《小傳日記》聖誕鐘，買匯豐！半新股，炒到瘋！

　　《小傳日記》「聖誕鐘，買匯豐」，鐘聲再次響起！噚日（６日）大象（００００５）喺密
密回購同大摩奏魔笛刺激下，重振象威，領軍大市。個勢咁勁，梗係唔好畀佢停，噚晚大象就豪
掟４１６３萬英鎊回購，係８月份回購計劃開始以來最大手筆嘅一次。有大行撐，又大手回購，
難怪今日繼續向前衝，以逾３巴仙升幅奪最威水藍戰士！
　　雖則大象咁勇猛，但其他重磅藍戰就唔係太爭氣，港股開１２９點報２２８０５，之後都冇
太大變動。恆指埋單收漲１２５點報２２８００，國指微漲６０點報９８２９。
　　由於重磅股無鑊氣，只得一班魚毛仔半新丁輪住炒，魚缸全日成交依舊咁靜，只得６２５億
銀左右。

＊回購超豪爽大行來添花，大象領魚缸認真誇啦啦＊

　　大象繼續變身飛天象，大手筆回購帶動下，再開心飛上超過３巴仙，報６５﹒５銀，今日最
高紀錄６５﹒６銀，接近一年半後首次突破６５銀大關！同行渣打（０２８８８）都水漲船高，
爬上近３巴仙至６５﹒３５銀。
　　生發發（００３８８）自從「深港通」通車之後就一直頭耷耷，無法收復２００銀關之餘，
仲要三連跌，好失望！今日再跣走逾１巴仙，報１９３﹒６銀，回到９月初位置。同樣係大隻佬
嘅長和（００００１），全日都走落超過１巴仙，報９２﹒６銀。
　　缸湖傳聞禮拜六（１０日）開始，為防走資，內地客唔可以喺香江碌信用卡投保。連最後一
招都要封，友邦（０１２９９）無咗唔夠１巴仙，報４５﹒１銀。

＊生發發友邦你愁我亦愁，大上大落間半新股高收＊

　　半新丁上落甚大，極為波動，散場仍包攬晒升幅榜頭幾位。做原材料嘅盟科（０１６２９）
大爆近５３巴仙，報１﹒３９銀，盤中更高見２﹒１４銀，成為今日升幅王！
　　做工業製品嘅桐城（０１６１１），以噚日收市價計，市值４﹒６億銀，加上大股東揸七成
，細細粒容易炒，盤中高見２﹒１銀，比招股價１﹒５銀高四成，不過好快散水，埋單得番近７
巴仙落袋收１﹒６３銀。創業板嗰邊，上市第四日嘅金匯教育（０８１６０），今日反彈逾４０
巴仙，報０﹒３６５銀，比配售價０﹒２０５銀高出７８巴仙，勁！
　　建築股進昇（０１５８１）超購５３０倍聽日掛牌，影子股汛和（０１５９１）今日先飆前
近２４巴仙，報０﹒１２５銀。

＊樂視網大跌酷派亦閉翳，長汽與吉利暢銷好氣勢＊

　　由於樂視體育傳出裁員消息，樂視網（深：３００１０４）噚日大跌，傳聞樂視網股價已經
跌穿老細賈躍亭押股嘅平倉線！事件發酵之下，連累旗下酷派（０２３６９），孖屐擔心酷派會
有套現壓力，全日插近１３巴仙，報０﹒７銀，創超過四年新低。
　　車股齊齊出上月銷售成績，長汽（０２３３３）上月多賣超過４３巴仙，大家都要拍掌讚好
，開足馬力衝前逾半成，報７﹒５９銀，吉利（００１７５）銷量創新高，瑞信都唱好，跟隨突
破超過４巴仙，報８﹒３銀。不過北汽（０１９５８）旗下北京現代銷量上升超過１５巴仙，缸
友仍然唔滿意，回落超過１巴仙，報７﹒１銀。

＊美記舖盈喜媽媽也歡喜，瑞信來祝福鋼鐵即彈起＊

　　之前煤價漲，而家就鋼價接力，唔通神州經濟真係重回正軌？上海期貨交易所螺紋鋼期貨合
約，曾經一度高見自２０１４年３月以嚟嘅高位，消息吹起晒今日啲鋼鐵股。賓架瑞信話，出年
鋼鐵同水泥會係神州商品需求之中，最受惠嘅兩個行業喎！馬鋼（００３２３）、鞍鋼
（００３４７）點會唔郁呢？兩者即刻彈起逾７同近１０巴仙，報２﹒１９銀同４﹒９銀，認真
威風！
　　美聯工商鋪（００４５９）發盈喜，預料全年綜合淨溢利會增加，今年頭１１個月錄得綜合
淨溢利大約１５００萬銀，股價今朝高開近１４巴仙，不過之後升幅略為縮窄，最後都有９巴仙
落袋，恭喜晒呀！講升幅，美聯集團（０１２００）就「相對」細好多啦，公司雖然預計全年虧
損大幅收窄，但佢仍然每股派５股美聯工商鋪做中期息，股價有逾６巴仙進帳，報２﹒５４銀。
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。