《小傳日記》阿爺鬆一鬆，月底開五中；Ａ仔踩轉油，香江向前衝！

　　《小傳日記》阿爺星期六（１０日）有好消息宣布，決定擴大信貸抵押再貸款試點，雖然已
經有分析話咁樣唔代表阿爺大規模放水，不過Ａ場好友一於少理，今日（１２日）曾經一口氣攻
陷三千三大關高見３３１８，收市都有逾３巴仙進帳報３２８７點。
　　既然Ａ場士氣咁好，香江魚缸當然食住個勢一齊衝喇，埋單抽高２７２點報２２７３０，繼
續收高於五十天線上（２２３８８），國貨佬收漲１３１點報１０５３８。
　　今日好友打勝，成交就有８７２億左右，生意都算唔錯。生發發今日亦逼近二百銀，以接近
全日高位１９９﹒５銀收市，升３％。「五中全會」將會喺２６至２９號召開，如果再有好消息
傳出，香江魚缸隨時衝破二萬三關慶祝添！

＊陸發發分拆炒起來慶祝，渣打追落後一點也不木＊

　　神州電訊商一朝早開波就飛起咗，因為傳鐵塔公司得到國新控股用百億人仔入股，中電信
（００７２８）、聯通（００７６２）同中蠕動（００９４１）分別持有鐵塔公司２７﹒９巴仙
、２８﹒１巴仙同３８巴仙股權，三者今日分別錄得逾４巴仙、逾５巴仙同近２巴仙升幅。
　　打算分拆中汕物業介紹形式上市嘅中海外（００６８８），今個月２３日掛牌，股價今日就
飛起近４巴仙，報２５﹒８５銀，認真威風。
　　之前落後好多嘅渣打（０２８８８）都唔執輸，踢起逾１巴仙，不過公司就打算重組，大約
會炒大約千名高層，股價最終收報９１﹒３銀，離１００銀大關又行近咗；不過股價連飛８日，
已經累升逾２５巴仙。

＊Ａ仔好靚仔ＥＴＦ唔曳，一眾券商股今日甚巴閉＊

　　隨住Ａ場發力向上衝，相關嘅ＥＴＦ都表現出色；南方Ａ５０（０２８２２）踢起逾４巴仙
，報１２﹒３６銀，而海通滬深三百（０２８１１）、Ｘ安碩Ａ５０（０２８２３）同華夏滬深
三百（０３１８８）都有３巴仙至逾５巴仙進賬。
　　跟隨Ａ場造好嘅當然仲有券商，９月份淨利潤按月下跌約七成嘅中州證券（０１３７５），
今日仲可以踢起逾４巴仙，報４﹒２８銀。華泰六八八六（０６８８６）（滬：６０１６８８）
Ａ股踢起近９巴仙，Ｈ股就有逾３巴仙升幅，收報１７﹒０８銀。街坊海通證券
（０６８３７）、中信証券（０６０３０）分別飛起近４巴仙同近５巴仙。至於生發發
（００３８８）就試上２００銀，不過最終只係踢起近３巴仙，報１９９﹒５銀。

＊６９９抵讚缸邊飆返轉，環保車有景電池拍拍掌＊

　　神州網上租車風波擾攘咗好耐，上星期終於等到綠燈，交通部宣布要對網上的士發牌監管；
終於可以光明正大落場玩，神州租車（００６９９）主要股東Ｇｒａｎｄ　Ｕｎｉｏｎ即轉讓１
億股畀優車上車。加上今日一開市，間間大行都讚神州租車抵得諗，結果全日輕鬆衝前１４巴仙
，報１３﹒４８銀。
　　阿爺繼續幫電動砵砵車充電，北京、天津同河北合作建成公用充電網絡，到時就唔驚中途無
電被困路中喇。比亞迪（０１２１１）聽到消息，一改頹勢全力開動，全日飛馳５巴仙，報
４６﹒２銀，拋離其他兄弟。阿爺一招接一招，再推出汽車電池規範第一批目錄，電池股圍埋跳
隻開心舞，光宇國際（０１０４３）最受刺激，飛升１９巴仙，報３﹒１１銀，泰坦
（０２１８８）都拍拍手，抽高９巴仙收報１﹒４銀，比亞迪電子（００２８５）同樣跑前７巴
仙，報５﹒５５銀。

＊半新股捱沽你掟我又掟，麥迪森續升散場漲一成＊

　　魚缸表現咁靚仔，半新丁反而坐跳樓機，豐展（０８２４８）遭洗倉，唔見咗７７個巴仙，
報０﹒４９銀，應力控股（０８１４１）更慘，本來彈高３６巴仙，點知未過幾耐就玩深潛，跌
低４９巴仙，得番０﹒９８銀，泰邦（０８３２７）就全日瀉３６巴仙，跌剩０﹒５１銀。三個
患難兄弟齊齊創上市新低，穩守跌幅榜前三位。
　　ＲＥＦ（０８１７７）收市插低１１巴仙，報０﹒８２銀，坐慣過山車嘅立基工程
（０８３６９）就同大家一齊向下跑，低走２３巴仙，跌幅榜排第六，收市報０﹒６１銀。
　　半新丁又唔係個個都咁不濟，麥迪森酒業（０８０５７）落場三日愈升愈有，今日飛升１０
巴仙，報８﹒０４銀，最高見８﹒０５銀創新高。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。