《小傳日記》港匯突走強，魚缸跌轉漲！

　　《小傳日記》香江魚缸噚日（２７日）率先彈高二百幾點，慶祝希拉里贏出首場總統大選辯
論，花旗魚缸夜晚就接力祝賀，道指跳升１３３點或０﹒７巴仙，收１８２２８點。希拉里贏得
第一次口碑，當然值得高興，不過嚟緊仲有兩場辯論，特朗普都講到明，喺１０月９號舉行嘅第
二場辯論出招反擊，缸友要小心部署應對策略喇！
　　冷靜完一晚之後，今朝恆指開市即刻回吐，一度最多唔見約２００點，差Ｄ嘔番晒噚日升幅
。好彩下半場Ａ股收市後，港匯突然轉強，美元兌港元曾低見７﹒７５３９逾兩周低位，恆指成
功拗腰彈高４７點，以全日最高位收報２３６１９；國指亦收復大部分失地，散場只係跌２６點
報９７１９。
　　聽日係期指結算日，同埋十一黃金周就快到，「港股通」聽日起連續暫停１２日，觀望氣氛
增加，全日成交都只得近６１６億銀。而如果唔計大大隻郵儲行（０１６５８）上場帶來嘅逾
４６億成交，魚缸成交實際得番５６９億銀左右，靜！

＊郵儲行登場高佬好盡責，汛和中一手獲利二百八＊

　　兩隻新丁表現好大差異。大大隻郵儲行集資幾百億，不過超購只係１﹒６倍，抽一手必中，
今日首日掛牌，開報４﹒７６銀同招股價持平。雖然有傳索羅斯基金會認購，又傳話早到１０月
底前可以沽空，不過收市都只係大致持平，報４﹒７７銀。但見保母高佬全日都好盡責「護價」
其他神州銀主好似建行（００９３９）、交行（０３３２８）等，就均錄得唔夠一巴仙跌幅，變
化唔大。
　　細細粒汛和（０１５９１）就唔同喇！首日掛牌開報０﹒１５銀，比招股價高出１５巴仙，
咁先型嘛！不過股價表現好，事出必有因，汛和孖展反應熱烈，超購３８１倍，以中間定價。最
後收市都有１１巴仙落袋，報０﹒１４４銀，一手賺２８０銀。
　　馬交賭業界對當地收緊中介人門檻反應正面，銀娛（０００２７）、金沙（０１９２８）分
別有逾１巴仙同近１巴仙進帳。不過最犀利嘅都係二線賭仔勵駿（０１６８０），公司早前展回
購，再之前又話出售綜合設施意向書獲另一買家接洽，今日飛起逾１７巴仙，報１﹒６３銀，勁
！

＊賭仔齊齊上勵駿認真俊，渣打好頭痕表現有點遜＊

　　傳渣打（０２８８８）有份投資嘅印尼能源商涉嫌行賄而受到調查，同時，花旗就審視緊渣
打有無需要負上責任，結果渣打今日唔見近１巴仙，收報６２﹒４５銀。
　　港視（０１１３７）免費電視牌照申請「發還」通訊局再評估，魔童王維基質疑政府係
「拖」字訣，以免影響特首選情。一班港視粉絲以行動表示支持，掃高港視近６巴仙，報
１﹒４２銀。
　　杭州今日起調高二套房首付比例同暫停市區購房入戶等等，嚇到潤地（０１１０９）今日最
多唔見近４巴仙，最尾只係腳軟唔夠半個巴仙，報２２﹒８５銀；街坊恆大（０３３３３）打算
賣走糧油、乳製品及礦泉水業務等非核心業務，預料獲利５７億人仔，難怪開場曾逆市彈起逾３
巴仙，不過好快就無晒力，收市得番唔夠半個巴仙旅進帳，報５﹒３９銀。

＊杭州今出招潤地腳軟軟，油組傾唔掂油股怎打算＊

　　油組就快開完會，究竟有無協議能夠達成好快就有分曉，不過其中一個關鍵嘅產油國伊朗已
講明今個禮拜唔係油組作出決定嘅時候，睇怕機會甚微囉！「三桶油」似乎要面對失望嘅結果，
中海油（００８８３）、中石化（００３８６）及中石油（００８５７）齊齊下跌不足半巴仙，
收報９﹒２７銀、５﹒４６銀及４﹒９８銀。
　　孖屐傳出延後嘅新能源補貼，終有望於下月出爐，長城汽車（０２３３３）響按歡迎，駛前
逾２巴仙，收報７﹒６銀。吉利（００１７５）亦跟前近１巴仙，收報７﹒１１銀。東風
（００４８９）反而就要碌低近１巴仙。

＊補貼下月推車仔兜返轉，４０４被狙翠華尾段軟＊

　　新融宇（０１１５２）今朝錄得８６００萬股市前交易，佔咗公司股本近９巴仙，每股作價
仲較上日收市價高成２４個巴仙去到０﹒７２銀，似乎有喜事公布。果然，中午公布同緊一名潛
在業務夥伴磋商，幻想空間十足，難怪今日飆高逾５３巴仙，收報０﹒８９銀，仲係最叻仔個股
。
　　新昌集團（００４０４）遭空軍匿名分析轟炸，指公司係主席嘅「私人廢物區」，專門接收
啲垃圾資產咁話，仲踩佢只係值０﹒１２銀。新昌碌低逾６巴仙午後停賽，收報０﹒５８銀，公
司話會徵詢吓法律意見。
　　翠華（０１３１４）主席李遠康向另外兩名創辦人間接溢價逾２３巴仙收購翠華股權，雖然
今朝試過飆升一成，但埋單要倒跌近１巴仙，收報１﹒４９銀。
　　中國金石（０１３８０）大成交碌低四成，收報０﹒４２銀，唔見埋十天及廿天線。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。