《小傳日記》魚缸今日再低收，三條防線均失守！

　　《小傳日記》近排美金獨大升到嘭嘭聲，非美同人仔就跌到哇哇聲，人仔到今日至稍稍喘穩
。人仔定番Ｄ，但香江魚缸依舊冇運行，今朝（２６日）一開市就碌低１６８點報
２３３９６；加上後日（２８日）就係期指結算日，淡友趁住大好機會出兵，中字輩股份成為重
災區，油股、內銀股、砵砵車股都被攻陷。
　　結果午飯之後，恆指愈跌愈深，而「金銀孖寶」銀娛（０００２７）同金沙（０１９２８）
成逆市奇葩，但都幫唔到幾多，最終大市埋單跣低２３９點報２３３２５點！另一邊廂，國指亦
唔好得幾多，收低１３８點報９６９８點。
　　好友一連兩日打敗仗，１０天、２０天及５０天線統統穿晒。後市唔明朗，成交想旺都難，
全日得番逾５２１億銀咋！

＊銀娛業績靚街坊同風騷，砵砵入後波長汽很糟糕＊

　　賭仔阿哥銀娛中午公布季績，由於第三季經調整ＥＢＩＴＤＡ多咗２８個巴仙至２７億銀，
好過預期。大摩仲維持「增持」評級，令銀娛最終飛起近２巴仙，報３２﹒０５銀，係最威水藍
戰士。街坊金沙亦跟住走上逾１巴仙，報３５﹒５銀。二線賭仔勵駿（０１６８０）都叨叨光，
有逾３巴仙落袋，恭喜！
　　反之，砵砵車就無陰功呀，公布咗業績嘅長汽（０２３３３）一開波就係咁碌，事關賓架瑞
信話公司三季度業績比預期差，其他賓架都好緊張毛利下跌情況，是以就算阿爺發布個新能源砵
砵車技術路線圖都無用啦！長汽跌唔斷氣，全日唔見咗逾１１巴仙，收報８﹒１１銀，慘絕人寰
！街坊升咗唔少嘅吉利（００１７５）都要被拖累，真係多得佢唔少，最後跌低逾３巴仙，報
８﹒８銀。

＊資金要避險金價三周高，金股收到了今天跳隻舞＊

　　資金要避險，黃金自然成為資金避難所，金價升至近３個禮拜高位。金價好，金股好，招金
（０１８１８）今日彈起近４巴仙，收報７﹒７８銀；紫金（０２８９９）第三季多賺１﹒５倍
至８﹒９億人仔，另外有傳佢連同山東黃金（滬：６００５４７）收購阿根廷金礦，亦都升起３
巴仙，報２﹒５銀。
　　美國期油跌穿５０蚊美金關口，「三桶油」應聲向下，中石化（００３８６）唔見２巴仙，
報５﹒７６銀；中海油（００８８３）同埋中石油（００８５７）亦齊齊跣低逾２巴仙，各報
１０﹒４８銀同５﹒５２銀。油服佬亦腳軟，宏華（００１９６）同百勤油服（０２１７８）都
好慘，急瀉近６巴仙同逾半成。

＊蘋果績唔曳瑞聲即見勢，野村薦金軟ＱＱ有點曳＊

　　蘋果公司（Ａｐｐｌｅ）公布咗第四季業績，季內公司嘅「唉瘋」（ｉＰｈｏｎｅ）銷售量
係連續第三個季度下跌，令到香江相關手機佬表現都唔太好；不過查實個銷售數字仲係高過預期
！孖屐最後留意到呢點，支撐返手機佬跑返上。瑞聲（０２０１８）最終收報７５﹒８５，有２
巴仙落袋；通達（００６９８）有德銀護航，亦有１巴仙落袋。
　　另一方面，野村重申金軟（０３８８８）買入評級，目標價維持喺２５銀，金軟今日再飛起
１巴仙，報１８﹒１６銀，成功收復返十天線（１８﹒０７４銀），都叫做有所交代。ＱＱ
（００７００）就只係輕微倒行逾１巴仙，報２１２﹒２銀，都算硬淨！

＊開卷果有益自有黃金屋，浩德急插水６７４也碌＊

　　里昂唱好楓葉教育（０１３１７），認為增長符合預期，今日逆市彈高６巴仙，報５﹒７６
銀。同行香港教育（０１０８２）仲犀利，完成配股，炒高１３巴仙，報０﹒８７銀。
　　半新丁浩德（０８１４９）未止瀉，繼噚日急插６９巴仙後，今日再蒸發近６３巴仙，報
０﹒８９銀，但仍然高過配售上市價（０﹒４２５銀）１﹒１倍，係今日最渣個股。
　　文化地標（００６７４）獲北京天安科創置業主席陳偉武折讓近３９％提要約，但復牌後大
跌近１９巴仙，收報０﹒４４銀。謝謝！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。