《小傳日記》花旗國企業噚晚（２６日）繼續派成績，不過缸友都將焦點放咗喺聯儲局議息
身上，等耶倫聽朝凌晨公布息魔最新動向，道指收市靠穩收１８４７３點。香江魚缸今朝延續近
日「牛」勢，高開６３點報２２１９３，加上孖屐炒日本央行加碼放水，都有助恆指最多升
１４７點。不過Ａ場突然吹來壞消息，孖屐傳出阿爺要監管銀行理財資金，同埋加強ＩＰＯ審核
等，嚇到Ａ場缸友腳都軟埋，創業板仲急插逾５巴仙，Ａ場都碌低近２巴仙失三千關，報
２９９２點，創一個半月以來最大單日跌幅，慘。
雖然Ａ場突然轉弱，香江一度都跟住插低，不過最後都成功企穩，繼續沿著十天線向上爬，
勢頭相當唔錯，喺聽日期指結算前，埋單收升８９點報２２２１８，國指揚５３點報９１１５，
成交６９７億銀。
＊Ａ仔場遇挫內險升少咗，錢莊見腳軟渣打最有火＊
魚缸早段升得好鬼興奮，一眾神州保險佬趁機追落後，點知Ａ仔場午後帶住香江跌，再加上
大行富瑞唱衰神州保險佬半年業績，股價撲個空。大佬壽仔（０２６２８）同平仔
（０２３１８）早上分別升近４巴仙同超過２巴仙，結果到收市，壽仔升幅得番近２巴仙，埋單
１８﹒１銀，平仔只係揚起唔夠１巴仙，報３７銀，街坊財險（０２３２８）微微翹起，新華保
險（０１３３６）跌近１巴仙。
本地錢莊都一樣，早段發力，午後腳軟，東亞（０００２３）被里昂唱淡中期業績，最終升
得逾１巴仙，報３２﹒２５銀，大笨象（００００５）踏前近１巴仙，報５０﹒６銀，而渣打
（０２８８８）仍然堅挺，撐上超過２巴仙，報６３﹒４銀。
＊友邦贏開巷回吐等放榜，港燈繼續碌中電都心慌＊
藍戰士放榜期已經打響，友邦（０１２９９）聽日公布中期業績，之前已經偷步升夠本。今
日靜靜回吐唔夠１巴仙至４９﹒６５銀，未能企上５０銀大關。
港燈（０２６３８）業績令人失望，今日花旗、里昂都要踩多腳，叫缸友沽走佢，結果股價
未止瀉，再跣多近６巴仙，到７﹒３２銀，連累埋街坊中電（００００２），破頂之後嘔出超過
２巴仙，埋單報８２﹒２銀。
魚缸升完又跌，成交都唔錯，缸友一齊期待下耶倫公布議息結果喇，盈富（０２８００）靜
待佳音，微微下潛唔夠１巴仙，報２２﹒６５銀，全日成交有約兩成喺收市Ｕ盤時段。
＊唉瘋有銷情高偉升一成，議息就出爐磚頭見煩惱＊
蘋果公司公布咗上季賺少咗２７巴仙至７８億美金，但好過預期，連「唉瘋」銷售亦都好過
市場預期，主要客仔為蘋果嘅高偉電子（０１４１５）大力跳起逾１０巴仙，收報３﹒０３銀；
舜宇光學科技（０２３８２）亦微微升起約０﹒５巴仙；但富智康（０２０３８）就唔見近１巴
仙，報２﹒６６銀。
聽朝凌晨將會有花旗國議息結果，磚頭們向左走向右走，信置（０００８３）創逾五年半高
位１４﹒３２銀後倒跌逾１巴仙，收報１４﹒０４銀；新世界（０００１７）亦跟跌約０﹒４巴
仙；街坊長實地產（０１１１３）就輕輕踢高近１巴仙，報５６﹒２銀。
＊補貼減一半比亞迪頭痛，金沙收入勁德銀都話醒＊
比亞迪（０１２１１）話收到上海有關部門通知，佢地啲新能源汽車補貼會減一半，降至每
輛５０００銀人仔，成為受補貼「按量退坡」影響嘅第一家新能源汽車企業，股價即時跣低逾３
巴仙，報５０銀。三生製藥（０１５３０）今朝開市前錄兩手每股７﹒９２銀，共１﹒３億銀大
手，碌低近２巴仙，報８銀。
賭仔噚日巴巴閉閉，金沙中國（０１９２８）管理層話，６月中場收入比上年好，係兩年嚟
嘅第一次。德銀都出報告話，中場博彩收入穩定，會令缸友對濠賭股有番有興趣。不過認為金沙
近排升咗唔少，所以只係維持「持有」評級，目標２６銀。金沙埋單就衝前近２巴仙，埋單
３０﹒５５銀，超過晒德銀目標了！同行永利馬交（０１１２８）旗下嘅「永利皇宮」下個月就
開幕，亦提交咗賭枱數量申請，跳起近１巴仙。另一方面，瑞信唔睇好賭仔前景，話新供應多咗
但需求無咁快跟上，而非旺季時間賭仔收入好低，唔知係咪受佢影響，銀娛（０００２７）跌低
近２巴仙，報２５﹒８５銀；街坊美高梅（０２２８２）瞓低近１巴仙，報１１﹒７６銀。請請
！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
