《小傳日記》美聯儲局主席耶倫今日（２７日）將會喺哈佛大學演講，花旗缸友噚晚
（２６日）已經「離場」唞唞，準備洗耳恭聽有無「息魔」行蹤。道指連升兩日後，噚晚微跌
２３點，收報１７８２８。正當大家以為香江魚缸都唔會有咩大驚喜，而恆指今朝只係輕微高開
２７點後大部分時間都窄幅上落之際，下半場卻忽然甚有「睇頭」！
話說孖屐又傳出「深港通」可能最快下星期公布，憧憬「七一回歸日」通車，好友梗係唔會
錯過機會，推高股王ＱＱ（００７００）夾淡倉喇！ＱＱ強勢破頂見１７１﹒８銀，埋單仍有近
５仙進帳，單拖貢獻１０１點；再加上祖國錢莊追落後，恆指埋單攀高１７９點報２０５７６，
收復五十天線（約２０５５８），國指就收升６９點報８５９５。
只可惜，成交都仲係奀豬豬，全日約有５５５億銀左右；再一次成交未配合嘅升市，小心淡
友喺下星期一（３０日）期指結算日反擊呀！
＊上午悶悶地午後突起飛，ＱＱ生發發今天齊增肥＊
據報「港股通」擴容好大機會會同「深港通」通車一齊宣布，有券商更加憧憬下星期會公布
「深港通」消息，喺「七一」通車添！不過生發發（００３８８）回應話仲未有時間表，就算正
式公布後，兩地孖屐都要３至４個月準備。但缸友們一於係未出發先興奮，齊齊入貨推高生發發
，最終衝前逾２巴仙，埋單１８２﹒３銀。
有分析話，ＱＱ估值平絕深圳上市同業，係「深港通」最受惠股！難怪今日愈升愈有，有近
５巴仙收成，報１７１﹒２銀，成為最叻藍戰士！
超人一號（００００１）都冇執輸，彈高近１巴仙，報９０﹒３５銀兼收復廿天線。之前野
村就話，孖屐望實米字國「脫歐」公投、意大利３同Ｗｉｎｄ合併交易結果；雖然短期走勢唔明
朗，但就帶嚟買入機會。
＊寶信與東風缸邊踩行油，福布斯鰲頭工建農高收＊
寶信汽車（０１２９３）先前由廣匯汽車（滬﹕６００２９７）提自願性現金要約，買最多
七成半股權，依家要約先決條件已經獲滿足，結果飛前６巴仙，報４﹒９４銀。而富瑞話東風
（００４８９）已經反映哂不利消息，估值吸引，降目標至１０﹒７銀，但畀「買入」評級，東
風亦應聲駛前逾２巴仙，報８﹒２５銀。
《福布斯》早前公布全球２０００強企業綜合排名，工行（０１３９８）、建行
（００９３９）同農行（０１２８８）霸佔頭三位。工行、建行踏前１至２巴仙，報４﹒０８同
４﹒９４銀；農行則微微企高近１巴仙，報２﹒８銀。
＊師傅成績曳粉絲說分手，聯想傷見紅缸友眉頭皺＊
康師傅（００３２２）派首季成績表，盈利大插４６巴仙，缸友好激心紛紛離場，全日大插
超過一成，報７﹒２１銀，仲登上個股跌幅榜第七位，連累埋同行旺旺（００１５１），跣走逾
３巴仙，收５﹒４７銀。
聯想（００９９２）七年以來首次全年成績見紅，好傷啊！摩通、美銀美林、瑞銀、大和、
高盛、野村同花旗手牽手，齊齊削聯想目標價，結果全日無咗接近４巴仙，報４﹒７９銀。
半新丁各自分頭行，創新電子（０８３４６）興奮爆升近３５巴仙，報５﹒２８銀，創上市
新高；保發（０３３２６）同結好金融（０１４６９）都彈高超過１４巴仙及近１２巴仙，分別
報３﹒５３銀及１﹒１４銀；至於雅迪（０１５８５）同思博系統（０８３１９）就分別跌低超
過４巴仙同接近３巴仙，報１﹒４銀同０﹒２３３銀。
＊半新丁異動創新最高興，８６１東江跳起甚振奮＊
疏浚環保（００８７１）踢高近５巴仙，報１﹒１４銀，但唔計開賽前兩手共５６００萬股
嘅市前交易，全日成交就只得約２３０萬股。
神州控股（００８６１）再飆前１７巴仙，報６﹒５８銀，４日間大嗱嗱袋咗近２６巴仙。
先排有報道話佢畀廣電運通（深：００２１５２）經「滬港通」「敵意收購」，截至上星期五
（２０日）已持股達１１巴仙，超越主席郭為成為第一大獨立股東。
東江環保（００８９５）控股股東兼董事長張維仰打算引入一間大型國企做戰略投資者，復
出缸湖即跳起逾７巴仙，收１２﹒３２銀。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
