《小傳日記》中美彈完又再彈，香江倒插認真慘！

　　《小傳日記》花旗國噚晚（２７日）又開Ｐａｒｔｙ，慶祝完「息魔」遲到之後，跟住又大
幅上調經濟增長；道指開心到再抽高３６９點報１６６５４，一洗早幾日曾急瀉千點嘅恐慌。
　　Ａ場噚日急升逾５巴仙上番三千關，收市之後就傳出「國家隊」出手托市。今日（２８日）
Ａ仔繼續食住個勢，連三千二都收復埋，又彈高近５巴仙收３２３２點。只可惜，香江魚缸遇上
期指結算，噚日小傳都溫馨提示小心彈完又再散；果然，大市今朝最多抽升近６００點至
２２４２４，雖則連十天線（２２２８１）都衝破埋，但點知收市前，祖國錢莊、祖國移動
（００９４１）同ＱＱ（００７００）齊齊瞓低，恆指最終升轉跌，唔見２２６點收２１６１２
，國指就碌低１１２點報９７５０。
　　先高後低嘅一日，成交１１２９億銀左右。全日高低波幅又超過８００幾點，「戳」
ｃｈｏｋ到暈！

＊期指結算日果然彈完散，中移ＱＱ弱內銀更悽慘＊

　　內地銀主股呢排排隊派成績，當中放咗榜嘅工行（０１３９８）同農行（０１２８８），股
價都要由升轉跌。工行半年只係賺多唔夠１巴仙，不良貸款又增加，而農行成績都差唔多，純利
微升ＤＤ；分別碌低４巴仙同３巴仙。細間Ｄ嘅交行（０３３２８）同重農行（０３６１８）放
榜後走勢仲差，齊齊唔見４至５巴仙。拖累埋稍後放榜嘅中行（０３９８８）同建行
（００９３９）亦走低４巴仙。
　　Ａ場上番三千二，神州保險佬都跑出，中國太平（００９６６）飛起４巴仙，報２２﹒１５
銀。今日放榜嘅中國財險（０２３２８）就跌低２巴仙。街坊平保（０２３１８）同國壽
（０２６２８）本來都唔錯，但埋單跟市瞓低，「舉白旗」收場。

＊油價急反彈油股攞個讚，鐵鳥昨飛高今天被掟散＊

　　油價跌到得番４０蚊美金，呢兩日終於有番起色。油價噚晚飆高咗一成有多，震驚魚缸，石
油、油服一眾兄弟極為興奮。昆侖能源（００１３５）、中石化（００３８６）彈高約３巴仙，
報５﹒４１同５﹒１８銀；上石化（００３３８）都飛起近６巴仙，報２﹒９２銀。中石化油服
（０１０３３）、中海油服（０２８８３）就跳起近５巴仙。
　　油價反彈，可憐成班鐵鳥喊到收唔到聲，燃料貴返哂，又唔知要使多幾多錢。東航
（００６７０）、國航（００７５３）同南航（０１０５５）唔見咗約２至５巴仙，碌到去
４﹒１９、５﹒７６同５﹒０４銀。

＊聯想有異樣價量齊齊漲，麥記薦吉利車仔陪飛揚＊

　　聯想（００９９２）今日錄近５億銀開市前大手交易，股價今日飛起７巴仙，報６﹒７３銀
，重上十天線，成日今日最犀利嘅藍戰士。阿媽聯想控股（０３３９６）就碌低３巴仙，公司中
期純利按年升２﹒０９倍到４０億人仔，股價今日收報３０銀。
　　一班砵砵車就馬力十足，東風（００４８９）中期賺少咗一成九接近６９億人仔，唔派息，
股價今日反而踢得起７巴仙，報７﹒５３銀。吉利（００１７５）獲得麥格理升評級，刺激今日
開恆ＴＵＲＢＯ衝上一成六，報３﹒２９銀。長汽（０２３３３）就仲勁，派業績之前踢高一成
，報２０﹒８銀。廣汽（０２２３８）同比亞迪（０１２１１）亦衝高３巴仙同１巴仙，缸友要
扣好安全帶啦！

＊市況非常戳股仔更波動，大上大落間扣好安全帶＊

　　港深聯合（０８１８１）午後被豪氣掃貨，全日成交量驚人有成１﹒５億銀，衝前咗近３５
巴仙，一支大陽燭升穿１０天同２０天線，報０﹒９３銀，後尾仲衝到停埋牌添。原來公司下半
場突然錄得共１﹒５億股大手成交，佔發行股數近３８巴仙，睇嚟有啲嘢喎！
　　毅信控股（０１２４６）自己都唔知咩事，六連陰大撻七成之後，今日終於識反彈，踢高近
３７巴仙，報０﹒０４１銀；連同港深聯合佔據升幅榜頭兩位。
　　中國七星（００２４５）折讓九成配股，股價都即刻打個大折，冇咗逾５６巴仙，埋單得返
０﹒８２銀，五月以來賺埋嘅都差唔多嘔返哂出嚟。浙江世寶（０１０５７）就話畀魚缸嚇親，
要慳錢唔買野，最終插低近５１巴仙，報７﹒６１銀，齊齊差盡魚缸。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。