《小傳日記》ＰＭＩ沖喜，香江高高飛；阿爺再出手，磚頭向上走！

　　《小傳日記》香江魚江國慶假期後復賽，Ａ場就繼續放假直至下周四（８日）先復賽。噚晚
，花旗魚缸表現平平，孖屐繼續觀望今日將公布嘅非農業就業數據。喺放假期間，阿爺公布咗９
月份官方製造業ＰＭＩ略勝預期至４９﹒８，不過財新版嘅９月製造業ＰＭＩ終值就錄得
４７﹒２，仍較８月份為差。
　　雖然放假，但阿爺出招無停手，要保經濟擴內需，吓吓自然大手筆，而今次就輪到神州磚頭
股行大運。阿爺又可憐馬交經濟縮水，放風話會諗計幫手，馬交賭仔聽到都一樣開心。兩班人馬
帶住魚缸係咁衝，今日攀升６５９點，收報２１５０６點，突破兩萬一關之餘兼收復１０天線及
２０天線。國貨都踢高２８１點，收報９６８６點。全日成交約９１０億銀。
　　今星期得三個交易日，港股累計升咗３１９點，國貨亦累計升咗１７４點。總算一吐烏氣，
希望有個好開始，迎來歡欣嘅１０月啦！

＊賭收未回升銀娛仍強勁，阿爺出力撐車仔往上彈＊

　　賭仔連續垂頭喪氣咗咁多日，今日終於吐氣揚眉。馬交９月博彩毛收入按年下跌三成三，只
係跌幅比上個月收窄０﹒３巴仙。賓架瑞信表示，博彩股調整過度，對賭仔黃金周中場嘅表現審
慎樂觀。瑞信就首選推薦金沙（０１９２８），股價就飛起逾６巴仙，報２４﹒７５銀。街坊銀
娛（０００２７）表現仲勁，踢起逾一成，報２１﹒７銀，係最勁藍戰士。跟喺後面嘅新濠國際
（００２００）、澳博（００８８０）都有約６巴仙進賬，但都唔夠永利澳門（０１１２８）咁
勁，飛起逾７巴仙。
　　汽車股繼續畀晒油衝前，今日中期息除淨嘅廣汽（０２２３８）就踢起近６巴仙，報
６﹒５６銀。總理李克強早前促小排量汽車發展，亦都推動長汽（０２３３３）、吉利
（００１７５）呢啲車仔飛起１３同近５巴仙，分別報９﹒６８銀、３﹒８６銀。比亞迪
（０１２１１）就走上近５巴仙，報４２﹒７５銀。　　

＊阿爺續發功磚頭向上衝，券商修復中炒高好輕鬆＊

　　阿爺繼續發功，今次要撐大陸磚頭，開設住房異地貸款兼放寬按揭額度，內房股齊齊跳隻開
心舞，潤地（０１１０９）及中海外（００６８８）好巴閉，畀大行睇高一線，分別踢高近９及
７巴仙，報１９﹒７４銀及２５銀。融創（０１９１８）仲開心，飛高逾１３巴仙報４﹒５７銀
。保利置業（００１１９）大踏步向前近９巴仙，全日報２﹒３２銀。
　　神州統計局指神州證券業商務活動位於臨界點，處於自我修服同調整階段。不過，今日魚缸
漲得高，部分神州經紀佬發力跳得高。海通證券（０６８３７）向前衝７巴仙，報１１﹒９４銀
。中信証券（０６０３０）及中國銀河（０６８８１）踏高５至６巴仙。

＊ＱＱ計仔多缸友笑呵呵，中移傳降費股價仍強勢＊

　　魚缸叻仔上揚全靠一班籃戰士落力畀油。其中，ＱＱ（００７００）據報考慮投資購物網站
「分期樂」同投資泡菜國網絡錢莊，股價今日踢高近５巴仙，收報１３５﹒５銀。
　　中蠕動（００９４１）據報正喺度傾緊下調４Ｇ收費及國際漫遊費，並講提速降費喺三大電
訊商一直做緊嘅事。公司今日賽前錄得約１０億銀大手，股價企高近３巴仙，收報９４﹒３銀。
　　其他大隻佬，好似友邦（０１２９９）都錄得約１﹒６億銀大手，股價扯高逾６巴仙，收報
４２﹒５５銀。生發發（００３８８）同平保（０２３１８）都分別有４至５巴仙落袋，收報
１８４﹒４銀及４０﹒２銀。　　

＊立基續爆上，中持跟住揚；長毛插匯思，華瑞遭洗倉＊

　　除咗啲大魚強勁外，細價魚仔表現仲活躍。立基工程（０８３６９）以配售價０﹒２５銀上
市僅四日，但日日都有驚喜，上市首日較配股價高收１９倍後，翌日竟然急瀉近９５巴仙，嚇死
唔少缸友，點知第三日反彈近６７巴仙，以為完啦，今日再試過踼高一倍，最尾都有６７巴仙進
帳，收報０﹒７１銀，真係心血少啲都唔掂！
　　中持基業（０８１２５）主席售４７巴仙持股，股價踢高近５２巴仙，收報４﹒４銀。有「
股膻長毛」之稱嘅Ｄａｖｉｄ　Ｗｅｂｂ插匯思太平洋（０８１４７）有泡沬，每股僅值
０﹒２５銀，不過股價未受影響，踢高逾１６巴仙，收報１４﹒４銀，兼創上市新高。
　　大升下又唔係完全無輸家，華泰瑞銀（０８００６）無啦啦碌低逾４９巴仙。ＤＸ﹒ＣＯＭ
（０８０８６）諗住「十合一」，股東即時放棄，同樣唔見咗近２４巴仙。假期愉快，請請！　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。