌咗１０７點收２４００４，險守
２４０００關，但係百天線（約２４０１７點）又再被攻陷。國貨佬就贏一個馬鼻，只係唔見
３７點收１１０１３。全日成交約７２９億銀左右。
其實話晒魚缸過去約兩個星期，經歷完「滬港通」通車兼阿爺兩年首減息兩件大事，大上大
落過後，就梗係要少少時間整固一下。暫時孖屐普遍都睇好後市，耐心等緊下一個好消息出台。
如果下個月９號真係開中央經濟工作會議，話唔定到時再有喜訊傳出呢？！
＊壽仔與人保繼續做寶寶，一眾街坊們今天不太好＊
中保監副主席周延禮今日有嘢講，指祖國嘅「燕疏」業將迎來前所未有嘅制度紅利同政策紅
利，仲提出商業「燕疏」要逐步成為個人及家庭商業保障計劃嘅主要承擔者添。最重要係，佢話
保險業已度過低迷期，行業發展重回上升通道！又話今年首３季，祖國實現保費收入按年增近
１９巴仙，而償付能力更基本全部達標，都咪話唔令人驚喜！
喺班燕疏佬中，以壽仔（０２６２８）最叻叻，喺噚日破勢之後再逆巿走高，今曾高見
２７﹒９銀，創三年半高位。雖然埋單時只升近１巴仙收２７銀，但仍喺保歷加通道頂線外高飛
。唯一要彈嘅，就係壽仔公仔圖中出現一粒十字星，若聽日出現大陰燭落嘅話，喺「黃昏之星」
光芒下，短線都幾難有好日子過，揸住貨嘅巴打要格外留神啦。
其他街坊表現平平，只得人保（０１３３９）又係升近１巴仙，而平保（０２３１８）、財
險（０２３２８）、太保（０２６０１）、新保（０１３３６）呢排都升唔少，朝早衝高之後都
急急回塘，只係力保微升收市。
＊競爭勢加劇電信齊腳軟，細摩來祝福中移仍然酸＊
祖國電訊股今日就唔多掂，祖國工信部徵求關於開放寬帶接入市場嘅意見，希望引入民企向
人民提供上網服務，首批試點有１６個，包括上海、南京、廣州及深圳等重要城市，為期３年。
缸友驚引入競爭會影響到電訊企業盈利，於是齊齊沽定先，中電信（００７２８）就急跌近近４
巴仙，係最差表現國貨佬，收４﹒６８銀，成交高達逾４億銀添。
雖然摩通睇好祖國移動（００９４１），話出年頭半年前都仲有先行優勢，而今年同出年吸
客量可能比預期仲多。但孖屐競爭日增，嚟緊中電信同聯通（００７６２）推４Ｇ出市場，遲啲
缸友可能有得食住花生睇減價戰，ＡＲＰＵ唔知會跌幾多。而祖國移動早排由６字頭衝到變紅底
股，而家先回番少少去番９５銀，今日雖又跌１巴仙收９４﹒９５銀，但計落值博率唔太高，不
宜沾手。
＊彩票一浸涼你傷我亦傷，瑞信又出招濠賭暗惆悵＊
有報道話阿爺就嚟要查彩票盤數，而且規模相當大，以前就抽個別省份查，今次就會查曬
１８個省，審計可能會用一個月時間，年內都可能公布唔到結果。有審計人員話主要查彩票資金
管理使用，睇吓查到咩問題就畀意見。今次涉及彩票資金數以萬億計，有漏洞都唔出奇，彩票股
短期好大機會受壓。華彩（０１３７１）跌得最甘，埋單跌逾６巴仙收０﹒７３銀，一支大陰燭
插穿５０天線，睇見都唔開胃，可能會落番０﹒７銀樓下。街坊御泰中彩（００５５５）、第一
視頻（０００８２）就唔見１至近３巴仙。
另一方面，瑞信調低今明兩年濠賭博彩收入，分別料跌１巴仙同升４巴仙，話至今收入令人
失望，所以調低多隻賭仔目標價，大削永利澳門（０１１２８）一成目標價至２１﹒１元，搞到
收低近１巴仙收２５﹒６銀。雖然銀娛（０００２７）、金沙（０１９２８）都企穩，但另外有
傳下個月國家主席習近平會去澳門，到時可能嚇走曬ＶＩＰ影響貴賓廳收入，缸友都係唔好掂住
喇。
＊成績勝預期六福高高收，再炒頁岩氣有貨不憂愁＊
又係時間報告一吓「港股通」表現啦！今日最威水嘅代表就係六福（００５９０），公司噚
日完場之後派中期成績表，半年倒跌近１７巴仙至８﹒０５億，但就勝在勝過孖屐預期，而毛利
率就升到去近２４巴仙。大行普遍都話滿意業績表現，巴克萊就話同店銷售已經回復穩定，下半
年毛利率將會更好，叫缸友加碼！其他大行都齊齊升目標價，當中瑞信上望２８﹒５銀添。得到
各大行護航，六福以近１﹒３億銀大升逾一成收２５﹒６銀，仲帶挈埋街坊周生生
（００１１６）逆市升逾３巴仙。
另外，第四屆祖國頁岩氣大會今日喺成都開幕，缸友可能憧憬有好消息出台，安東油田
（０３３３７）下半場突然飆升１６巴仙收２﹒１７銀，宏華（００１９６）、華油能源
（０１２５１）都逆市衝高逾１１巴仙及近８巴仙。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
