《小傳日記》「海馬」漸漸殺埋身，香江尾市暈一暈！

　　《小傳日記》老實講，小傳今日（２０日）同好多缸友一樣，個心都唔喺魚缸入面。個個都
睇實強颱風「海馬」嘅一舉一動，雖然今日大部分時間都幾好天，仲出陽光添，但係暴風雨前夕
，通常都係比較平靜，加上天文台都已經宣布，考慮今晚發三號風球。坊間仲有好多消息，話聽
日可能唔止八號，仲有機會十號呀！當然，一切都梗係以天文台為準喇。天文台仲撰寫一篇題為
「謠言止於智者」嘅文章闢謠，而經濟通專欄《笑傲缸湖》作者任盈盈都寫咗篇回應文章添。
　　講咗咁耐，都係講番缸內表現先，噚晚（１９日）油價急升兼大摩業績省鏡，但喺今朝舉行
花旗總統大選辯論前，缸友都按兵不動，道指最終只係微升４０點。反而香江魚缸鬼咁興奮，「
三桶油」領軍，恆指高開約百點後，就繼續向上衝，曾高見２３５００重越十天線
（２３４１４點）。可惜尾市無力，未知大家係咪驚聽日打風休市過長周末，最終恆指得番６９
點升幅收２３３７４，而國指就踢高４５點報９６８６，全日成交５３６億銀左右。

＊期油高位收催升三桶油，安東被唱淡照樣牙詀詀＊

　　花旗國國原油庫存出乎意料減少５３０萬桶，刺激紐約期油升到去１５個月高位，布蘭特期
油都升咗２巴仙。「三油桶」威盡藍戰士，中石油（００８５７）衝前３巴仙，報５﹒５４銀；
中海油（００８８３）、中石化（００３８６）都唔輸蝕，彈高逾２同近１巴仙，分別收
１０﹒６８同５﹒８銀。
　　油服佬一樣開哂ｐａｒｔｙ，中海油服（０２８８３）、巨濤海洋（０３３０３）齊齊跳起
逾５同７巴仙，報７﹒９８同０﹒７５銀。安東油服（０３３３７）雖然畀瑞信唱衰，話現金流
好差千奇唔好買，但有理冇理照飆高近１０巴仙，埋單１﹒１３銀，仲創逾一年高１﹒１８銀添
！

＊中移今放榜缸友心慌慌，中行跟隊放阿仔向上闖＊

　　工信部話，今年頭三季電訊業業務收入增長４﹒８巴仙，但祖國移動（００９４１）今日拎
成績表前依然腳軟軟，跣低近１巴仙，報９２銀。聯通（００７６２）之前發盈警料首三季純利
唔見８１巴仙，今日再跟住碌低０﹒３巴仙，報９﹒４３銀。中電信（００７２８）就企得穩，
輕輕行前０﹒２巴仙，報４﹒１５銀。
　　中銀（０２３８８）同阿媽中行（０３９８８）一樣喺下星期二（２６日）放榜，兩個孖住
走上。中銀偷步衝前逾２巴仙，收２６﹒９５銀；中行則斬穫０﹒３巴仙，報３﹒４８銀。而大
象（００００５）第三次中期息１０美仙今日除淨，亦踢高近１巴仙，報５８﹒８銀。

＊李寧返單快全日起勢跳，通過私有化匹克講拜拜＊

　　「體操王子」李寧（０２３３１）宣布，旗下品牌訂單連續１２季增長，仲話今年第二季訂
貨會訂單，將會錄得高單位數增長，表現算靚仔，瑞信都要升佢目標價到６﹒８銀。李寧全日踏
前逾半成，報５﹒８１銀。
　　同行匹克體育（０１９６８）宣布通過私有化計劃，唔同大家玩，拍拍屁股走人，預計下星
期一（２４日）最後一日買賣，今日行前超過２巴仙，報２﹒５９銀，創超過一年新高。
　　其他同業就悶悶地，３６１度（０１３６１）微微浮上唔夠１巴仙，報３﹒１１銀，特步國
際（０１３６８）跨前近３巴仙，報３﹒６１銀，至於安踏體育（０２０２０）就跌低接近２巴
仙，報２０﹒５銀。

＊缸友炒巨刁第一信用飆，長盈換主席急升好得戚＊

　　全日表現第一嘅魚毛當屬第一信用（０８２１５），喺開市之前錄得合共１﹒３億股「大刁
」，開市半個鐘之後再錄得多手合共１﹒５億股「巨刁」，加加埋埋佔公司近８巴仙權益，莫非
有好事近？第一信用最高升超過４９巴仙，全日就飛上近３５巴仙，報０﹒５６銀。
　　長盈（００６８９）轉咗手之後，大老闆「仙股大王」孫粗洪坐正公司主席一職，長盈拍拍
手跑前超過１１巴仙慶祝，收市報０﹒２１４銀。
　　美加醫學（００８７６）獲得牙科產品喺神州嘅專屬分銷權，面向１３億人民嘅大孖屐，缸
友追入捧高高，臨收市前仲錄得合共２﹒７億股嘅大手成交，股價全日飛上近２７巴仙，報
０﹒４７５銀。
　　神州資源（００２２３）宣布折讓兩成配售８億股，涉及公司１７巴仙權益，下午復牌之後
先跣低１１巴仙，再坐過山車倒升超過７巴仙收０﹒３銀，創超過一年新高。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。