《小傳日記》油價急跌又急上，香江跟勢漲一漲！

　　《小傳日記》花旗魚缸畀油價牽著鼻子走，噚晚（３日）油價又嚟轉大反擊，急升８巴仙去
到３２﹒２８美金，道指就跟勢抽高１８３點收１６３３６。不過標普同納指都叨唔到光，兩者
都無咩反應，呆呆收報１９１２點及４５０４點。
　　油價漲，花旗市升，香江就好開心，恆指噚日腳震瞓低４５５點後，今朝（４日）跟外圍高
開１９８點重上萬九關，最多仲升近３５０點添：不過２０天線（約１９４０３）阻力太大，最
終埋單得番１９１點落袋收１９１８３，再一次歸還十天線（１９２４３）。國指見到Ａ場收升
１﹒５巴仙向二千八進發，都跟住踢高１１６點收市報７０７４。
　　不過過埋聽日（５日），羊年魚缸就正式收爐，準備迎接猴年。一連五日長假前，愈來愈多
缸友提早離場，魚缸全日成交只得６５４億銀，少咗１７巴仙。

＊臨近長假期成交奀豬豬，壽仔與渣打再被踩多轉＊

　　自從熊仔出沒，魚缸「大時代」亦一去不復返，法巴更加將今年嘅日均成交預測降到８３０
億，生發發（００３８８）自然大受影響，目標價慘遭大劈６３巴仙至１３２﹒６３銀，評級亦
下調降至「減持」。生發發今日曾經行前逾１巴仙，最終卻倒跌唔夠１巴仙，報１６５﹒５銀。
　　錢莊世界有好多消息，渣打（０２８８８）一沉百踩，畀花旗削目標２８巴仙至５２銀，話
重組會為收入帶來壓力，全日腳軟近１巴仙報４８﹒３５銀。
　　有傳國壽（０２６２８）、保誠（０２３７８）、友邦（０１２９９）、大都會人壽等等都
打算爭大新金融（００４４０）嘅壽險業務。大新金融應聲飆前逾７巴仙，報３７﹒９５銀；大
新銀行（０２３５６）亦衝前逾２巴仙，報１２﹒２６銀。友邦獲一眾大行力撐，認為銀聯設限
影響唔大，今日都反彈番逾２巴仙，埋單３９﹒９銀。之不過，壽仔就繼續頭耷耷再創新低，收
市唔見１﹒３％。
　　東亞（０００２３）尾市衝高４巴仙收２１﹒８銀，原來持有超過７巴仙股權嘅對沖基金
Ｅｌｌｉｏｔｔ呼籲銀行股東溢價賣盤，仲話每股值６０蚊添。請鼓掌！

＊法巴劈目標生發發略軟，寶哥哥靚爆無貨有點酸＊

　　油價似足過山車，噚日結束兩連跌，紐約期油更跳高８巴仙，皆因戰鬥民族話肯同油組會談
，減產希望重現。「三油桶」即刻飛起，中石油（００８５７）踢高逾５巴仙，報４﹒６１銀，
仲係最好打藍戰士；中海油（００８８３）同中石化（００３８６）企高逾６同近４巴仙，報
７﹒７同４﹒３４銀。跟佢哋搵食嘅油服佬都唔執輸，百勤油服（０２１７８）彈起４巴仙，報
０﹒５２銀；巨濤海洋（０３３０３）同宏華集團（００１９６）亦齊齊收穫３至近６巴仙。
　　據報，鐵路總公司下調煤炭運價，每噸公里降低１分人仔，即係煤炭企業全年可以慳返物流
費用１００億。黃昏行業遇上雪中送炭，煤炭佬都好感動，神華（０１０８８）跳起逾３巴仙報
１１﹒２８銀；中煤（０１８９８）、恆鼎實業（０１３９３）更飛高近７巴仙同逾一成。

＊油股開心番油服跟著笑，煤炭齊彈起阿爺夠關照＊

　　猴年將至，一眾地產佬屏息以待，展開新春新盤戰，再加上孖屐憧憬美聯儲今年將會減慢加
息步伐，連紐約聯邦儲備銀行總裁杜德利都話要檢討加息問題，地產佬鬆咗一口氣，恆地
（０００１２）興奮向前超過１巴仙，報４０﹒０５銀；恆隆地產（００１０１）同九倉
（００００４）最招積，大步跨前超過２巴仙，新地（０００１６）都有接近２巴仙嘅進帳，長
實（０１１１３）尾市獨憔悴，軟報３９﹒８銀。
　　領展（００８２３）就有Ｄ古怪，錄得多手大手交易，加加埋埋超過十億銀，散場仲要無晒
升幅，逆市微跌０﹒６巴仙收４３銀。究竟邊位大戶咁心急掟貨走人呢？
　　花旗國經濟數據飄忽，時好時壞，好多人寧願買金避險，金價升吓升吓已經到咗三個月高位
喇，一班黃金相關股都有資金力撐。紫金礦業（０２８９９）掘金又掘礦，撞正商品價格高飛，
興奮沖天上逾８巴仙，報１﹒８５銀；恆興（０２３０３）不甘落後，跳上約５巴仙，招金礦業
（０１８１８）同中國黃金（０２０９９）就踏前咗超過３巴仙。

＊金股光燦燦領展有古怪，廣汽數據靚缸邊跑得快＊

　　廣汽（０２２３８）上個月賣咗約１３萬架砵砵車，按年多近３６巴仙，產量更加大增四成
七至近１４萬架，德銀見到條數幾靚仔就升佢盈測，更將目標價由８﹒６銀升至８﹒８５銀，維
持「掃貨」評級。結果今日向前衝７巴仙，收報７﹒０５銀。
　　明華科技（０８３０１）停牌近兩年後今日復牌，公司完成發行內資股，淨籌８２３２萬銀
，升幅嚇親人，急升７﹒５倍，最多更加試過狂升超過１４倍！
　　哈行（０６１３８）就笑唔出啦，食完飯之後錄得一億銀大手，股價就逆市向下碌低近４巴
仙，全日低位１﹒８９銀收市，創埋新低，明顯跑輸同業，慘。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。