《小傳日記》希拉里先拔頭籌，香江慶祝高高收！

　　《小傳日記》花旗魚缸噚晚（２６日）繼續「驚」咗特朗普，「驚」佢表現大勇，增加當選
機會，道指又再插低１６６點收１８０９４，萬八關響起警號。見到咁嘅形勢，香江缸友想瞓一
覺好嘅都難，唯有做好準備，今朝見步行步。
　　好彩虛驚一場！全球矚目首場花旗總統大選辯論，喺香江時間今朝９點鐘正式上演！睇咗半
個鐘後，恆指就夠鐘開場，缸友有見希拉里表現唔錯，都比較放心；大市無受隔晚美股影響，高
開３８點後仲愈升愈多。歷時約９０分鐘嘅辯論結束後，調查發現大部分人都認為希拉里今場辯
論佔優，恆指最興奮時衝高逾３００點慶祝，埋單都仲有２５３點落袋，報２３５７１，再一次
收復十天及廿天線。國指都開心跳起１１７點，收９７４６。
　　大市反彈，但臨近Ａ仔長假期，買賣唔多活躍，全日成交６４７億銀。

＊內銀齊反彈愈大愈美麗，賭收或續升賭仔不閉翳＊

　　祖國錢莊新丁郵儲行（０１６５８）聽日就會同大家見面，ＩＰＯ超購１﹒６倍，定價
４﹒７６銀接近下限。老實講，小傳都唔會有咩大期望。不過另一邊廂，摩通一口氣升重農行
（０３６１８）、徽商銀行（０３６９８）同埋民行（０１９８８）目標價，係得民行升１巴仙
，其他兩隻無咩波動。大隻Ｄ嘅工行（０１３９８）同中行（０３９８８）就有２巴仙左右進帳
，各報４﹒９７銀同３﹒６銀。
　　野村估馬交９月份賭收按年續升４巴仙至５巴仙，但最怕趨勢未能持續。之不過，賭仔有理
無理照衝咗先。金沙（０１９２８）彈高３巴仙，報３３﹒３銀；銀娛（０００２７）亦唔執輸
升起近２巴仙，收報２８﹒９銀。

＊油王密密斟油股微微漲，北汽與吉利踩油急急上＊

　　油組齊齊去阿爾及利亞開會，憧憬會傾到支撐油價措施出嚟，油價彈高３巴仙。油價好，油
股好，中石化（００３８６）抽高近２巴仙，報５﹒４８銀；中海油（００８８３）亦升起近１
巴仙，收報９﹒３銀；中石油（００８５７）就升唔夠半個巴仙報５銀。
　　砵砵車今日跟住大市向前衝，廣汽（０２２３８）噚日唔見半成之後今日回升番近２巴仙，
報１０﹒１６銀；北汽（０１９５８）獲麥格理升目標價，亦彈起近４巴仙，報８﹒２８銀；吉
利（００１７５）今朝錄得１２７４萬銀大手，更加跳起近４巴仙，報７﹒０５銀。

＊野村來祝福金山即掃高，博雅ＩＧＧ表現亦風騷＊

　　蘋果ｉＰｈｏｎｅ７開售至今，相關股似乎無咩作為。瑞聲（０２０１８）噚日更跌穿埋
８０銀大關，今朝開賽都繼續下跌，但之後隨市反彈番逾１巴仙，收報７８﹒５５銀，但仲未收
復番條五十天線（約７８﹒６５５銀）。舜宇（０２３８２）叫做好ＤＤ，有近５巴仙落袋，收
報３７﹒７５銀。比亞迪電子（００２８５）都有逾２巴仙進帳。
　　科網街坊，金山軟件（０３８８８）獲野村相信可以繼續複製手遊成功模式，續叫缸友「掃
貨」；缸友亦好聽話，掃高近４巴仙，收報１８﹒７８銀。博雅互動（００４３４）及ＩＧＧ
（００７９９）就分別收穫逾６巴仙及近４巴仙。
　　
＊瑞信降評級新奧有所失，股仔好鑊氣２７６爆升＊

　　達進東方照明（００５１５）擬發２﹒８５億銀換股債。其中認購人ＯＥＩＬ若兌換１０億
股，而其他人未換股，就會揸住公司擴大後股本約４９﹒２７％股權，意味到時公司或已經易手
。之不過，兌換價先得嗰０﹒１銀，難怪今日復賽碌低逾８巴仙，收報０﹒２８銀。
　　新奧（０２６８８）遭瑞信踩毛利有下跌風險，降級至「中性」兼削價至４４銀。新奧今日
無運行，逆市碌低逾４巴仙，收報３７﹒６銀。
　　孖屐轉佳，部分魚仔乘風飆高。金寶寶（０１２３９）今朝錄得４０５０萬銀大手，炒高成
１４巴仙，收報０﹒１８銀。蒙古能源（００２７６）飆前近８８巴仙，收報０﹒３１５銀，成
最佳魚仔。西伯利亞礦業（０１１４２）及鷹力投資（００９０１）就分別斬穫近３４巴仙及逾
２９巴仙，進佔升幅榜頭二、三位。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。