《小傳日記》Ａ場未復賽，花旗攞晒彩；開波兩萬二，熊仔齊被宰！

　　《小傳日記》花旗好友又趁住Ａ場仲未復賽乘勝追擊，繼續借「息魔遲來」嘅憧憬，噚晚將
道指再推高約３００點報１６７７６。香江好友當然唔會放過大好機會，今朝（６日）即刻一鼓
作氣，開市就夾高魚缸３１４點至２２１６９，衝破二萬二大關，３９隻恆指熊證極速打靶。
　　不過魚缸呢幾日已經累升咗１６００點左右，缸友都驚Ａ場後日（８日）復賽唔知咩環境，
決定見好就收，止賺離場為上策。結果，恆指埋單倒跌２２點收２１８３１，二萬二得而復失，
國指就勉強頂得住，踢高４７點收９９３１。
　　先升後回嘅一日，成交都係咁上下，約７８３億銀。
　　
＊見高急散水午後變憔悴，大行大合奏賭仔多人追＊

　　賭仔今日繼續發力，多間大行唱好，摩通指賭仔已經變得回報吸引，係時候建倉，升咗一堆
賭仔評級。大和就指黃金周開局開得好，頭幾日賭收介乎８至９億，又預計今個月賭收１９５億
按年跌三成，按月升一成。富瑞指９月份賭仔表現落後大市，睇好金沙（０１９２８）同銀娛
（０００２７）等，畀「掃貨」評級。結果金沙最叻，抽升近９巴仙，收報２７﹒８銀，係表現
最好藍戰士；銀娛排第二，亦有近４巴仙進帳，報２３﹒７５銀。
　　中信股份（００２６７）慘遭大摩降評級至「沽貨」，結果挫近３巴仙，報１４﹒２銀。聯
想（００９９２）藍戰士中跌得最甘，唔見超過３巴仙，報６﹒５７銀。

＊大摩降評級中信有所失，油股跳隻舞鐵鳥唔多得＊

　　傳全球最大的石油出口企業沙特阿美請德行收購中石油集團嘅收購營銷、零售同煉油資產，
如果成事，可能涉資幾十億美金！加上油價升超過２巴仙，中石油（００８５７）踢高３巴仙，
收５﹒７６銀。中海油（００８８３）亦有１巴仙，進帳收８﹒３７銀；中石化（００３８６）
就升近２巴仙。
　　油價造好嘅消息對鐵鳥不利，國航（００７５３）唔見半個巴仙，東航（００６７０）跌近
１巴仙，南航（０１０５５）更加挫４巴仙。
　　車仔就向前衝，據報馬來西亞嘅普騰打算同吉利汽車集團合作開拓東盟「孖屐」，結果吉利
（００１７５）漲近半成；而比亞迪（０１２１１）亦踢高超過半成。大家都合皮！

＊吉利走出去街坊同拍掌，四叔再抱孫喜派大利是＊

　　長和（００００１）收購Ｏ２交易遇阻滯，米字國競爭及市場管理局要求深入調查，評估交
易對當地零售移動業務市場競爭嘅影響，先再決定批唔批。長和曾經踢前１巴仙左右後回軟，全
日就冇變動，報１０３﹒９銀。超人愛股之中，電能（００００６）亦冧咗２巴仙，報
７２﹒７５銀；而長建（０１０３８）同長實（０１１１３）亦唔見咗近１巴仙。
　　至於其他地主佬，炒完一浸息魔遲到之後，今日亦紛紛回吐。新世界（０００１７）傷啲，
跌近２％，恆地（０００１２）就微跌一格。講開恆地，要恭喜四叔再做爺爺。上月尾徐子淇誕
下５﹒７磅囝囝，湊成兩個「好」字，認真合皮。四叔每次抱孫，都會向旗下員工豪派利是，今
次亦不例外，每人一萬元，總之大家都開心。
　　神州電訊三子亦令人失望，帶住魚缸升轉跌。聯通（００７６２）愈跌愈深，結果跣低逾３
巴仙，報９﹒６８銀。中電信（００７２８）同中移動（００９４１）亦分別碌低１至２巴仙，
埋單３﹒６９同９３﹒５銀。中移早午各有兩大手交叉盤，夾埋成１６﹒４億，佔總交易足足四
成三。睇嚟夾高殺熊嘅任務已達到喇，臨尾就放軟手腳！

＊電訊同回吐最傷係聯通，半新過山車個心離一離＊

　　中國置業投資（００７３６）自從同中車（０１７６６）結唔成婚之後，成個９月都唔識點
郁，今日威返次，真係打遍魚缸無敵手，飆高近８５巴仙，收報０﹒２４銀；而成交亦突然激增
，有成４２億，比平日多咗近２３倍，仲上埋成交榜第１２位。
　　一班半新丁炒完一輪似有回吐，ＲＥＦ（０８１７７）插咗近兩成，得返１﹒０２銀，成為
大輸家。而前進控股（０１４９９）開市高歌猛進，破頂高見０﹒５８銀，但後勁不繼打倒褪，
全日亦碌低咗逾１３巴仙，報０﹒４８５銀。
　　要數最癲嘅莫過於立基（０８３６９），上山下海咩都試過，首日一度飛高配售價０﹒２５
銀５９倍見１４﹒８８銀，翌日又曾經失守配售價低見０﹒２３１銀，之後兩日彈起６７巴仙，
噚日又有３１巴仙進帳，今日終於瞓低近９巴仙，已經叫做冇咁激可以唞返吓。收報０﹒８５銀
。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。