《小傳日記》話咁快三日長假又完咗，缸外開始愈來愈熱，不過缸內就未有起色，喺傳統「
五窮月」第一個交易日就舉白旗，皆因我哋放假期間，阿爺已經宣布４月份官方製造業ＰＭＩ差
過預期，較３月份下跌０﹒１個百分點至５０﹒１，搞到今朝（３日）恆指開市無耐就愈跌愈多
，二萬一眨吓眼就被攻陷，連廿天線（２０９９５）都失守，走勢明顯轉弱。
雖然數據曳，但Ａ場表現唔錯，一度試衝三千大關，收升２９９２點，可惜幫唔到香江打強
心針，恆指尾市仲跌幅擴大至３９０點收２０６７６，下試上升軌道底部，形勢有Ｄ唔對路，而
國指就碌低１９０點收８７４８。雖然全日成交有７７５億銀，但如果唔計財險（０２３２８）
被掟走近百億銀貨，魚缸實際約有６７８億銀左右，都未算好大沽壓。
＊你沽我又沽果然Ｓｅｌｌ ｉｎ Ｍａｙ，避險捧兩電黃金股在飛＊
大笨象（００００５）中午派成績表，首季稅前純利按季由虧轉盈，但按年跌近１４巴仙，
已經係好過預期，純利４３億美金，派１０美仙。缸友都好滿意份成績表，午後即刻倒升，但大
摩踩一踩尾市又腳軟近１巴仙，收報５１﹒５銀。阿仔恆生（０００１１）就宣布派１﹒１銀第
一次中期息，全日腳軟逾１巴仙，收報１３９銀。生發發（００３８８）今日除淨２﹒８７銀股
息，缸友見有份收息後就走人，股價碌低３巴仙，收報１８７﹒５銀。
呢排日圓金價升到火箭咁，缸友們避險情緒好高漲，公用股亦水漲船高；電能
（００００６）同中電（００００２）齊齊升逾１巴仙，各報７４﹒８銀同７２﹒７銀，係最叻
兩位藍戰士。黃金股就由中國黃金（０２０９９）領軍，跳高８巴仙收１５﹒０２銀。
＊首季勝預期大象曾倒升，ＡＩＧ掟貨財險頭擰擰＊
市場傳出風聲，話花旗國ＡＩＧ大手減持財險（０２３２８）部分股份，套現近９７億銀資
金，每股作價１３﹒０８銀，今朝早財險就錄得７﹒４億股市前交易，股價大幅跌低近６巴仙，
報１３﹒３６銀，成日全日第二弱嘅國貨佬。街坊人保（０１３３９）就公布，今年首季三間子
公司保費收入大約１６９２億銀人仔，但孖屐唔多受落，事關人保同魚缸一齊走低，趴低咗近５
巴仙，報２﹒９９銀。
雖然神州ＰＭＩ數據曳，不過Ａ場仍然飛得起，香江呢邊相關ＥＴＦ點會執輸？華夏滬深三
百（０３１８８）、南方Ａ５０（０２８２２）、ＸＤＢ滬深三百（０３０４９）分別有逾１巴
仙、近１巴仙同近２巴仙落袋，恭喜晒！
＊Ａ仔好靚仔ＥＴＦ齊揚，濠賭與零售有升有輕傷＊
馬交喺放假期間公布咗４月賭收，有１７３億馬交紙按年跌近一成，但已經好過預期跌一成
至一成六，但銀娛（０００２７）先升後跌１巴仙，收報２５﹒９銀；金沙（０１９２８）升近
１巴仙，埋單２８銀。
另外黃金周祖國訪港旅客，出乎意料比上年多一成，當中自由行多咗近１３巴仙。ＣＹ今早
回應傳聞，指無意同埋無準備回復深圳非戶籍居民一簽多行。但係卓悅（００６５３）都踢高逾
３巴仙，報０﹒３３銀，同業莎莎（００１７８）就平手收２﹒３８銀。
＊供應勢急增磚頭齊腳軟，魏則西事件莆田股大跌＊
早前運輸及房屋局公布最新數據，截至３月份為止，香江一手私人住宅單位供應於未來３至
４年內將增加５０００伙至９﹒２萬伙，創２００４年９月紀錄以來最高，唔知會唔會幫到缸友
上車？不過，持有本地磚頭股嘅缸友就選擇先落車，長實（０１１１３）、嘉華（００１７３）
同新世界（０００１７），分別錄得逾３巴仙至近５巴仙跌幅，慘！
華夏醫療（０８１４３）涉捲入「魏則西事件」，今日一度插兩成，收市仍唔見逾１３巴仙
，報０﹒５３銀。原來內地有位２１歲學生魏則西患上罕見病，喺百度搵到武警北京總隊第二醫
院，喺接受不當治療後去世，仲要使咗足足廿萬人仔醫療費用，慘！亦都因為咁百度嘅競價排名
備受質疑，被當局調查緊。而事件中嘅醫院原來由民營醫療「莆田系」公司承包。據報指「莆田
系」旗下相關股除咗華夏醫療外，萬嘉集團（００４０１）同和美醫療（０１５０９）都榜上有
名，前者只錄得４宗成交乾跌近４巴仙，後者就唔見逾３巴仙。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
