《小傳日記》唔知大家有無發現，噚晚（２５日）條街特別多人呢？！《Ｐｏｋｅｍｏｎ
Ｇｏ》熱潮席捲全香港，人人化身做訓練員，走勻港九新界，用盡各種方法捉最多最勁嘅小精靈
，一較高下，呢股熱潮嘅威力認真巴閉！
正當大家都沉醉喺虛擬世界之際，估唔到今日（２６日）香江魚缸都好熱鬧，絕不比缸外失
色！就算花旗國議息在即，但大市今朝跟花旗低開唔夠１００點後，喺濠賭股同股王ＱＱ
（００７００）領軍，再加上Ａ場踢高１巴仙兼全日最高位３０５０點收市之下，一度刺激恆指
升３０７點至２２３００創近８個月新高，多隻藍戰士亦攀上高峰。不過缸友見好即收，先行獲
利走人，恆指埋單得番１３６點落袋收２２１２９，國指揚起２７點好９０６２。缸內突然牛氣
衝天，缸友都入場玩番幾轉，全日成交增加４５巴仙至近７１６億銀！
＊友邦放榜前特別多人追，ＱＱ本靚仔臨尾有點?＊
魚缸朝早突然發力，多得班藍戰士出手相助。港鐵（０００６６）及煤氣（００００３）就
踢高近２巴仙及逾１巴仙，收報４３﹒４銀及１４﹒６銀，分別創上市新高及約１年新高。至於
後日（２８日）放榜嘅友邦（０１２９９）亦衝前近２巴仙，收報４９﹒８５銀，創約１年新高
。
ＱＱ今日試過踼高近１巴仙至１８９銀上市新高，可惜尾市耐力不足，Ｕ盤倒跌近１巴仙，
收報１８６﹒３銀。但ＱＱ近期走勢靚仔，甚至傳出公司主動查倉，擔心近期股價爆升會唔會同
啲隱形股東有關，有貨缸友要小心。
魚缸活躍咗唔少，盈富基金（０２８００）亦錄得逾３２億銀成交，排成交榜首位，埋單計
就企高近１巴仙，收２２﹒７５銀。
＊盈富成交激好友不留力？賭仔開派對有食趁快食＊
金沙（０１９２８）第二季經調整物業ＥＢＩＴＤＡ為４﹒８８億美金，按年跌近１４巴仙
。不過，摩通依然唱好，讚佢嘅中場同非博彩業務都比想像中好，而巴黎人項目早啲係９月
１３日開幕都會有幫助。金沙應聲飆前６巴仙，埋單３０﹒０５銀。
孖屐憧憬博彩業會全面復甦，銀娛（０００２７）、美高梅（０２２８２）搶先飛起逾５至
６巴仙，報２６﹒２５同１１﹒８２銀。永利（０１１２８）更爆高逾７巴仙，報１３﹒２銀。
就連二線賭仔都與有榮焉，開哂ｐａｒｔｙ！奧瑪仕（００９５９）踢高近１０巴仙，收
０﹒４５５銀。澳門勵駿（０１６８０）、凱升（００１０２）亦齊齊跳起近４同逾５巴仙。
＊瑞信畀個讚廣汽好生猛，油價急下墜油股鳥獸散＊
砵砵車都非同小可。吉利（００１７５）賣走低端電動車業務，預期會賺１﹒７６億人仔，
結果駛前近６巴仙，報５﹒１９銀。廣汽（０２２３８）獲瑞信上調「他屐」至１３銀，亦衝前
逾７巴仙，報１０﹒２６銀。而比亞迪（０１２１１）中標逾１５億人仔嘅深圳公交車採購項目
，自然唔執輸行前近１巴仙，收報５１﹒６銀。
全球原油供應過剩，令油價急挫逾２巴仙，紐約期油更加見３個月低位。中海油
（００８８３）、中石油（００８５７）受累跑輸哂，分別碌低近３同逾１巴仙，得返９﹒６８
同５﹒２８銀。中石化（００３８６）就成為「三油桶」奇葩，微微企高唔夠１巴仙，報
５﹒７２銀。
＊匹克搞私有復賽微微升，花旗叫沽售６５８頭擰＊
Ｃｉｔｙ Ｅ（００５５７）控股股東打算溢價逾半成，以每股２﹒８２銀賣盤，令噚日股
價已經抽高１３巴仙。今日午收前就錄得５﹒６６億銀大手，相信交易已經成功。股價再跳高逾
３巴仙慶祝，報３﹒１３銀。另一邊廂，匹克體育（０１９６８）今朝停賽，晏晝宣布獲控股股
東以溢價近１１巴仙提出私有化，復賽後應聲彈高近３巴仙，報２﹒４１銀。
中國高速傳動（００６５８）畀花旗降評級由「買入」至「沽售」，嚇到粉絲急跳船，股價
應聲跌穿廿天（約６﹒３１６銀）、五十天（約５﹒９４５銀）、一百天（約５﹒８９３銀）同
二百五十天（約５﹒９８７）埋單報５﹒８４銀，跣低逾９巴仙。同板畀大行踩低嘅恆安國際
（０１０４４），瑞信話因為分拆親親食品（０１５８３），搞到銷售動力減弱，下調「他屐」
至５２﹒３銀，恆安逆市碌低後微升約０﹒２巴仙，報６６銀，而親親食品就飆起逾１１巴仙，
埋單報２﹒６５銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
