《小傳日記》花旗聯儲局一如預期，維持息口不變，「息魔」繼續乖乖瞓耐Ｄ，香江磚頭梗
係開心晒喇，齊齊開香檳慶祝，跑贏大市成條街！嚟緊缸友就要睇埋聽日東瀛央行公布議息結果
。雖然「揸ｆｉｔ人」安倍晉三放風聲，透露會推出２８萬億日圓刺激政策，但係央行究竟會點
樣擴大量寬呢，答案好快就揭盅！
既然要等，缸友當然唔敢輕舉妄動；加上祖國呢排又有監管壞消息傳出，Ａ場唔見得好穩陣
，而恆指已經升咗咁多，能夠喺期指結算日，守住二萬二關已好好喇！恆指最終只係跌４４點收
２２１７４，國指就碌低３２點收９０８２，成交６２９億銀。
＊息魔行慢了地主佬鬥惡，萬科忽炒上有貨嗒得落＊
花旗國聯儲局決定唔加息，下次議息將會係９月嘅事。雖然瑞信指投資者現時仲係唔太想入
市買樓，但事實係近排磚頭買賣真係旺咗好多，而磚頭股梗係要齊齊開香檳。新地
（０００１６）踢高２巴仙，報１１３﹒１銀；新世界（０００１７）走上近２巴仙，曾高見
９﹒０８銀創一年高位；九倉（００００４）有近２巴仙進帳，埋單５４銀。
內地磚頭萬科（０２２０２）今日更加威，炒高近１２巴仙，報１７﹒８銀，傳董事長王石
噚日去香江華潤總部，唔知有咩傾？穆迪指透過併購可加速內房整合，但兩位內房藍戰士中海外
（００６８８）同潤地（０１１０９）分別無升跌同微升唔夠半個巴仙。
＊股仔遭洗倉今回在鬥傷，潤啤與旺旺齊齊變惆悵＊
大盤風平浪靜，不過細股嗰邊就掀起驚濤駭浪，頭十隻跌幅介乎２５巴仙至８６巴仙！德普
（０３８２３）率先中招，畀沽空機構Ｇｌａｕｃｕｓ「睇中」，指公司誇大盈利，畀「強烈沽
售」評級，狠狠地畀目標價零蚊，仲叫快Ｄ停牌。雖然公司好快澄清話報告嚴重誤導，反擊對方
係為咗喺沽空中賺錢。但缸友都怕怕，急急沽貸走人，今日股價急插８６巴仙，報０﹒３１銀。
跟手排第二同第三嘅鼎石（０８０９７）同工蓋（０１４２１）亦一齊插水，分別蒸發７７巴仙
及７６巴仙，報０﹒４２銀同０﹒５４銀，慘！
有報道指南非啤酒商ＳＡＢ Ｍｉｌｌｅｒ同百威英博嘅併購存變數，潤啤（００２９１）
今日唔見近４巴仙，報１４﹒７６銀。另一邊廂，旺旺（００１５１）被德意志銀行唱淡，降評
級到「賣走」，今日跣低４巴仙，報４﹒９１銀。
＊大行來撐場友邦卻回吐，恆隆系放榜百麗真美麗＊
友邦（０１２９９）放榜，新業務無令人失望，升值３１巴仙，美林、大摩同細摩齊齊舉起
大拇指，不過友邦今個月飛得太高，缸友趁好消息放手，結果嘔出超過１巴仙，報４９﹒０５銀
。
華置（００１２７）自從話擬派特別息２﹒１銀，表現非常靚仔，缸友個個心心眼，今日股
價再捧起超過３巴仙收２４﹒９銀新高。
恆隆系中午放榜，恆隆地產（００１０１）早上先升超過３巴仙助慶，結果半年基本純利果
然增長超過三成，符合孖屐預期，缸友沽貨賺一轉，最後恆隆地產升近２巴仙至１７﹒０２銀。
而阿媽恆隆集團（０００１０）基本純利都增加２９巴仙，不過反應麻麻，潛咗近１巴仙。
百麗（０１８８０）畀麥格理讚兩句，而且末期息除淨，興奮到忘形，一支箭咁衝前超過
１１巴仙，去到５﹒３２銀，掂到３月裂口位，恭喜恭喜！
＊油價又碌低油股甚閉翳，金礦光燦燦認真好氣勢＊
油價苦苦支撐，一下子又打回原形，去到三個月以嚟低位，油股無運行全線碌地，中海油
（００８８３）跣低近２巴仙，報９﹒５６銀，中石化（００３８６）同樣跌落近２巴仙，得番
５﹒６７銀，至於街坊中石油（００８５７）情緒穩定，輕輕無咗唔夠１巴仙，報５﹒３６銀。
耶倫再再再再宣布唔加息，金礦股靚仔到爆燈，唔知缸友有無及時收服？招金
（０１８１８）爆上接近７巴仙，去到９﹒０６銀，中國黃金（０２０９９）同紫金礦業
（０２８９９）跳起超過３巴仙同近５巴仙，埋單分別報１４﹒２６銀同２﹒９５銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
