《小傳日記》花旗棄加息，東瀛拒出擊；香江喜又悲，好友冇心機！

　　《小傳日記》花旗聯儲局一如所料維持利率不變，又放風聲話如果經濟明顯放緩，就唔急於
收緊貨幣政策，但６月仍然有可能加息。道指反應唔大，收漲５１點；但香江魚缸就大受刺激，
趁住期指結算日，大市高開１２７點報２１４８８，無耐更開盡馬力，一度直飆２９２點高見
２１６５４，係年初以來高位。
　　不過踏入１１點，東瀛央行出乎意料決定按兵不動，唔擴大買債規模，即係放水希望幻滅。
淡友乘機瘋狂出擊，港股由原先升近三百點，短短７分鐘內升幅全銷，最慘嗰陣更唔見咗成過百
點。好在好友站穩陣腳後反擊，助港股半日拗腰彈返１０５點。午後魚缸開始冇乜力，變化唔大
，升幅多數時間唔夠１００點，全日僅漲２６點收２１３８８，收復十天線。
　　國貨佬就收升２３點報９０６０。全日成交亦得６７８億銀，略比上日多２３巴仙。

＊早段升三百以為會好發，十一點過後卻被淡友殺＊

　　花旗國唔加息嘅消息傳嚟，最興奮嘅莫過於一班本地磚頭佬，齊齊成為今日孖屐支柱。信置
（０００８３）衝前近２巴仙，報１２﹒４８銀。長實（０１１１３）、新世界（０００１７）
都行前約１巴仙，報５４﹒０５同７﹒８８銀。
　　香江息口如無意外亦會維持不變。一眾港銀腳軟軟；而渣打（０２８８８）僅企穩，收
６２﹒７５銀。匯證就讚渣打首季成本表現同減值幅度唔錯，可惜收入依然疲弱，大升目標２２
巴仙至５５０便士（約６２港銀）。
　　內地錢莊陸續放榜，信行（００９９８）率先公布首季賺１１２億人幣仔多２﹒５巴仙，更
獲瑞信上調目標，但臨尾無升跌。建行（００９３９）聽日先出成績，偷步企高近１巴仙，埋單
５﹒０７銀。

＊花旗不加息地主好招積，港銀腳軟軟賭仔欠動力＊

　　銀娛（０００２７）遭高盛微降「他屐」至３０銀，並指銀娛上季業績基本符預期。未知係
咪畀唔到驚喜孖屐，銀娛績後連跣兩日，今日唔見近３巴仙，收報２６﹒９銀。同業新濠國際
（００２００）同美高梅（０２２８２）亦碌低近１至３巴仙。金沙（０１９２８）就好啲，有
唔夠１巴仙進帳。
　　中電信（００７２８）首季多賺逾１巴仙至約５１億銀人仔。缸友們都肯收貨，助中電信企
高近１巴仙，收報３﹒８５銀。聯通（００７６２）慘啲，唔見逾１巴仙，報９﹒２４銀。中移
動（００９４１）就偏軟，收報９１﹒４５銀。
　　馬鋼（００３２３）首季蝕少好多，蝕３﹒５億銀人仔，比上年要蝕成６億銀已經有「進步
」，難怪今日抽高咗近８巴仙，收報１﹒８４銀。

＊馬鋼蝕少咗粉絲即起舞，瑞信來踐踏中車有點惱＊

　　廣深鐵路（００５２５）首季多賺近２５巴仙至３﹒２７億人仔，成績表靚仔令股價踢高逾
６巴仙，收報３﹒６９銀。中車（０１７６６）被瑞信批評成績表差過預期，削「他屐」至
６﹒２銀，維持「遜於大市」，中車逆市偏軟近１巴仙，收報７﹒６２銀。
　　廣汽（０２２３８）多賺２﹒６倍至１９﹒３億銀人仔，符合早前發盈喜預期嘅幅度。無甚
驚喜下，今日僅踢高近１巴仙，收報８﹒９７銀。街坊北汽（０１９５８）獲瑞信升「他屐」至
７銀，幫助北汽斬獲逾６巴仙，收報６﹒３２銀。長汽（０２３３３）同東風（００４８９）就
要碌低逾１至２巴仙。

＊衍生甚波動收市歸平淡，思博連日瀉永暉繼續彈＊

　　衍生（０６８９３）向豐盛（００６０７）及閰志發股，籌得資金主要拎嚟同豐盛搞醫療合
營。衍生試過炒高近１４％，又試過碌低一成，臨尾就無升跌。豐盛就有逾２巴仙落袋。閰志同
時係卓爾（０２０９８）同中國基建港口（０８２３３）「揸ＦＩＴ人」，兩隻今日分別企前逾
２巴仙至近８仙。
　　永暉（０１７３３）今日再有逾２６巴仙落袋，收報０﹒０７２銀。周一（２５日）復賽至
今，累計有逾３８巴仙升幅。
　　思博（０８３１９）就悲慘，連瀉三日蒸發逾六成後，今日再插近３９巴仙，收報０﹒７５
銀，創上市新低。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。