即市新聞

02/07/2015 17:35

《小傳日記》阿爺愈心急,A仔愈唔得;載浮載沉間,國貨慌失失!

  《小傳日記》希臘呢個計時炸彈,真係搞到缸友有得震無得瞓,明明爭人錢,但總理齊普拉
斯就公開呼籲民眾要反對新緊縮方案,換句話講,即係擺到明同歐元集團作對。希臘將會喺今個
星期日(5日)有結果,睇嚟缸友下周一(6日)都要打醒十二分精神喇!
  至於A場嗰邊,老老實實,小傳真係從未見過阿爺喺咁短時間入面,連環出招救市,噚晚仲
要夤夜公布即時放寬兩融平倉規定;可想而知,阿爺救市決心有幾大!只可惜,A場實在太……
A場可以喺短時間由近五千點直插成千點,都無信心再入市掃貨。今日,A仔場又再碌低逾3巴
仙收3912點,盤中仲一度低見3795點!暫時藥石無靈,阿爺真係要再諗諗計。

*邊救邊後退A仔仍憔悴,券商ETF揸重心都碎*

  就係呢個動盪嘅時勢入面,早已被遺忘嘅濠賭股竟然嚟鋪絕地反擊,金沙(01928)、
銀娛(00027)爆升十幾巴仙推高大市。至於整體大市,亦算暫時逃過一跌,恆指收高
32點報26282。不過,中資股就投晒降,國指又蒸發196點或1﹒5巴仙,收
12784。全日主板成交約1508億銀。
  ETF股照舊跟住A場向下碌,孖寶跣低3至4巴仙、券商佬有阿爺撐都無用,大佬銀證
(06881)今日除淨,收市插低5巴仙收9﹒4銀、華泰六八八六(06886)獲摩通首
叫加碼,但都無助股價表現,收跌3巴仙報21﹒25銀。
  重農行(03618)夠晒威水,獲得阿爺批准降存準率50點子,水頭唔使咁緊下,股價
即刻爆升逾5巴仙收6﹒53銀,跑贏晒所有街坊。勁!

*過境放寬了大行畀個讚,濠賭大反擊銀娛光燦燦*

  賭仔終於絕地反擊,雖然噚日公布馬交上個月賭收得174億澳門幣左右,連續第13個月
按年向下,仲創咗自2010年12月新低,但就略為好過市場預期;加上馬交放寬過境規定,
多間大行即刻出報告話對賭收會有幫助,摩通話啱啱好一年前收緊過境政策,依家變番收緊之前
咁,估計可能阿爺想穩住馬交經濟。
  多間大行唱好之下,兩位藍戰士威盡全場,銀娛噚日先創完兩年低位,今日急反彈逾13巴
仙,報35銀,一口氣升破十天同廿天線;金沙亦彈高12巴仙,報29﹒25銀。其實兩位頹
咗好耐,仲做埋上半年表現最差兩位藍戰士,今日收復番DD失地,都不失為過吧!街坊美高梅
(02282)更獲匯證睇好,點名畀「掃貨」評級,成功急漲16巴仙。 

*萬達急插水平保來掟貨?迪迪入後波核電亦捱沽*

  萬達商業(03699)遭人掟貨,涉資最多約29億銀,「孖屐」再度發揮偵探嘅頭腦,
斷估平保(02318)旗下平安資產管理係今次掟貨者。萬達慘遭拋棄,股價蒸發7巴仙,報
58﹒1銀,成為今日國指跌幅最大股份。
  跟隨其後嘅就係電動砵砵車比亞迪(01211),雖然拎到墨西哥一單「大刁」,將會賣
批電動巴士畀當地公司,不過股東似乎不為所動,股價今日駛落逾6巴仙,報43﹒6銀。
  中廣核電力(01816)雖然話下半年有2台核電機組投資商業運營,兼且早前同法國企
業簽署合作,但受累神州疲弱表現,都要碌底5巴仙,報3﹒87銀。街坊上電(02727)
同東北電氣(00042)齊齊走低4巴仙至逾6巴仙。

*A股跌停板中交建悽慘,軟線全線跌QQ卻抵讚*

  火車族亦好唔得幾多,車頭近排似乎駛緊落山。中交建(01800)
(滬:601800)分拆中交疏浚申請獲受理,明明係天大喜事;奈何A股唔生性跌停板,H
股亦無奈走低逾2巴仙,報11﹒32銀。中鐵(00390)中標近400億人仔項目,大和
降級但升目標價,股價碌低逾3巴仙。街坊中車(01766)同中鐵建(01186)分別都
無咗5巴仙及3巴仙。
  神州魚缸戰情慘烈,軟件股都無運行。金蝶(00268)趴底逾6巴仙,報4﹒32銀,
老友金山軟件(03888)都差啲流血不止,無咗4巴仙報25﹒1銀。不過,當街坊全線捱
打之際,更見科網界大阿哥QQ(00700)地位穩如泰山,今日升逾1巴仙,報156﹒5
銀,勁!請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式之
       申述或訂立任何建議及推薦,讀者務請運用個人獨立思考能力自行作出投資決定
       ,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力