《小傳日記》六中全會有憧憬，中港魚缸孖住升！

　　《小傳日記》多得強颱風「海馬」帶挈，好多香江打工仔上星期五（２１日）齊齊放假一天
，魚缸當然都停賽避八號風球喇。不過，放完三日長假後，恆指今朝（２４日）都好似未瞓醒，
表現反反覆覆，高開５７點報２３４３１收復十天線後，好快就調頭碌低超過百幾點，股王ＱＱ
（００７００）、祖國移動、ＡＩＡ（０１２９９）三大重磅股都無咩力。
　　不過，六中全會開幕，Ａ場上番三千一，收升１﹒２巴仙報３１２８，創逾九個月高位。而
香江上市嘅中字輩都發力，好似建行（００９３９）、中石油（００８５７）、強勢煤股等等，
幫好友重奪失地，恆指收升２２９點或近１巴仙，報２３６０４，收復十天（約２３３７９）及
廿天線（約２３５０２），國指更勝一籌，彈起１６６點或１﹒７巴仙，報９８５２，全日成交
急增３８巴仙至７４１億銀添。

＊傳「三馬」合作威華達落鑊，又傳出掃貨長建笑呵呵＊

　　神州傳出「三馬」阿里主席馬雲、ＱＱ主席馬化騰、平保（０２３１８）董事長馬明哲成立
嘅眾安保險，同恆大（０３３３３）主席主席許家印連同威華達（００６２２）旗下萬贏證券組
「恆贏證券」，威華達痴到班大孖沙，炒高逾６７巴仙後突然停牌，報０﹒５１銀。今次威華達
中途停賽，估計都同今次傳聞有關，但孰真孰假仍然未能夠確定，高位追貨缸友，真係小心啲！
威華達同系嘅百仕達（０１１６８）同樣發達，踢高逾１５巴仙。至於ＱＱ、平保同恆大今日就
郁動唔大。
　　長建（０１０３８）傳再次出手掃貨，參與競購智能讀表公司Ｃａｌｖｉｎ
Ｃａｐｉｔａｌ，涉資最多達１０億英鎊（近９５億港元）。長建輕微行高近１巴仙，收報
６３﹒７銀。

＊煤炭大翻身神華再飛奔，水泥佬高興齊齊跳ｐａｒｔ舞＊

　　煤炭股自上年起一片愁雲慘霧，近月開始大翻身，雖然產能過剩問題未解決，不過秦皇島煤
炭最新價格已經升到每噸６４０至６５０銀人仔，同時再傳出發改委將召開座談會，研究煤炭產
能問題，神華（０１０８８）跑上近４巴仙，報１６﹒７２銀，兗煤（０１１７１）首三季產量
跌咗７巴仙，全日興奮跳上接近半成，報６﹒３３銀，而二三線煤股表現更興奮，弘海高新
（０００６５）飛上超過１７巴仙，伊泰煤炭（０３９４８）跨出逾７巴仙。
　　另一去產能重點水泥業，水泥價位同樣開始回穩，個別地區仲提價添，相關魚毛都心情好。
潤泥（０１３１３）首三季賺少３５巴仙，好過孖屐預期，踏前近７巴仙，報３﹒２３銀，同業
海螺（００９１４）同中國建材（０３３２３）亦行前逾４巴仙同逾２巴仙，分別報２１﹒８５
銀同３﹒５４銀。

＊季績遜預期中移皺晒眉，大摩削他屐瑞聲向下劈＊

　　祖國移動（００９４１）首三季盈利按年升逾３巴仙至８８１億人仔，但大摩認為公司第三
季嘅純利按年跌咗近２巴仙，按季跌近２５巴仙，低過佢地預計。祖國移動成績欠佳下，股價亦
趴低咗逾１巴仙，收報９０﹒９銀。聯通（００７６２）首三季盈利更挫近８１巴仙至近１６億
人仔，輕微跣低０﹒２巴仙，收報９﹒４１銀。中電信（００７２８）同樣碌低約０﹒２巴仙。
　　蘋果公司聽日（２５日）將會放榜，相關股瑞聲（０２０１８）慘遭大摩大削目標至７８銀
，今日亦飄低咗逾３巴仙，收報７７﹒４５銀，係最差表現藍戰士。舜宇（０２３８２）好啲，
尾市回升約０﹒２巴仙，收報４０﹒７銀。　

＊中銀好有力詐胡照樣食，落場即跌低郵行好閉翳＊

　　本地錢莊股有精神，大笨象（００００５）雖然繼續遭細摩籲沽售，不過升目標價到６０銀
，幫助大笨象行前逾１巴仙，報５９﹒４銀。另外，有報道指中銀香江（０２３８８）向廈門國
際錢莊出售集友錢莊業務，作價約２３４億銀，中銀分到其中大約１６４億銀，不過下午再有消
息澄清話係流料，中銀詐胡都照食，跳高咗超過４巴仙，收報２８﹒１５銀，為最佳藍戰士。
　　轉過頭睇神州錢莊，郵儲行（０１６５８）告別穩價期，仲畀社保基金減持，缸友心驚驚走
人，全日價插超過３巴仙，報４﹒６銀，最低曾見４﹒５７銀，連招股價４﹒７６銀都保唔住！
　　另一方面，缸湖傳聞馬修斯神州基金增持咗光大國際（００２５７），話睇好公司前景，缸
友跟住捧入場，全日跑前咗超過半成，報９﹒７７銀。
　　普匯中金（００９９７）早前一供五，由於海馬襲港，上禮拜四（２０日）提早除權，結果
今日一度爆上１倍至０﹒１０８銀，最後收市升幅就回落到超過４４巴仙，報０﹒０７８銀。請
請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。