《小傳日記》Ａ場明回歸，中字輩威威；累升兩千點，香江終轉勢？

　　《小傳日記》Ａ場放假，花旗同香江好友出盡力奪回失地，噚日（６日）香江已經一度重奪
二萬二大關，上演一場「屠熊記」。士氣咁高昂，當然唔好比佢停喇！
　　香江好友趁Ａ場聽日（８日）復賽，今日（７日）一氣呵成攻陷埋５０天線（約２２５０６
點），以近全日最高位２２５１５點收市，大幅飆升６８４點或３﹒１巴仙，五日足足升咗近二
千點！中字輩更加強勢沒法擋，除咗油股威盡全場做領軍外，祖國錢莊、內險、就連靜咗一排嘅
券商股都率先炒起晒，齊齊將國指推高４６３點或４﹒７巴仙，收報１０３９４。
　　大夾倉嘅一日，全日大市成交高達１０８７億銀，急增近四成添！嘩，生發發升４﹒５％呀
！
　　不過，缸外就有一單令人感到婉惜嘅事發生，海洋公園證實大熊貓盈盈流產，熊貓ＢＢ突然
無咗生命跡象。本來預計喺今個星期六（１０日），就可以迎接香江第一隻「本土」大熊貓ＢＢ
，依家唯有希望盈盈快Ｄ養好身體，將來成功做媽咪啦！

＊油價越五十鐵鳥變閉翳，油股頁岩氣拍住好威威＊

　　油價重上５０美金關口，油股首當其衝向前衝，中海油（００８８３）急升超過一成，收升
１４巴仙，報９﹒５２銀，係表現最勁藍戰士；中石油（００８５７）排第二，亦踢高９巴仙，
報６﹒２９銀；中石化（００３８６）就有近７巴仙進帳，收報５﹒４７銀。油價升，可憐一眾
鐵鳥急墜，跌幅２％至３％。
　　油價回升，頁岩氣股自然跟升，華油能源（０１２５１）最勁，大升２１巴仙；巨濤
（０３３０３）亦唔弱，踢高近１９巴仙。安東油服（０３３３７）同中海油服（０２８８３）
齊齊升近１２巴仙。

＊瑞信升評級新奧確係得，能源受追捧無貨好心噏＊

　　燃氣股今日亦都跟隨油股造好，新奧能源（０２６８８）噚日更獲瑞信升評級至「跑贏大市
」同升「他屐」至５４銀，結果今日踢高７巴仙收場；藍戰士昆侖能源（００１３５）抽升８巴
仙，收報６﹒４１銀。中國燃氣（００３８４）同埋華潤燃氣（０１１９３）分別抽升９巴仙同
近７巴仙。
　　呢個星期藉全國首套百萬噸煤間接液化製油投產消息煤炭股造好，今日繼續炒高，藍戰士神
華（０１０８８）大升９巴仙，收復五十天線（１３﹒５６銀左右），收報１３﹒９４銀，唔經
唔覺已經連升５日，期間累升２１巴仙，勁！兗州煤（０１１７１）亦升７巴仙，中煤能源
（０１８９８）就踢高近１２巴仙收場。

＊車仔鬥踩油長汽飆成半，Ａ仔明復賽券商先落鑊＊

　　汽車股今日跟住魚缸大圍向上衝，而且愈升愈有，長汽（０２３３３）今日突然飆起咗近
１５巴仙，收報１０﹒７４銀，愈來愈逼近百天線（１１﹒６１８銀）。街坊華晨
（０１１１４）、比亞迪（０１２１１）同北汽（０１９５８），就有３巴仙至９巴仙升幅。　
　Ａ場休息咗成個星期，聽日終於復賽啦！就喺Ａ場復賽前，一路無聲氣嘅券商佬終場落鑊，海
通證券（０６８３７）就漲近１２巴仙，升破５０天線（１２﹒３７１銀），今日主動買盤達六
成
；而海通國際（００６６５）、中信証券（０６０３０）同中國銀河（０６８８１）齊齊有逾一
成斬穫。

＊昨日急炒上７３６回吐，南海２５０忽然見鑊氣＊

　　中國置業投資（００７３６）噚日（６日）尾段，飆升近８５巴仙後，今日現回吐，急插近
１８巴仙，報０﹒１９８銀。公司就發出不明升因，指唔知道令到股價同成交量變動嘅原因。
　　于品海旗下嘅股份今日又失驚無神大漲，南海（００６８０）今日急升逾逾２６巴仙之後停
賽，公司就話要公布內幕消息。而公司持有六成三股權嘅中國數碼信息（００２５０），今日就
飆起近４６巴仙，報０﹒１３７銀，公司已經發咗不明升因，成為今日升幅最勁嘅魚仔。
　　今日復賽嘅華人飲食（０８２７２）就宣布，公司打算用最多２４００萬收購鹼性水公司，
話咁樣可以為公司提供額外收益，公司會發行可換股債支付，股價今日就踢起近３９巴仙，報
０﹒４３銀，升幅榜跟隨喺中國數碼信息身後。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。