《小傳日記》「脫歐」咁耐，全球魚缸歐元英鎊瀉足咁耐，細膽Ｄ嘅缸友都嚇走得七七八八
。而噚日（２８日）開始，已經有唔少缸友趁住半年結之前，忍唔住入市粉飾吓，噚日港股已似
「跌唔落」。外圍方面，道指成功反彈２６９點收１７４０９，英法德就收復２至３巴仙失地，
總算止一止血。
外圍好，香江亦好！是日期指結算，恆指先試水溫高開４４點報２０２１７後，再加埋今日
係期指結算日，中移動（００９４１）領軍下，恆指好快就「嘭嘭聲」升到去２００幾點，收復
番百天線（約２０２６８）。下半場一班祖國錢莊加入大軍，恆指連十天線（２０４１６）都攻
破埋，最後埋單有２６３點落袋，終止三連跌；國指亦輕輕踢高３５點，收報８５７１。
好友成功反擊，不過成交都唔係好多，全日有近６３６億銀；但都係好開始，為「七翻身」
鋪路！
＊臨近半年結好友玩粉飾，衝擊應未完有食趁快食＊
自從米字國同歐洲講分手之後，超人一號（００００１）同長建（０１０３８）就攬住一齊
跌足咁多日，可能缸友都覺得超賣，今朝終於入市掃貨，超人一號仲錄得巨額大手添！埋單計，
兩個都踢高逾１巴仙，收８２﹒８５及６５﹒７銀。
雖然麥格理降電能（００００６）未來３年盈測５巴仙，再下調埋目標價以反映英鎊波動因
素，但都無阻缸友入貨作避險之用，結果不跌反升逾１巴仙，讚。其實誠哥最近先接受《彭博》
電視訪問派晒定心丸，話仲未有計劃退休，話就算旗下王國無咗佢，仍然可以生存，業務一定會
向前，果然成功穩定缸友軍心！
另一方面，高盛將大象（００００５）剔出亞太區確信買入名單，目標價削到５７銀，好慘
，不過好彩英鎊歐元反彈，令大象同渣打（０２８８８）今日都有進帳，兩者一齊升起１至２巴
仙，分別報４６﹒９５同５７銀。另一邊廂，本地薑東亞（０００２３）已開始放售卓佳程序，
亦飛起逾３巴仙，報２９﹒１銀。
＊息魔行慢了房託掩嘴笑，高息公用股表現一樣俏＊
呢排魚缸咁大風浪，缸友都希望可以泊到穩陣嘅碼頭避一避，於是幾隻收息股就成為孖屐熱
捧嘅焦點。其中畀瑞信上調評級嘅領展（００８２３），連升三日之後今日繼續破頂，一度高見
５４﹒２銀，埋單仍爆上３巴仙，報５３﹒９５銀，勁！不過表現咁突出唔單止缸友留意到，連
ＣＹ嘅目光都吸引埋！ＣＹ批評領展只追求收入，應該要有社會責任，結果惹嚟公司今日霸氣反
擊，話公司唔係地產商，政府喜歡的話歡迎回購，夠霸氣！
破頂嘅又唔單止領展嘅，港鐵（０００６６）同中電（００００２）都加入破頂之列，兩者
埋單計飛起逾１同近４巴仙，分別報３８﹒６５同７９﹒２５銀。本地磚頭代表之一嘅九倉
（００００４）亦都成為受捧對象，走上近２巴仙，報４６﹒８銀，旺！
望住香江大隻佬跑出，中資大隻佬都唔執輸，早排畀麥格理唱好嘅祖國移動（００９４１）
話預計年底４Ｇ基站會超過１４０萬個，４Ｇ用戶超過５億，今日企得十分硬淨，穩步飄起近３
巴仙，埋單計收報８７﹒７銀。
＊中移做領軍升得好開心，西泥遭洗倉休戰仍腳震＊
西部水泥（０２２３３）噚日慘遭洗倉一度急瀉４６巴仙，今朝突然休戰，話同賣盤畀安徽
海螺（００９１４）件事有關。有指單交易拖咗成半年都未有細則公布，或者有變卦。安徽海螺
就一於少理，衝前逾４巴仙，報１８﹒１４銀。
萬達商業（０３６９９）之前提出以每股５２﹒８銀進行私有化，但傳出第六大投資者
ＡＰＧ認為作價唔吸引，加上持股逾６巴仙嘅貝萊德可能因要約而蝕大錢，缸友擔心有多過一成
股東反對而令單「刁」告吹。萬達應聲趴低逾６巴仙，得返４６﹒１銀。
恆盛地產（００８４５）早排都話控股股東美年國際考慮緊私有化，今日腳軟跣低逾９巴仙
，報０﹒６９銀。
＊地主齊跳舞愈大隻愈靚，永暉被插低樓東甚省鏡＊
大和話，米字國「脫歐」對香江樓市好壞參半，雖然環球魚缸疲弱、經濟增長受影響，但花
旗國延遲加息、樓市資金轉投本港都可以幫補吓。若果樓價較預期穩定，會刺激磚頭佬走上，其
中首選係長實（０１１１３）、新地（０００１６）同恆地（０００１２）。長實、恆地齊齊跳
高逾３巴仙，報４７﹒６５同４２﹒５銀。新地獲郭老太增持２萬股，亦行前３巴仙，收
９０﹒７銀。
永暉（０１７３３）直插近２６巴仙，報０﹒２２７銀。佢先前「一供三」只有不足３４巴
仙有效接納，而供股股份就喺今日開始買賣。
樓東俊安（００９８８）完成以２億人仔收購遷安物流七成股權，結果大成交下飆高近１３
巴仙，埋單０﹒７９銀，喺依個月內更足足收穫１﹒２倍添，勁！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
