《小傳日記》人仔六年低，魚缸有點翳！

　　《小傳日記》話咁快，有「傳統股災月」之稱嘅１０月就快完結！好彩今次無靈驗到，暫時
比上個月都仲有二百幾點落袋，表現都算不過不失喇！加上季績期都近尾聲，人仔持續貶值再創
逾六年低位，而且花旗國總統大選又就快舉行；咁多因素影響下，缸友都採取穩陣策略：等！
　　好似今日（２５日）咁，香江魚缸全日窄幅上落，高低波幅只得１２４點。雖然恆指最終收
跌３８點報２３５６５點，但總算收高廿天線（２３４９６點）樓上；國指就微軟１５點報
９８３７點，好友防線都仲未失守，後市仍有希望！
　　是日大悶市，魚缸成交疏疏落落，得番近５５５億銀。

＊十月近尾聲缸友頭擰擰，中銀急澄清股價唔多醒＊

　　超人一號（００００１）旗下意大利３業務同Ｗｉｎｄ合併單「刁」，終於獲意粉國當局開
綠燈，預期最快今年年底就搞得掂。不過，佢今日依然碌低唔夠１巴仙，報９８﹒５銀。
　　中銀（０２３８８）澄清話，未簽任何出售集友銀行權益嘅協議。之前憧憬會再有特息派嘅
缸友即散水，結果中銀瞓低近１巴仙，報２７﹒９銀。
　　大和估計，第三季馬交博彩商業績會係舊年首季以嚟最好，調整後ＥＢＩＴＤＡ有望按年升
半成。其中，銀娛（０００２７）係首選，評級上調至「跑贏孖屐」，應聲彈高近３巴仙，收
３１﹒４５銀，仲係全日最叻藍戰士。金沙（０１９２８）都獲升級至「持有」，跟尾衝前近２
巴仙，埋單３５﹒０５銀。

＊博彩數據靚賭仔齊話正，百麗成績曳粉絲立即掟＊

　　鞋王百麗（０１８８０）半年賺少咗兩成，派息減到１２分人仔，表現差過孖屐預期，管理
層話依家實體零售環境仍然嚴峻，會繼續縮分店同裁員添，大摩、細摩、美銀美林同瑞信都踩多
兩腳，結果百麗全日愈踩愈深，無咗超過９巴仙，得番５﹒０７銀銀。５銀大關真係岌岌可危！
　　零售界仍然有好消息，莎莎（００１７８）雖然發盈警，估計半年賺少３５巴仙至４５巴仙
；不過莎莎又透露，第二季銷售跌幅收窄，黃金周同店銷售仲逆轉升，細摩仲畀個讚添。莎莎開
心跨前接近一成，報３﹒６８銀。
　　神州公布９月鋼材價格又再跌過，因為鋼產量增加而出口下降，不過發改委又話鋼鐵行業去
產能全年目標已經完成八成以上，拍下手掌先！聽日放榜嘅鞍鋼（００３４７），今日先炒起超
過４巴仙，報４﹒０６銀，馬鋼（００３２３）後日放榜，亦跟住跳上超過３巴仙，報１﹒８４
銀。

＊莎莎似否極開心高高高，鋼鐵去產能攜手跳隻舞＊

　　ＱＱ（００７００）獲高盛同摩通睇好，齊齊叫「買」，高盛更加將「他屐」由２１４銀一
舉提高到２５６銀。可惜ＱＱ冇咩反應，最終跣低０﹒３巴仙，報２１４﹒８銀。
　　其他科網街坊表現就唔錯，金山軟件（０３８８８）跳前３巴仙，收１８銀，佢先前發盈喜
，料第三季錄得合併溢利。而ＩＧＧ（００７９９）噚日（２４日）豪花９５３﹒６萬回購
１７５﹒４萬股，今日亦飛起逾６巴仙，報５﹒８２銀，曾經創逾一年高５﹒８８銀添！
　　北京控股（００３９２）早日都有高盛唱好，認為氣價如果上調對行業有利，仲將佢列入
「確信買入」名單。北控行前近６巴仙，收報４０﹒９５銀。

＊高佬薦北控跳起來慶祝，瑞聲續回吐股仔向下碌＊

　　花旗魚缸等住蘋果放榜，香江手機股都翹首以待，不過唉瘋概念藍戰士瑞聲（０２０１８）
好悲觀，噚日跣低超過３巴仙，今日再插多近４巴仙，報７４﹒４銀，瑞信都話要削佢目標價。
　　遠東宏信（０３３６０）開市前錄得涉及近３巴仙嘅權益交易；咦！有啲嘢喎！不過，缸友
無咩反應，全日行落近２巴仙，報７﹒０７銀，成交金額榜排第三。
　　楓葉教育（０１３１７）曾經非常風光，由２銀升到８﹒５銀，不過早前細股斬倉潮爆發後
，表現一落千丈，今日再失落近４巴仙，報５﹒４３銀。唔講唔知，楓葉喺１０月只有三個交易
日係上升嘅，以現價計算，本月累計總共跌咗超過２４巴仙！
　　半新丁浩德（０８１４９）掛牌第六日就見洗倉，今日埋單蒸發咗逾６９巴仙，剩番２﹒４
銀，一手帳面值由７７５００銀跌到剩番２４０００銀，不過股價仍然比配售價０﹒４２５銀高
出近５倍。謝謝！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。