《小傳日記》今日（２９日）係期指結算日，淡友一朝早就發動攻勢，一度將大隻佬推低最
多２４０點，不過Ａ場夠硬淨，企穩４４７６收場，而且大象（００００５）下半場突然又發
「象威」，幫手推高個市，結果魚缸埋單只係唔見４２點收２８４００，抗跌力夠晒強！
反而，祖國金融股成績無咩驚喜，錢莊同燕疏齊齊捱沽，嘔番噚日傳阿爺放水嘅部分升幅出
嚟，搞到國貨指數跑輸大市，碌低１１１點收１４６０３，主板成交就有１６３１億銀左右。
其實長假期前缸友戰意都開始散漫，加上美聯儲局今晚凌晨又會公布議息結果，雖然好大機
會維持息率不變，但孖屐都怕如果口脗有變，一陣又放風話想提早加息，到時淡友又有藉口出兵
進攻，缸友都無謂咁衝動亂掃貨，睇定Ｄ好過。
＊美今晚議息不變應萬變，國指跑輸了明天再應戰＊
近排啲大刁排住隊出爐，單單都引人注目！華富（００９５２）就獲民行（０１９８８）睇
中話想入主，諗住最多用約７５億銀買華富新股兼以每股１﹒３８銀提全購。華富突然獲得個咁
好嘅靠山，一於飛上枝頭變鳳凰！復賽後即刻高飛逾倍，最後都有６９巴仙進帳，報１﹒９８銀
。民行就好冷靜，微微行高唔夠１巴仙就算。
一班兄弟見到都好「葡萄」，不過有一班炒友錫番，齊齊升上太空開Ｐａｒｔｙ。當中，有
中國信達（０１３５９）做股東嘅中國富強（００２９０）就緊貼住華富，跳高５７巴仙，報
０﹒３４５銀，創近４年高位。結好（０００６４）、英皇證券（００７１７）同新華匯富
（００１８８）同分別都拉高３９巴仙、３３巴仙同２０巴仙，都創埋逾５年半高、上市新高同
近８年高。啲高位紀錄睇嚟好快破完一個又一個啦！
＊泊個好碼頭華富高高飛，券商有鑊氣開心到跳起＊
香江個市咁勁，連四叔都加入戰團！根據聯交所資料顯示，四叔上星期二到上星期四（２２
號到２４號）增持恆地（０００１２）共２７萬股，總值有１５８９萬銀，持股量增加到近七成
啦！唔單止咁，咁啱得咁橋，收市之後城規會就宣布，通過粉嶺北及古洞北分區計劃大綱，而四
叔喺新界有大把地，唔通恆地今日創新高６１﹒８銀係預先慶祝？！其他地主佬都跑起上嚟，新
世界（０００１７）同信和（０００８３）分別踢高近２至３巴仙。恆隆地產（００１０１）就
夠晒搶鏡，今朝早開完股東會之後，股價就升唔停，大漲近８巴仙收２６﹒２銀，做咗最威風藍
戰士，勁！心水清老友話，阿爺出招降入口關稅谷消費，當中涉及到時裝同化妝品等高消費貨品
；咁喺內地有高檔商場嘅１０１就自然Ｈａｐｐｙ啦。
之不過，有人觀喜有人愁，政策就不利本地自由行股仔啦，莎莎（００１７８）、卓悅
（００６５３）就急跣低４巴仙同近７巴仙。周大福（０１９２９）同九倉（００００４）就分
別唔見約２巴仙同４巴仙。
＊四叔來增持街坊也拍掌，降入口關稅零售傷上傷＊
永利澳門（０１１２８）公布成績表，第一季賺１﹒１億美金，少咗六成，不過公司就有股
東增持，但都救唔到股價，今日插低近８巴仙，報１６﹒１４銀。街坊都唔見得靚仔，銀娛
（０００２７）同金沙（０１９２８）都唔見近２巴仙同１巴仙。
頭先提過大象又成為焦點，公司聽日派末期息，而且下星期二（５日）又派季績，下半場突
然發力向上爬，踢起咗１巴仙，報７７﹒４５銀。街坊渣打（０２８８８）成績就唔得喇，首季
溢利跌咗兩成二，今日比人打低約１巴仙，最終報１２８﹒９銀完場。
另一隻藍戰士國壽（０２６２８）都放榜，花旗唱好提升目標價，皆因首季純利升七成，真
係幾勁！今日都成功逆市升近１巴仙！
＊永利成績曳粉絲真閉翳，股仔大上落扣好安全帶＊
細細粒唔代表成交細喎，中國文化產業（００７４５）單係今日成交金額已經去到１７億銀
，認真厲害！雖然發咗不明升因，但完全無阻升勢，噚日狂漲３４﹒８巴仙後，今日繼續飛高
４２巴仙，報０﹒２７銀。協同通信（０１６１３）同樣引人注目，成交股數較日均高成１４倍
，股價飆升２８巴仙。環球信貸（０１６６９）同樣大成交，不過係倒插近３８巴仙，報
３﹒１１銀，真係淒淒慘慘戚戚！
魚缸近排水漲船高，成交金額升咗好多，唔少參賽者乘機抽水。華瀚生物（００５８７）計
劃「二供一」，抽水３１﹒４３億銀，大部分諗住發展醫療服務。雖然折讓超過四成，但缸友都
唔多滿意，今日就碌低９巴仙收２﹒０９元，連五十天同百天線都無埋。
相反，同方泰德（０１２０６）先舊後新配股，籌７﹒５億銀，用嚟發展城市節能領域業務
。折讓唔夠一成，反而喺歡呼聲中走高６巴仙報７銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
