《小傳日記》各地魚缸悶咗咁耐，終於有番Ｄ起色喇！噚晚（２４日）花旗魚缸喺金融同科
技股領軍下，道指大幅飆升２１３點或１﹒２巴仙，報１７７０６點，納指更跑前２巴仙，收報
４８６１點，創３個月最大升幅。勁！
雖然Ａ場仲未叨到光，繼續喺二千八關水平整固，收２８１９，但花旗嗰邊嘅旺氣，足以令
香江今朝（２５日）開波急急跳高３２６點報２０１５６。令好友雀躍嘅係，高開三百幾點只係
全日最低位，之後仲愈升愈起勁，喺祖國移動（００９４１）、ＱＱ（００７００），大象
（００００５）等重磅藍戰士聯手下，恆指埋單足足有５３７點升幅，收２０３６８，衝破多條
平均線，國指都有２２９點進帳，收報８５３６。難得打破悶局，成交當堂急增近四成至６２０
億銀。不過相對真正旺市嘅成交，其實都唔未算多，缸友小心「死貓彈」呀！
＊全球皆升市Ａ仔乏反應，香江漲五百成交略嫌靜＊
魚缸突然炒上，金融界魚仔自然吃香。建行（００９３９）同中信銀行（００９９８）炒高
近３至４巴仙，收報４﹒８６銀及４﹒６１銀。工行（０１３９８）同中行（０３９８８）都有
逾３巴仙進帳，收報４﹒０２銀及３﹒１３銀，皆大歡喜！
花旗指ＱＱ為神州重視嘅研發公司，叫大家齊齊「掃貨」。ＱＱ踢高逾２巴仙，收報
１６４﹒５銀。其他大隻藍戰士亦紛紛報捷，大象氣勢如虹，急急企高近４巴仙，收５０﹒３５
銀，友邦（０１２９９）亦有逾３巴仙收穫，收報４４﹒３銀。三隻加埋合共為恆指貢獻咗
１８３點。厲害！
＊愈大愈美麗內銀齊跳舞，煤企將提價股仔高高高＊
盛傳神州四大煤企諗住下月漲價，連花旗都出口指阿爺下令煤礦減產，令產能削減高過需求
下跌，嚟緊幾季煤價有望回升添！中煤能源（０１８９８）即刻衝前逾９巴仙，收報３﹒３１銀
。神華（０１０８８）都有約６巴仙收穫，更加係最叻仔藍戰士。至於班發電廠就陰功啲，大唐
發電（００９９１）同華能國際（００９０２）大升市下碌低唔夠１巴仙至近３巴仙。
油價終於止跌回升，油佬今日走勢亦相當堅挺，中石油（００８５７）踢高近４巴仙，收報
５﹒３３銀。中石化（００３８６）同中海油（００８８３）分別亦斬獲近４巴仙，收報
５﹒２５銀及９﹒１８銀。不過，鐵鳥就頭擰擰，隻７５３挫逾２％。
＊油價終回升油股也精靈，地主亦有景鐵鳥頭擰擰＊
香江地產佬無懼花旗吹加息風，股價向前走。誠哥旗下長實地產（０１１１３）噚日用接近
３０００萬銀回購股份。另外，今日亦見到隻股有好幾手大額成交，股價收市跨出超過３巴仙至
４７﹒７銀。街坊恆地（０００１２）衝上逾３巴仙，報４５﹒６５銀，新世界
（００００１７）亦踏前超過２巴仙，報７﹒２１銀，會德豐（０００２０）表現最好，急升接
近４巴仙至３３﹒５銀。
中電信（００７２８）今日開股東會，董事長就話，同聯通（００７６２）只係合作關係，
阿爺暫時有指示要兩強合併，結果中電信仍然邁出近３巴仙，報３﹒７１銀，聯通就上超過２巴
仙至８﹒３９銀，同行祖國移動作為魚缸大隻佬，都大幅前移近４巴仙，去到８７﹒２銀收市。
＊匹克擬私有踢高來飲勝，霸王贏官司再漲逾三成＊
匹克（０１９６８）控股股東初步考慮私有化，大和指公司上年６月以每股２﹒４８銀配股
，話可能係私有化底價，維持「買貨」評級，目標價２﹒７銀，匹克復牌後股價急彈１４巴仙，
收報２﹒１９銀。
霸王（０１３３８）告贏壹週刊後壹週刊上訴，霸王噚日踢高１８巴仙後，今日再急升三成
半，收報０﹒６３銀，係最勁個股；壹傳媒（００２８２）就跌低１巴仙。
東北虎藥業（０８１９７）打算配售新Ｈ股同內資股籌營運金，雖然無講配售價，但股價急
插２１巴仙，埋單１﹒１１銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
