《小傳日記》花旗國今個星期議息，加上香江大公司下星期開始派成績表，缸友都唔敢輕舉
妄動，寧願離場捉小精靈好過！話說熱爆全城，香江粉絲等到頸都長嘅《Ｐｏｋｅｍｏｎ Ｇｏ
》今日（２５日）終於悄悄地登陸香江！午飯時只見人人拎住部電話，走來走去捉小精靈、ｆｂ
被瘋狂洗版，就連小傳嘅財經名嘴朋友，都話「好忙呀！要去捉比卡超呀」。
全城陷入Ｐｏｋｅｍｏｎ熱潮，缸內就顯得更冷清，靜到拍烏蠅，喺二萬二關上上落落。完
場後實施收市競價，新機制下，大象（００００５）Ｕ盤３３蚊嘅震驚畫面應該唔會再出現！反
而股王ＱＱ（００７００）就成功以新高１８８蚊完場，魚缸更倒升２９點收２１９９３，國指
就象徵式升２點報９０３４。全日成交連５００億都無，只得４９４億銀，Ｕ盤重推又如何？只
係悶多十分鐘而已！
＊無心變股市齊捉小精靈，阿里發盈警粉絲頭擰擰＊
《Ｐｏｋｅｍｏｎ Ｇｏ》今日終於登陸香港啦！缸友又唔知捉咗邊隻小精靈呢？ＱＱ乘住
依股熱潮迎來好消息，獲歐盟開綠燈收購芬蘭手遊商Ｓｕｐｅｒｃｅｌｌ，應聲行前近２巴仙，
喺收市競價時段，以１８８銀破頂完場！
有傳大象（００００５）放售總值２７億美金嘅貸款；而另一方面，公司就發電郵，話傾緊
賣黎巴嫩業務。大象繼續積極瘦身，完場微微腳軟０﹒２巴仙，報５０﹒２５銀。
有報道指中銀（０２３８８）成功賣走南商後，管理層建議趁下個月放榜，同時宣派中期特
別息。花旗估計每股會派１元至１﹒５元，大摩更借機上調「他屐」至２９銀。中銀即刻彈高逾
２巴仙，報２５﹒６銀，係最叻藍戰士。
阿里影業（０１０６０）就唔多生性，發盈警預期中期虧損擴大，可能蝕４億至４﹒５億人
仔，結果趴低近２巴仙，得返１﹒７５銀。
＊大象在瘦身可惜價不振，傳派特別息中銀甚興奮＊
外國有知名科技博客爆料，話蘋果會喺９月１２日個嗰星期發表最新「唉瘋７」。而舜宇
（０２３８２）獲麥格理唱好升目標至５０銀，因為預料出年手機照相模組毛利率會提升，但舜
宇只係跳起唔夠１巴仙，收３０﹒７５銀，曾創上市新高３１﹒８５銀。街坊瑞聲
（０２０１８）卻唔多好彩，瞓低逾１巴仙，報６９﹒２銀。
超人系準備陸續出業績。港燈（０２６３８）聽日（２６日）率先放榜，今日偷步飛起逾２
巴仙，埋單８﹒２銀。電能（００００６）、長建（０１０３８）星期四（２８日）先拎成績表
，但可能擔心米字國脫歐英鎊大跌會拖累表現，齊齊碌低近１巴仙，埋單７４﹒６５同６７﹒９
銀。
＊唉瘋七登場概念各走各，砵砵車踩油９５９落寞＊
砵砵車到咗７月轉入大直路一路領先，東風（００４８９）升都唔識停，今日再畀瑞信上調
目標價到１３﹒５銀，讚佢跑贏大市，今日再踩足油門，衝前超過４巴仙，報９﹒３４銀；另一
架砵砵車廣汽（０２２３８）就有啲傷心，畀大華繼顯拋棄，評級從買入變賣出，全日倒退逾
６巴仙，得番９﹒５８銀。至於同行都兩邊走，吉利（００１７５）行前超過１巴仙，長汽就跣
走近１巴仙。
馬交一間酒店破天荒被政府接管，賭仔一片唏噓，當事人之一奧瑪仕（００９５９）話，已
經同酒店成立委員會，希望半年之後大步檻過，仲話瓦努阿圖博彩業生意好好，叫缸友唔好驚驚
！不過缸友都係先走為上，復牌之後無咗近７巴仙，得番０﹒４１５銀。
野村話馬交博彩業仍然好艱難，需求弱，但係仍然有新賭場開張，不過今日賭仔普遍都見升
，銀娛（０００２７）、金沙（０１９２８）跑前近２巴仙。
＊炒股唔炒市股仔紛落鑊，摩通來錫錫海螺不寂寞＊
中國投資基金公司（００６１２）上年虧損擴大至９２７０萬銀唔派息，核數師仲要保留意
見，復牌後一度跌７巴仙，但好快爬番起身，全日彈高１８巴仙，報０﹒３５５銀。
Ｃｉｔｙ Ｅ（００５５７）控股股東打算溢價逾半成賣盤，股價抽高１３巴仙，收報
３﹒０３銀，高見３﹒２２銀創自９７年２月高位，勁！
今日水泥股表現唔錯，安徽海螺（００９１４）上禮拜二（１９日）獲大行摩通斥資１﹒１
億銀增持，另外今朝錄得５０５３萬銀大手，海螺今日跳高３巴仙，收報２０﹒８５銀；潤泥
（０１３１３）亦有近２巴仙進帳。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
