《小傳日記》祖國魚缸仲放緊大假，要等到今個星期四（８日）先復賽，香江魚缸就去番以
前咁樣，睇住花旗魚缸做人。上星期五晚（２日），花旗魚缸本來因為就業數據唔掂，一度碌低
二百幾點，但後來缸友將壞消息當好消息炒，即係數據唔好，息魔今年就可能嚟唔到，於是收市
拗腰彈番高２００點收１６４７２。花旗市好似仲波動過啲新興市場！
已經連續反彈兩日嘅香江魚缸，今朝（５日）都繼續食住個強勢，高開４００幾點見
２１９３０，不過去到二萬二前面又係無力衝，埋單收報２１８５４點漲３４８點，三日累升近
１３００點！國貨佬就踢高１９７點收９８８３。只可惜，成交就未見急增，只係得７５９億銀
左右。
講一講缸外世界，香江前特首煲呔涉貪案突然有重大進展，廉署調查咗三年，決定落案起訴
煲呔兩項身為公職人員行為失當罪名，涉及喺行會未有申報利益。煲呔獲准以１０萬蚊保釋，案
件押後至下月中再審。
＊大落復大上美股甚波動，息魔慢慢行地主倍輕鬆＊
花旗國就業數據唔係好掂，一眾缸友都怕怕，不過好友當好消息炒，推算美聯儲今年唔會咁
快加息，香江磚頭佬聽到都幾開心。恆地（０００１２）最近先獲主席李兆基增持，再加埋息魔
未到，即時醒神晒，衝高３巴仙收４８銀。街坊新世界（０００１７）、會德豐
（０００２０）同嘉華（００１７３）都行前３巴仙，分別報７﹒８８銀、４﹒７５銀及
３４﹒７５銀。
大隻佬表現都唔錯，ＱＱ（００７００）上星期五已話想買高麗國網上錢莊業務，今日仲未
興奮完，再彈上３巴仙報１３９﹒７銀。大笨象（００００５）開始擺脫被瑞士調查嘅陰影，仲
傳出同摩通攜手競購米字國１２０億英鎊抵押貸款添，今日踏前２巴仙，破廿天線（５９﹒７９
銀），報６０﹒６５銀。可憐中移動（００９４１）獲高盛列入「確信買入」名單，但都只係輕
輕踢高ＤＤ，收９４﹒７銀。
＊高佬畀個讚中移卻不行，ＱＱ續強勢大象彈一彈＊
馬交數據，內地旅客黃金周兩日增逾兩成，旅客總量達到３２﹒７２萬人，按年增長
１３﹒４巴仙。再加埋惠譽話賭收環比而言可能已經見底，受好消息刺激，銀娛（０００２７）
強勁反彈，一朝早高開近一成見全日最高價２３﹒８５銀，但之後升幅收窄返但都有５巴仙落袋
，報２２﹒８５銀。點解升少咁多？原來黃金周頭兩日好得，但如果以第四日計，訪澳人數按年
跌近１６巴仙，到１１﹒４萬人。其他賭仔街坊金沙（０１９２８）、澳博（００８８０）同永
利（０１１２８），亦都縮晒水，埋單得留１巴仙至３巴仙升幅。
據香江入境處數據，頭三日黃金周旅客人數高達６６萬人次，按年升一成，零售股今日普遍
造好。莎莎（００１７８）就錄得６巴仙進帳，報３﹒１８銀。瑞信就話零售銷售同租金跌勢持
續，零售業經營壓力相應減少。做化妝品生意嘅卓悅（００６５３）就錄得近５巴仙升幅，不過
周大福（０１９２９）就唔見逾１巴仙報６﹒６銀。
＊黃金周效應賭仔向前踏，零售各走各汽車打倒褪＊
所謂花無百日紅，急升咗一排嘅車股今日都逆市開倒車，長汽（０２３３３）、吉利
（００１７５）今日高見１０﹒４銀同３﹒９３銀後回落，長汽仲走低逾２巴仙，最後收報
９﹒４５銀，後者就跣低近４巴仙，報３﹒７１銀。另一邊廂，阿爺就話５年後滿足５００萬架
電動車充電需求，不過早排比亞迪（０１２１１）已經升咗唔少，今日都要跌低唔夠１巴仙，報
４２﹒５５銀。
靜咗好耐嘅光伏股都給力發電，行業代表保利協鑫（０３８００）今日踢起逾５巴仙，報
１﹒６２銀，計埋今日已經出現「三連陽」，三日累計進帳一成二。街坊順風清潔
（０１１６５）就踢起近７巴仙，報２﹒１３銀。
＊光伏有睇頭缸邊鬥光芒，股仔過山車扣好安全帶＊
魚缸彈完再彈，細價魚毛好鬼生猛。立基工程（０８３６９）上市五日以嚟，股價上落仲勁
過過山車，今日報０﹒９３銀，漲３１巴仙，但已經係表現「最平靜」嘅一日。立基試過最高見
１４﹒８８銀，係配售價０﹒２５銀嘅５９倍，最低又試過見０﹒２３１銀，失守配售價，真係
要寫個「服」字呀！
取而代之，今日最大贏家係半新丁豐展（０８２４８），一眾缸友炒得興起，收市報
２﹒０６銀，踢高８７巴仙，比配售價０﹒２５銀高出超過８倍！南南資源（０１２２９）仲無
啦啦收市前衝咗上嚟，飆升逾４８巴仙收０﹒８銀，黑馬成為第二表現佳個股。排喺第三嘅中持
基業（０８１２５）都抽高３６巴仙報６銀。
礦工大佬嘉能可（００８０５）連續幾個月都好弱，前幾日仲插到去８﹒６８銀歷史新低添
！喺小反彈兩日之後，今日終於一鼓作氣，一度狂飆７１巴仙，不過發咗不明升因後，就即時腳
仔軟，最後只踢高１８巴仙報１２﹒６銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
