即市新聞

18/12/2014 17:55

《小傳日記》花旗唔加息,好友再進逼;比亞迪洗倉,缸邊憂慼慼!

  《小傳日記》花旗國聯儲局喺噚晚(18日)結束兩日會議,會後只係繼續放下口風,試探
下孖屐嘅水溫。大禮欠奉,但小驚喜、小甜頭嚟講,主席耶倫絕無失場。相信大家實記得,耶倫
口唇邊長期掛住嘅嗰句「相當長時間保持近零利率」的承諾,喺噚晚一役後,就已經唔存在啦!
取而代之嘅係,未來兩次開會都唔會加息。換言之,要加都要等到出年4月之後。
  既然耶倫都打埋「開口牌」,喺加息議題上嘆慢板,魚缸自然好生猛啦!喺香江魚缸中,磚
頭股同金融股今日都受刺激有好彈力。大隻佬今日抽高咗246點或1﹒1巴仙;國貨指數亦升
61點,收11330點。
  講到成交,今日就令人有多少失落嘞!雖然今日都吹咗成996﹒4億銀,僅較噚日低咗約
8個巴仙,但孖屐吹住暖風,主板都唔可以延續噚日嘅千億成紀錄,噢!

*耶倫小禮物魚缸大步走,外圍立立亂後市仍然憂*

  去酒樓食飯,點餸可叫「例牌」,咁近期魚缸嘅「例牌」又係咩呢?睇怕都係油價同油股莫
屬啦。近期油價玩「瀡滑梯」,搞到小傳日日寫日記,都要提下佢有幾弱。油價連續幾日玩插水
,到今日終有返多少好消息啦!
  話說雖然花旗國周度庫存大增,但油價不跌反升,睇得出投機炒家匆忙平倉,令到油價終見
企返穩。美油上漲1%,報56﹒47美元,收市後更不時觸及平盤下方。油價近期有落無上,
雖然未見報復反彈,但總算好過無呀,所以啲石化佬齊齊GO GO GO!中海油
(00883)就最叻叻,一枝獨秀咁抽高2﹒3巴仙,穩守十蚊雞樓上收巿。中石油
(00857)亦陪升2巴仙;至於中石化(00386),亦保持隊形,陪升1﹒2巴仙。

*油價似否極油股高高收,船仔雖食油卻不往下游*

  油價終於拗腰彈,但船仔股一於少於理,今日繼續有好嘅表現。板塊漲幅最叻仔係中海集運
(02866),踢高超過5個巴仙,收報2﹒45銀,緊隨其後嘅中遠洋(01919)都有
逾3巴仙漲幅,收報3﹒97銀,差啲就可以企穩係4蚊大關,兩隻股份嘅A股都漲停板收市,
真喺可喜可賀。
  其他街坊表現都不過不失,太平洋航運(02343)同東方海外(00316)分別升
1﹒9個巴仙、1﹒5個巴仙。但過氣嘅藍戰士中遠太平洋(01199)好失威,升幅連1個
巴仙都無,造10﹒6銀。但點都唔及招商局(00144)咁陰公,逆市跌1﹒4個巴仙,逼
近五十、百天線,收報25﹒5銀。

*比亞迪洗倉個場嘩嘩聲,一度插四成認真得人驚*

  食完lunch後,本嚟見個巿悶悶地,就撥咗個輪同小傳嫂吹吹水。仲記得拎起電話嗰下
,比亞迪(01211)只係跌約5%,本嚟都不以為意,但點知一路傾,身邊嘅同事就開始依
嘩鬼叫;原來隻股直插入水無水花,冷不防被洗倉。
  小傳拿拿臨收線,望住個Mon嗰下,眼前見證住比亞迪今日跌到18﹒7銀,創逾兩年歷
史低位,股價就好似被掃堂腿擊中跌到攤攤腰嘅47巴仙。雖然喺魚缸打烊時,比亞迪略將跌幅
收窄,但埋單都唔見咗28﹒8巴仙,得返25﹒05銀炸陰功豬。至於比亞迪電子
(00285)就只係唔見咗2﹒6巴仙,收報7﹒22銀,可謂輸少當贏啦he he。
  比亞迪嚇親人,一眾砵砵車仍處之泰然,股價靠穩。其中,長汽(02333)、華晨
(01114)、廣汽(02238)一於唔理咁多,齊齊錫高逾1巴仙,各收39﹒05銀、
12﹒26銀及7﹒02銀。至於東風(00489)就慢半拍,被輕輕擦傷0﹒2巴仙。
 
*阿爺來錫錫基建有苗頭,中交建急抽表現最優秀*
 
  雖然香江呢邊個個Hea時間,等放聖誕假;但喺神州嗰邊,領導人就四出奔波,憂民。習
主席會去馬交;而今日就有風聲指,李總理將就出訪中東歐、匈牙利、塞爾維亞簽諒解備忘錄,
合作起匈塞嘅鐵路咁話,聽聞阿爺仲會同匈牙利等四個國家一齊,起返一條中歐陸海快線。咁大
工程嘅傑作,魚缸緊係落足眼力望實啦,話說個工程仲有一個「絲路基金」,涉資成400億美
金。另外,阿爺又會向政策性錢莊、大型商業錢莊等「揼水」3848億美金。今次阿爺支持國
企走出去,相信會帶動到神州同周邊嘅國家一齊富起嚟!到時大家一齊賺錢,一齊合皮!消息一
出,一班火車又匆匆開車,中交建(01800)開高6巴仙,中鐵建(01186)亦畀下面
升0﹒6巴仙,而中鐵(00390)都踢高2巴仙。連中聯重科(01157)亦踢高2巴仙
,收報5﹒37銀,認真叻仔。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式之
       申述或訂立任何建議及推薦,讀者務請運用個人獨立思考能力自行作出投資決定
       ,如因相關建議招致損失,概與《經濟通》、編者及作者無涉。

全新etnet健康網購,送你【健骨維他命D3(1000IU)】乙樽(價值$108)► 立即行動!

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力