《小傳日記》好友結算日前夕，拋開脫歐欲反擊？！

　　《小傳日記》噚晚（２７日）歐美魚缸繼續受「脫歐」大亂所困擾，道指又急插２６０點收
報１７１４０，歐洲三大股指再蒸發２至３巴仙，好友今次真係元氣大傷，最慘係唔知幾時先可
以「止血」。家陣標普、惠譽都排隊調低米字國主權評級至「ＡＡ」，英鎊一度再創３１年新低
，總之「沒有最亂，只有更亂」，慘。
　　外圍弱過弱煲，香江魚缸今朝（２８日）都惟有無奈捱沽。恆指一開市又穿二萬關，低開
３２８點報１９８９８。好彩，Ａ場有番Ｄ力，差唔多以近全日高位收市，升０﹒６巴仙報
２９１２，而英鎊終於展開反擊，係公投以來第一次喺亞洲時段攀升，加上歐洲場開市升返約
２％，結果恆指尾市跌少好多，結果喺期指結算日前夕有番Ｄ曙光，埋單只係唔見５４點收
２０１７２，國指就走低３１點收８５３６，成交逾６５８億銀。

＊脫歐後遺症大象喊不停，思捷炒夥計低位顯生機＊

　　米字國脫歐後遺症持續，大笨象（００００５）遭摩通削目標價至４６銀，今日偏軟走低近
１巴仙，收報４６﹒３５銀。渣打（０２８８８）亦跌低逾２巴仙，收報５５﹒９５銀，不過傷
勢已經比之前輕架喇。街坊保誠（０２３７８）則唔見咗逾３巴仙。超人一號（００００１）繼
續頭痛，再跣低近２巴仙，收報８２銀，８０蚊大關有Ｄ危。電能（００００６）及長建
（０１０３８）分別瞓低近１巴仙至３巴仙。
　　思捷（００３３０）於德國計劃裁減一成夥計，過去兩日急跌近９巴仙後現反彈逾３巴仙，
收報５﹒６５銀。利豐（００４９４）今朝低見３﹒３１銀創七年半新低後有買盤追入，最尾踢
高近７巴仙，收報３﹒５８銀，仲係最勁藍戰士。

＊Ａ場二千九平保險失守，中移價企穩領展再領放＊

　　Ａ場今日造好重上二千九大關之上，平保（０２３１８）今朝一度趴低近３巴仙，好彩臨尾
都收復今朝失地，全日計打個和無升跌。其他街坊就無咁好彩，財險（０２３２８）末期息
３０﹒４分明日除淨，今日仍要再趴低近２巴仙，收報１２﹒３６銀。太平（００９６６）則唔
見約１巴仙，收報１３﹒６４銀。
　　期指結算前夕，中移動（００９４１）繼噚日踢高約２巴仙後，今朝亦曾試過企高近１巴仙
，不過之後升幅無晒，全日無變化，收報８５﹒５銀。相對地，領展（００８２３）表現較為硬
淨，尾市升幅擴大至漲逾１巴仙，收報５２﹒４銀，繼續創上市新高，勁！

＊屐飛再低飛全日硬著陸，比迪有大計發力向前衝＊

　　屐飛（００２９３）自從上星期五（２４日）米字國脫歐令匯率波動，股價一路低飛，今日
再跌多近３巴仙硬著陸，報１０﹒８２銀，瑞銀預測上半年純利大削一半，大和就下調國體啊目
標價近一成至１２銀。
　　比亞迪（０１２１１）野心勃勃，唔單止宣布電動砵砵車全年銷售目標要達到１２萬架，仲
要進軍單軌交通孖屐，董事長話潛在孖屐規模係３萬億人仔！目標遠大缸友畀個ｌｉｋｅ，全日
行前超過２巴仙，報４５﹒９銀。
　　人仔愈嚟愈平，脫歐之後衰多兩錢重，大和話，原來馬交賭仔收入同人仔走勢好有關係，所
以繼續維持賭仔負面前景，首選賣出嘅係永利馬交（０１１２８），就算有新渡假村開張都無用
，全日無咗近３巴仙至１０﹒９４銀，「金銀二獸」金沙（０１９２８）、銀娛（０００２７）
一齊走低約２巴仙。

＊小甜甜靚殼傾賣盤值博？西泥突崩潰暴跌好大鑊＊

　　美捷匯（０１３８９）二送三紅股酬謝各位股東，今日除權，一開市就爆升近９５巴仙至
４﹒１９銀，不過升幅即刻收窄，最後仍然飆上近３４巴仙，報２﹒８８銀。
　　「小甜甜」概念股丹楓（００２７１）終於有賣盤消息，大股東獲洽購持股，缸友拍手掌支
持，半日復牌狂跑上超過三成，報１﹒９３銀。
　　夏天到，大家都要努力運動，兩隻體品股心情唔錯，齊齊衝線，安踏（０２０２０）逆市跨
出超過３巴仙，收報１４﹒９８銀，李寧（０２３３１）攞銀牌，揚近２巴仙，報３﹒７１銀。
　　孖屐靜靜地，突然殺出一隻西部水泥（０２２３３）尾盤跳崖，全日無咗３３巴仙至
１﹒０７銀，之前海螺（００９１４）打算收購西泥，莫非又有新消息？請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。