《小傳日記》八月蒸發三千點，痛定思痛再作戰！

　　《小傳日記》中美魚缸上星期尾試圖大反擊之後，今日（３１日）國務院總理李克強雖然喺
國務院專題會上，開金口話維護金融市場穩定運行，不過Ａ場都無咩反應，三千一關差Ｄ再被攻
陷。好彩好友尾市發力，最終只係唔見近１巴仙收３２０５，總算無驚無險又一天。
　　香江呢邊嘅業績期就快晝上句號，成績表都派得七七八八，兩個字形容：「無驚喜」。今個
月最驚險嘅，一定係月中發生嘅突發性全球「股災」，香江二萬大關亦響起警號。雖然近排回穩
番，但仲係無乜力水；今日個市又係衝高後縮水。之不過，到臨收市前最後一分鐘，祖國移動
（００９４１）突然抽高逾４巴仙至９５﹒６銀，收報９３﹒９，成功令魚缸收升５８點報
２１６７０；但係國指就要唔見９點收市報９７４１，全日成交有９４５億銀。
　　總結成個８月，香江魚缸蒸發２９６５點或１２巴仙，國貨就急插１３９０點或１２巴仙，
真係又傷又痛！

＊臨尾一分鐘中移發力衝，大市仍凶險缸友難輕鬆＊

　　祖國移動收市前一分鐘好誇張，好似有大戶要趕住補貨咁。咁啱得咁橋，今日巴克萊發報告
力撐祖國移動，仲話上望１３０蚊，今次真係威番次喎！
　　上星期五（２８日）油價繼續大舉反擊。成個星期計，花旗國期油累計升咗約１２巴仙。中
海油（００８８３）聽到都好振奮，今日踢高４巴仙，收報９﹒６１銀，做埋最佳藍戰士。不過
同行似乎反應冷淡，中石油（００８５７）同中石化（００３８６）齊齊碌低唔夠１巴仙，收報
６﹒４４銀及５﹒１６銀。
　　最唔想聽到油價急升自然喺一班鐵鳥，聽到啲食糧又貴咗心情鬱悶，國航（００７５３）
最唔開心，唔見咗近３％，收報５﹒６銀。東航（００６７０）都唔好過，無咗逾１％。貴為藍
戰士嘅國泰（００２９３）都碌低逾２巴仙。南航就臨尾反升唔夠１巴仙，收報５﹒０５銀。

＊油價再抽上油股各走各，長汽好慷慨可惜仍要落＊

　　長汽（０２３３３）放榜，半年溢利增加一成九，仲１送２紅股，派２５分人仔息，同時話
增發Ａ股集資１２０億人仔。不過巴克萊、匯證就紛紛削目標價，只得里昂唱反調叫人買入，股
價最後都企唔穩，收報２０﹒７銀。同樣比里昂睇好嘅東風（００４８９）就踢起近４巴仙，報
７﹒８銀。街坊吉利（００１７５）就最慘，由頭跌到落尾，收挫近９巴仙報３銀。
　　鐵路佬表現就仲差勁，中交建（０１８００）中期賺６８億人仔，按年增加一成三唔派息；
中車（０１７６６）中期都賺４７億人仔增７個巴仙，兩者都齊齊入後波，各自跌４巴仙及５巴
仙！至於其他街坊中鐵（００３９０）同中鐵建（０１１８６）都無運行，跟大隊瞓低。

＊鐵路與賭仔今天齊碌低，聯想再轉弱媽媽更閉翳＊

　　馬交就快出８月賭收數據，賭仔已經率先向下碌，銀娛（０００２７）跣低近６巴仙，報２
４﹒８５銀，係第二差藍戰士；另一位街坊金沙（０１９２８）亦唔好得去邊，唔見２巴仙，報
　銀；永利（０１１２８）更加見３年低位，踩低近８巴仙，收報１１﹒９６銀。
　　聯想（００９９２）喘定兩日後今日又急跌逾５巴仙，收報６﹒３６銀，排喺銀娛後面。阿
媽聯想控股（０３３９６）就拎４﹒６億銀戰略投資時趣，但缸友唔ｂｕｙ，埋單無咗６巴仙。
　　另一邊廂，康宏（０１０１９）就威盡魚缸！公司調整向寶島首富蔡明興配股價，同時再向
其他投資者配股，總共「Ｃａｐ水」近４４億銀。今日復牌後急升３５巴仙收０﹒５銀，係表現
最好個股。鱷魚恤（００１２２）跟隨其後，亦急升２６巴仙，收１﹒１１銀。

＊康宏鱷魚恤升勢真誇張，單日插八成７３６停牌＊

　　早前獲神車（０１７６６）計劃入主嘅中國置業（００７３６）今日突然遭到洗倉，單日暴
瀉８２巴仙後停牌，收報０﹒２４３元，成交金額仲高達５﹒２８億，對住呢啲參賽者都係眼看
手勿動安全啲啦！
　　除咗中國置業，仲有好幾位參賽者今日都大成交畀粉絲拋棄，港深聯合（０８１８１）控股
股東失去控股地位，股份今日都大成交急插咗近３７巴仙落嚟，收報０﹒５９銀。海航
（００５２１）折讓兩成「五供九」，股價碌低約２３巴仙。榮豐（０００６３）控股股東賣盤
唔成，亦都趴低２３巴仙。
　　中國宏橋（０１３７８）就陰功Ｄ，派完中期成績表，多賺３３巴仙至２７億人仔，但缸友
唔滿意掟貨，同樣蒸發咗近兩成，收報３﹒７１銀。請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。