《小傳日記》究竟花旗息魔下個月殺唔殺到，缸友都好心急想知道結果。不過暫時聯儲局都
偏向鷹派，搞到缸友都唔敢入市。道指收低４８點或０﹒３％，至１８４５４點。依家齊齊坐定
定，睇實星期五（９月２日）公布嘅非農就業數據，如果表現省鏡，咁息魔降臨嘅機會就大增喇
！
香江呢邊就嚟到業績期最後一日，中資股表現就麻麻，今日中銀（０２３８８）同大象
（００００５）就搶晒風頭，雄霸最佳藍戰首兩位！不過魚缸無方向，恆指開升２６點報
２３０４３後又繼續喺二萬三窄幅上落，最後埋單仲要跣低３９點收２２９７６，國指就唔見
５５點收９５４１，成交逾６８８億銀。
不過總結整個８月，恆指累漲１０８５點或５巴仙，國指累升５８２點或６﹒５巴，兩個都
要畀個「Ｌｉｋｅ」！
＊中銀派特息阿媽亦招積，大象再回購表現確優秀＊
中銀半年純利４２７﹒３１億，大幅飆升２﹒２倍，派中期息０﹒５４５銀之餘，再因為賣
走南商而派特息０﹒７１銀。摩通將佢嘅「他屐」上調至３１銀，繼續叫「增持」，中銀應聲跳
起４巴仙，報２７﹒１５銀，仲創一年高位２７﹒４銀，係最好打藍戰士。
阿媽中行（０３９８８）都受挈，中期賺９３０﹒３７億人仔，多２﹒５巴仙比預期好，結
果亦彈高逾１巴仙，報３﹒４９銀。
另一神州錢莊工行（０１３９８）表現平平，上半年只係多賺０﹒８巴仙，於是腳軟逾１巴
仙，收４﹒９３銀。交行（０３３２８）好少少，企高逾１巴仙，報５﹒９９銀。
大象噚日喺倫敦回購３４１萬股，數量大增，今日即刻踢高逾２巴仙，埋單５７﹒５銀，見
近８個月新高，仲進佔埋成交榜第二位。
＊火車成績差好友唔夠打，蘋果罰繳稅概念股後退＊
中交建（０１８００）中期純利升７巴仙到７２﹒６億人仔唔派息，表現唔夠半年純利升咗
１２巴仙嘅中鐵（００３９０）同埋半年多賺９巴仙嘅中鐵建（０１１８６）好。禍不單行，中
交建仲被指訂單增長唔夠街坊好，中金同瑞信就對中交建維持評級不變，今日股價被質低近７巴
仙，報８﹒４６銀。中鐵同中鐵建就分別踢低近３巴仙同逾１巴仙。
就嚟發布新產品嘅蘋果捲入稅務風波，被歐盟要求補交返１４５億美金嘅稅款，真係唔知要
賣返幾多部唉瘋先至夠交稅啦。不過蘋果概念股亦趁呢個時間回一回氣，就嚟染藍嘅瑞聲
（０２０１８）今日回落逾１巴仙，報８８﹒４５銀。街坊舜宇（０２３８２）同聯想
（００９９２）亦分別無咗逾２巴仙同１巴仙，報４１﹒４５銀同５﹒２３銀。
＊萬科有人吼ＡＨ兩邊走，馬交經濟縮賭仔好鬼愁＊
講番萬科（０２２０２）（深：０００００２）爭奪戰，新入局嘅恆大（０３３３３）噚晚
開記招，大老細許家印未有現身，令記者朋友有啲失望，不過同許家印一齊「鋤大Ｄ」嘅好朋友
就動作多多，上禮拜三（２４日）「重慶李嘉誠」張松橋旗下私募基金用接近２億銀，掃入萬科
Ｈ仔９５０萬股，加埋加埋，「大Ｄ會」相當於合共持有萬科Ａ仔超過８巴仙。萬科Ａ仔再次爆
升停板，成交超過５７億人仔，至於Ｈ仔早段揚起，埋單就倒跌唔夠１巴仙，報１９﹒９銀。
恆大中期純利大跌７９巴仙，瑞信同美銀美林齊齊唱淡，結果全日倒退近７巴仙，散場時報
５﹒３６銀。
馬交經濟倒退未停，第二季錄得負增長７﹒１巴仙，比第一季有所改善，不過一眾賭股都好
唔ｈａｐｐｙ，藍戰士金沙（０１９２８）同銀娛（０００２７）分別插近２巴仙同近１巴仙，
報３０﹒５銀同２５﹒２５銀，而美高梅（０２２８２）高層接受媒體專訪時話，新賭場將於明
年第二季登場，接近埋單時突然爆升，最後彈高超過６巴仙。
＊華電業績曳銀證同閉翳，尾班車放榜中芯心慌慌＊
華電國際（０１０７１）放榜，中期利潤２４﹒７億人仔大跌近３１巴仙；今日自然冇運行
，趴低近５巴仙，報３﹒４７銀。
中國銀河（０６８８１）亦唔好得好邊，半年溢利２２﹒５５億人仔，大嗱嗱唔見咗六成；
最後瞓低近２巴仙，得返７﹒２７銀。
至於北控水務（００３７１）就衝前逾３巴仙，收５﹒４１銀，皆因成績省鏡得多，上半年
純利１５﹒７４億增加３６巴仙，兼派息５﹒９仙。
中芯國際（００９８１）今日趕尾班車拎成績，率先回吐近６巴仙，報０﹒８５銀，但佢今
個月內累計都收穫咗３５巴仙。今日成交都有６﹒７億股，比平日多３倍，總金額仲係第
１７位添！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
