《小傳日記》深港通十一月通，好友搶先更輕鬆！

　　《小傳日記》花旗魚缸噚晚（２９日）結束連跌三日弱勢，道指收高１０７點報１８５０２
點，帶動香江魚缸今朝（３０日）一開場就衝前。恆指高開１２３點報２２９４５，重上十天線
；之後仲有好消息沖喜，就係「深港通」將會喺１１月中下旬正式通車！
　　「深港通」原本話要４個月時間籌備，咁大家都估會喺１２月至正式通車。今次早咗少少，
香江呢邊就乘勢炒一炒，但Ａ場依舊風平浪靜，企穩喺３０７４點。
　　今日期指結算，香江好友如虎添翼，借住深港通消息，收市前推高股王ＱＱ（００７００）
挑戰新高；而恆指就抽高１９４點，收報２３０１６，重上二萬三；國指都有９９點進帳，收
９５９７。　
　　只可惜，個市旺丁不旺財，魚缸成交都係靜蠅蠅，全日只得６０９億銀，未見有大驚喜喎！
　

＊深港早點通概念衝衝衝，券商生發發ＷｉｎＷｉｎ更輕鬆＊

　　祖國證監今日同港澳媒體就「深港通」交流時，現場資料顯示，預期１１月中下旬可以開通
「深港通」，突如其來嘅消息炒起深ＡＨ股，浙江世寶（０１０５７）彈高７巴仙，報１０﹒７
銀；山東墨龍（００５６８）亦跳起近７巴仙，報３﹒３８銀；晨鳴紙業（０１８１２）炒高近
６巴仙，埋單６﹒９銀。
　　生發發（００３８８）回應話１１月下旬嗰時應該可以做足準備，生發發悶咗幾日之後今日
升起１巴仙，報１９０﹒１。券商股都落鑊，之前有傳獲洽購嘅耀才（０１４２８）今日衝前近
８巴仙，報２﹒６９銀；第一上海（００２２７）亦漲６巴仙，報１﹒４１銀。

＊美人評跑輸民行照踏前，南航績倒退眾鳥陪低飛＊

　　祖國錢莊表現唔錯，民行（０１９８８）半年多賺近２巴仙至２７２億人仔，美銀美林指成
績符合預期，升目標價去到９﹒１５銀，但維持「跑輸大市」評級，今日股價升起近２巴仙，報
８﹒３５銀。街坊交行（０３３２８）漲逾２巴仙，報５﹒９１銀，更高見５﹒９４銀創一年高
位。中行（０３９８８）同工行（０１３９８）今日收市後會出成績表，齊齊升逾１巴仙。
　　雖然今年頭７個月民航客運量升近一成一，但鐵鳥今日飛低，南航（０１０５５）半年少賺
一成至３１﹒２億人仔，瑞信維持「跑輸大市」評級，里昂都覺得失望並維持「沽貨」評級，結
果南航今日唔見６巴仙，報４﹒７２銀。東航（００６７０）同國航（００７５３）都係收市後
出業績，分別跣低４巴仙同近３巴仙。

＊ＩＧＧ回購美麗新秀麗，鳳凰遇伯樂果然好氣勢＊

　　ＩＧＧ（００７９９）「揸ＦＩＴ人」之一許元，喺噚日（２９日）業績記者會表示，如果
集團價值未被真實反映會果斷出手。嘩！話口未完，公司即刻揼咗９４１萬銀增持；做到咁明顯
，缸友仲唔嗱嗱冧上車咩！ＩＧＧ全日飛高逾１２巴仙，收報４﹒３８銀，創逾一年新高。
　　鳳凰醫療（０１５１５）大折讓配股收購華潤醫療業務，涉逾３７億銀。完成後華潤醫療成
為公司最大單一股東，揸貨股東亦相當歡喜。鳳凰醫療更飆高逾５巴仙，收報１３﹒６銀。
　　新秀麗（０１９１０）中期少賺１３巴仙至８２４０萬美金，但「揸ＦＩＴ人」就睇好下半
年表現，預期祖國孖展下半年有中至高單位數銷售增長。滿懷憧憬下，新秀麗斬穫逾９巴仙，收
報２５﹒１銀。
　　博雅（００４３４）同金斯瑞生物（０１５４８）成績表同樣省鏡，前者半年多賺７６巴仙
，後者更多賺１﹒３倍。股東望完當然高興，難怪兩位齊齊收穫甚豐，分別有近１６巴仙及近１
２巴仙進帳，收報３﹒５７銀及２﹒２８銀。

＊博雅金斯瑞靚績多人搶，瑞聲與舜宇今天繼續漲＊

　　蘋果終於放風，將會喺下周三（７日）發布「唉瘋７」！市場實在等得太耐喇，消息直接帶
動一眾蘋果概念股向上爬，話唔定短期內可以繼續成為股價催化劑添！將於下星期一染藍嘅瑞聲
科技（０２０１８）績後被多間大行唱好，今日繼續破頂，升近４巴仙，收報８９﹒５銀，最高
見９０﹒４５銀。街坊舜宇光學（０２３８２）績後亦繼續創上市新高，彈高近５巴仙，收報４
２﹒３５銀，最高見４２﹒５銀，認真Ｈａｐｐｙ！
　　中國民航信息網絡（００６９６）上周五（２６日）公布半年賺多２９巴仙，今日又畀大和
出報告出口，指增長動力可以持續到出年，升目標價至１８銀，難怪成功踢高逾１１巴仙，收１
６﹒９６銀。另一邊廂，康師傳（００３２２）就滿身傷痕，皆因成績表唔見得人，中期少賺６
５巴仙，瑞信大和齊齊唱淡，搞到逆市跌低近６巴仙，報７﹒４５銀，係全日最差藍戰士。請請
！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。