《小傳日記》真係估阿爺唔到，上一次喺母親節突然減息，點知唔夠一個月，上星期五
（２２日）收市之後，又失驚無神送大禮，啟動中港基金互認，初步投資額度進出各３０００億
人仔，將會喺回歸日，即係７月１日起正式實施。
咁好嘅消息，Ａ仔噚日（２５日）率先炒高，點知仲未夠喉，今日（２６日）再衝高２巴仙
收４９１０點，隨時五千大關見！Ａ場狂牛上身，香江今日假期後復市即跟升最多五百幾點，只
可惜尾市無力，最後收市得番２５７點進帳報２８２４９，國貨佬就保持強勢，抽高３６８點收
１４８０１，全日成交上番二字頭，有２００２億銀。
至於點解大市升少咗，有部分係因為長和（００００１）、和黃（０００１３）兩母子所致
。和黃今日收市之後就告別股壇，就喺散場前兩分鐘突然畀淡友襲擊，逆市跌逾２巴仙收１１５
銀；長和仲傷，倒跌逾４巴仙收１６５﹒１銀，一齊拖低大市共４７點。慘！
＊和黃別魚缸低收來作結，一號仔更傷粉絲鬱鬱結＊
神州香江一家親，上星期阿爺宣布，同香江證監落實兩地基金互認，喺今年７月１日實行，
身為香江嘅交易場班主，生發發（００３８８）當然繼續踢起啦！賓架德銀都睇好生發發呀，大
升目標價去到３７５銀，刺激股價飛起逾５巴仙，報３０９﹒４銀，成為全日升幅最勁嘅藍戰士
，今朝仲去到３１１﹒４銀再創上市新高添。
除此之外，孖屐又再傳出「深港通」準備就緒，缸友憧憬成交多咗，有望帶動券商佬收入增
加，於是齊齊衝入去掃貨，當中國泰君安（０１７８８）、信達國際（００１１１）、光大控股
（００１６５）就較受歡迎，有６至８巴仙進帳。大隻嘅海通證券（０６８３７）同中國銀河（
０６８８１）亦分別踢高逾３巴仙及５巴仙。
＊生發發狂飆德銀畀個讚，券商大踏前追貨最怕慢＊
除咗基金互認，阿爺仲公布，截至４月底，保險業總資產１１﹒０３萬億人幣，比年初增長
８個巴仙。保險資金運用餘額都比年初多７個巴仙。今日保險佬都唔客氣，一馬當先跑起晒，平
保（０２３１８）就創上市新高見１２５﹒８銀，埋單都踢起咗近３巴仙收１２２﹒６銀，國壽
（０２６２８）、人保（０１３３９）同新保（０１３３６）升幅介乎２至４巴仙。
Ａ場呢排咁勁，今日又咁好成績，缸友如果睇好大市，又諗唔到咩心水好股買嘅話，不妨買
ＥＴＦ喇。今日一班ＥＴＦ佬個個成績都好唔錯，南方Ａ５０（０２８２２）、Ｘ安碩Ａ５０（
０２８２３）都有逾３巴仙落袋。街坊華夏滬深三百（０３１８８）同海通滬深三百
（０２８１１）仲勁，抽高５至逾６巴仙。
＊Ａ仔變牛仔ＥＴＦ搶高，核電與軍工你好我更好＊
祖國兩間核電廠，中國核電同中國核建計劃強勢登陸Ａ股，雖然未真係著陸，但班核電廠同
行翹首以待，開定香檳慶祝。上海電氣（０２７２７）仲發埋６億歐元債券，股價今日踢高逾８
巴仙，報８﹒５６銀。中廣核電力（０１８１６）表現強勁，埋單升９巴仙，報４﹒８６銀。中
核國際（０２３０２）同東方電氣（０１０７２）分別都有４巴仙至５巴仙進帳，電力十足！
國務院今日發表新一份軍事戰略白皮事，缸友唔識睇份白皮書都唔緊要，事關呢期有少少消
息已經足夠炒起。就係咁，一班軍工股今日借消息炒起咗。航天控股（０００３１）飛高２６巴
仙，報１﹒８９銀。中航工業（００２３２）同航天萬源（０１１８５）分別走高逾１５巴仙至
１７有巴仙。廣船（００３１７）都唔曳，行上近９巴仙，報３６﹒１銀。
＊金利豐盈喜破頂來慶祝，股仔見鑊氣成交甚不俗＊
金利豐（０１０３１）發盈喜，估計今年純利大增。近排魚缸咁生猛，真係非常合皮。金利
豐仲諗住分柝埋金融業務上市，盈喜搭分柝業務，故事相當動人，股價以全日最高位收市，飆高
３８巴仙兼破頂，報３﹒６銀，厲害！
人和商業（０１３８７）同中建置地（００２６１）今日表現同樣吸引眼球，成交亦見異動
，股價今日分別漲約２５巴仙及２７巴仙，分別報０﹒７６銀及０﹒０４７銀。
南海控股（００６８０）上周五（２２日）飆咗１８％之後都發咗不明升因，不過股價唔收
步仲要繼續加油，飆升近３６巴仙，報０﹒３３銀。旗下中國數碼信息（００２５０）表現仲勇
猛，不明升因通告仲要係新鮮滾熱辣中午先發，不過都無阻升勢，收市飆升逾３８巴仙，報
０﹒２７銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
WoW WoW星期三：健康網購產品低至$99 (只限今天)► 立即行動
