《小傳日記》ＰＭＩ曳曳，魚缸再碌低；港元縱偏強，好友卻閉翳！

　　《小傳日記》花旗國噚晚（３１日）又傳出「息魔」會喺９月來臨，道指碌低百幾點收
１６５２８。而「油魔」近排愈戰愈勇，油價強勢衝高，再加上阿爺放水１５００億銀人仔，香
江魚缸勉強高開２２點，但已係全日最光輝嘅一刻…今日公布幾個ＰＭＩ數據都唔多掂，Ａ場穿
咗三千一，香江都隨即調頭向下碌。
　　收市前半個鐘左右，金管局突然承接美元沽盤，向市場注入６２億港元。之不過，港紙有港
紙強，個市就愈跌愈急，情況就同噚日收市前啱啱相反。今日中移動（００９４１）由升轉倒跌
１％收市，股王ＱＱ（００７００）仲慘，做咗淡友狙擊對象，挫逾３巴仙收１２７﹒２銀。恆
指一度瀉近５００點，埋單收２１１８５唔見４８５點，國指就再插低２８７點報９４５４，全
日成交約８５８億銀。
　　點解今次注資對魚缸無沖喜作用？有分析話，過往港匯轉強，係因為大戶搶住兌港紙，喺魚
缸大炒；不過近排係因為人仔失寵，股市又無作為，大家都寧願揸港紙，蝕息好過蝕本，金管局
先迫住出手。所以，唔好誤以為係魚缸見底訊號呀！

＊人仔失寵了股匯乏作為，風高浪亦急寧可揸港紙＊

　　雖然阿爺又放水，不過對銀主們好似無咩幫助，「賓架」大和就話最唔睇好建行
（００９３９），因為佢不良貸款有壓力，整低佢目標價４個巴仙，股價今日就唔見２巴仙，報
５﹒３４銀。街坊民行（０１９８８）入主華富國際（００９５２），大和維持佢「持有」評級
，但係民行就跟市跣低３巴仙，報７﹒２７銀，華富就升３巴仙。其他街坊交行（０３３２８）
、重農行（０３６１８）就分別碌低３巴仙同７巴仙。
　　神州保險佬都大驚失色，之前半年仲賺多咗六成五嘅太保（０２６０１）今日唔見１巴仙。
街坊隨著上證失守而受累，平保（０２３１８）、國壽（０２６２８）、新華（０１３３９）分
別趴低２巴仙至６巴仙。但有一個怪現象，就係Ｈ股跌得好急，但Ａ股就只係微軟，隻壽仔Ａ股
（滬：６０１６２８）仲升逾２％收市。
　　香江錢莊都有壞消息，標普將港銀經濟風險趨勢由「穩定」降至「負面」，中銀香港
（０２３８８）急插近６巴仙。地主股亦碌低，新地（０００１６）同恆地（０００１２）都唔
見約３巴仙。
　　
＊護盤好努力要跌可奈何？標普踩一踩港銀難輕鬆＊

　　魚缸呢排日日賭大細咁，真係仲刺激過過大海。不過一班賭仔都自身難保，銀娛
（０００２７）、金沙（０１９２８）分別趴低４巴仙同２巴仙，報２３﹒９５銀同２６﹒２５
銀。事關馬交政府宣布，即日起實行緊縮財政開支措施，涉及嘅金額達到１４億澳元。而馬交８
月博彩收入有１８６億澳元，按年減少咗三成六。咁嘅環境之下，一班濠賭股好似澳博
（００８８０）、永利澳門（０１１２８）同美高梅（０２２８２）都要跌，分別唔見３巴仙、
１巴仙同２巴仙。
　　香江零售業都步入寒冬，有風話「鞋王」百麗國際（０１８８０）自家品牌ＢｅＬＬＥ近月
開始撤出香港，最後一間位於將軍澳的門店噚日正式結業，其實之前官府公布，香江７月零售銷
售下滑咗３個巴仙，市道咁差，舖租又貴，你話點捱吖。百麗收唔見３巴仙，而周大福
（０１９２９）、周生生（００１１６）等等都唔見１巴仙至２巴仙。

＊馬交要緊縮濠賭沽壓重，零售入寒冬鐵鳥跌得痛＊
　
　　砵砵車之中，吉利（００１７５）有摩通睇好，但似乎佢嘅主要股東標準人壽意見相反，上
星期二（２５日）減持咗１７５１萬股，持股量得番４﹒８４巴仙。吉利今日就碌低７巴仙，報
２﹒７９銀。廣汽集團（０２２３８）畀摩通唱衰叫減持，目標價降到５蚊，結果瞓低６巴仙，
報５﹒１２銀，仲試過低見５﹒０２銀，創超過兩年半新低。而兄弟東風集團（００４８９）、
北京汽車（０１９５８）唔多合群，分別行前３同２巴仙。
　　油價連漲三日，鐵鳥成本跟住係咁升，自然心慌慌，南航（０１０５５）瀉足一成三，報
４﹒４１銀。國航（００７５３）同東航（００６７０）亦雙雙插咗８巴仙，埋單５﹒１４同
３﹒７８銀。

＊吉利與廣汽齊齊入後波，牛牛跌唔停２６７頭痕＊

　　蒙牛（０２３１９）跌唔停，又唔見咗７巴仙，報２５﹒２５銀，成為最差嘅藍戰士。原來
，高盛噚日話「沽售」，目標價下調到２６﹒６銀；摩通雖然維持「增持」評級，但亦都削咗目
標價。
　　中國神華（０１０８８）同康師傅（００３２２）唔好得去邊，齊齊跣低５至６巴仙。而中
信股份（００２６７）畀澳洲礦業大亨索償１００億澳元，即係５５０億港幣，嚇到缸友齊齊掟
貨，埋單瞓低５巴仙。
　　雖然魚缸尾市無力，不過噚日暴瀉四成有多嘅友川（０１３２３），今日就考慮賣中國能源
貿易全部權益，當堂嚟個華麗大翻身，愈升愈有，最後踢高七成，報３﹒５４銀，接近收復全部
失地，係最威水個股。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。