《小傳日記》香江魚缸經過噚日（２９日）一場突如奇來嘅商品風暴，無端端急瀉６００幾
點，唔少缸友都走唔切而大傷元氣。噚晚花旗國魚缸噚晚都表現平平，Ａ場今朝（３０日）又係
呆呆滯滯，喺放長假前，只係輕微踢高ＤＤ收３０５２點。
以為又係平平淡淡等放假，阿爺再次出聲力撐砵砵車行業，又為魚缸帶嚟新氣象；今朝未正
式開市，全線車股都開晒ＴＵＲＢＯ，部分車仔喺競價時段已經衝高至場一成。而更加重要係，
市場憧憬阿爺好快會再放水谷經濟。結果恆指喺聽日（１日）國慶假期前，踢高２８９點收
２０８４６，國指都有１７５點落袋收９４０５。全日成交８５２億銀左右。
個市今日係威係勢，總結第三季香江表現，就真係見者流淚了！基本上７月開始就一路向下
碌，上演尋底之旅，季內大隻佬指數足足唔見約兩成，國貨佬就蒸發近三成。傷！
＊阿爺來錫錫車仔飆呀飆，油股齊反彈一隻不能少＊
阿爺噚日收市後又出招救砵砵車，由聽日到明年年底，買細排量汽車可以減一半稅，車廠就
最開心，競價時段已經全線踢高，長汽（０２３３３）撞正中期息同「十送二十」紅股除淨，表
現最好，曾經飆升最多３６巴仙高見９﹒５９銀，收市前都仲抽高２１巴仙，收復多條平均線，
報８﹒５６銀，認真犀利！廣汽（０２２３８）就畀大行讚，話下半年銷售增長好鬼勁，又升目
標價又升盈利預測，今日高飛９巴仙，報６﹒３１銀。其他砵砵車都走上５至１６巴仙。
另一方面，神州電動車都攞到特權，唔駛再限行同限購；比亞迪（０１２１１）好雀躍，跑
前６巴仙，報４０﹒８５點，五龍（００７２９）同樣向前開動８巴仙，報０﹒５６點。
多咗人買車，賣車佬齊齊開ｐａｒｔｙ，寶信（０１２９３）、大昌行（０１８２８）同中
升（００８８１）都升咗４至５巴仙。
＊放假去旅行鐵鳥向上行，股仔甚波動睇見心都震＊
油價見反彈，油股紛紛反彈，中海油（００８８３）急升近７巴仙，報７﹒９３銀，係表現
最勁藍戰士，補番曬噚日跌幅。中石化（００３８６）排第五，亦升半成，報４﹒７１銀。中石
油（００８５７）亦踢高３巴仙，報５﹒３７銀。
雖然油價回升，但十一黃金周就快到，鐵鳥股價大升，國航（００７５３）踢高近２巴仙，
東航（００６７０）大升６巴仙，南航（０１０５５）更加抽升７巴仙！
奇峰化纖（００５４９）打算溢價６５巴仙配股，結果大升２４巴仙。
呢排半新丁Ｃｈｏｋ到暈，真係睇到個心都離一離。立基（０８３６９）噚日急插９５巴仙
後指不明跌因，結果今日反彈番近６７巴仙！另一半新丁ＲＥＦ（０８１７７）都坐過山車，炒
高超過三成後倒跌近３８巴仙收場。
＊反駁撤資論超人系回升，流量不清零中移不太醒＊
之前有神州傳媒批評超人撤資，超人終於反擊，話最近一啲人對佢本人同集團作出無根據嘅
指摘，批評語調令人不寒而慄，令人遺憾。仲話長和（００００１）重組嘅時候無套現，所謂撤
資，完全不成立。長和今日股價就反彈２巴仙，報１００﹒２銀。同時錄得近２巴仙升幅嘅有長
江基建（０１０３８）同長實（０１１１３）。至於電能（００００６）成避險對象，踢起逾２
巴仙，報７３﹒１銀。
根據祖國移動（００９４１）、中聯通（００７６２）、中電信（００７２８）嘅通告顯示
，自１０月１日起，佢地都將為手機用戶提供月套餐內當月剩餘流量單月不清零服務，賓架們就
認為，新政策唔會有損盈利。除咗中移動股跌低ＤＤ外，其餘兩位都有２至３巴仙落袋。
＊銀聯設限提賭仔續閉翳，光纖今復彈插見兩年低＊
賭仔今日繼續唔生性，市傳外匯局將銀聯卡將增設年度限額，每年境外累計拎現金唔可以超
過１０萬蚊。瑞信話對賭仔影響應該唔大，因為可以用多幾張卡或中介就得，仲話股價已反映所
有風險。匯證亦都同意影響微，估計９月份馬交賭收介乎１７３億至１７８億，投資偏好美高梅
（０２２８２）同永利（０１１２８）。雖然賭仔有大行雪中送炭，但藍戰士銀娛
（０００２７）喺大升市仍碌低近１巴仙，報１９﹒７銀；金沙（０１９２８）更加跌近４巴仙
，報２３﹒３銀，係表現最差藍戰士。
中國光纖（０３７７７）旗下四方通信就沽空報告報公安，結果今日報牌後插３３巴仙收場
，仲試過低見兩年低位０﹒８４銀。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
