即市新聞

23/03/2017 17:55

《小傳日記》高息夢落空,中移面燶燶!

  《小傳日記》香江魚缸噚日(22日)被花旗魚缸嚇到頭暈暈,碌低咗272點,好彩噚晚
道指無再發生餘震,只係象徵式收跌6點至20661,齊齊睇實「侵侵」醫保議案能否通過先
再出擊。
  見到道指跌勢喘定,香江今朝(23日)都高開60點,試圖振一振士氣,仲最多衝前
146點。不過股王QQ(00700)績後獲利回吐;再加埋祖國移動(00941)中午派
成績表,莫講話大行吹嘅40蚊,連4毫子特別息都無,搞到隻股午市回來急跌逾3巴仙,恆指
亦一度無晒升幅。收市恆指升7點報24327。中資金融股撐住,國指跑贏大市,收漲30點
報10487。
  業績期進入高峰,缸友炒股不炒市,成交逾918億銀。

*等侵侵醫改花旗企定定,中移衰孤寒超人特別醒*

  萬眾期待,QQ噚日放榜,第四季純利為105﹒3億人仔升47巴仙,略嫌差過預期。雖
然有麥格理、瑞信升目標,亦有大和同野村上望260銀,但QQ依然碌低1巴仙,報223銀
,曾穿十天線(約220﹒5銀)。
  中移動舊年賺1087﹒4億人仔冇咩增長,僅僅符合預期,但豪派特息希望幻滅,缸友心
碎離場,結果就急急瞓低逾3巴仙,報87﹒25銀,連牛熊線(約88銀)都失守埋,慘。
  至於一向有保證嘅超人一號(00001),上年溢利330億多6巴仙,比預期好,末期
息都增加至1﹒945銀,野村出聲叫買,全日衝前逾1巴仙,收97﹒8銀。
  平保(02318)成績都唔錯,上年多賺15巴仙,旗下陸金所更加可以嚟香江上市,摩
通維持超高目標價84銀不變,平保埋單應聲跳高近1巴仙,埋單43﹒65銀。

*大行齊睇上瑞聲望紅底,3月升六成IGG好揮*

  績靚嘅瑞聲(02018)喺過去幾日,表現都唔算突出,但今日有唔少大行發功唱好,多
間大行都睇好可以晉身「紅底」一族,難怪一飛沖天,升咗超過一成,收95﹒25銀,仲一度
破埋頂,山頂位去到95﹒35銀,變身紅底股指日可待。手遊佬IGG(00799)嘅成績
表相當靚仔,今日又坐火箭,升咗超過9巴仙,報8﹒93銀,最高去到9﹒07銀,三年新高
。成個3月份足足升咗超過六成,相當巴閉。
  香江同神州暫停進口森巴國嘅豬肉,環球豬肉佬萬洲(00288)就話機會嚟喇,大和又
話佢舊年業績靚仔,聽到班缸友鬼死咁興奮,呢個豬肉佬就咁升咗接近一成,報6﹒66銀。同
樣具有內需概念嘅神州家電佬海爾電器(01169)又有大行睇好,被三間大行調高目標價。
其中,中金仲話佢嘅市佔率會枕住有得升。而令缸友們歡喜嘅係,海爾派息闊佬咗好多,增加咗
四成二,資金當然蜂擁而上,全日爆升近13巴仙收17﹒66銀,仲創過19個月新高見
17﹒78銀添。

*森巴好頭痕萬洲甚興奮,碧桂園SOHO升得真開心*

  神州磚頭佬之中,最巴閉莫過於碧桂園(02007)同SOHO(00410)。碧桂園
獲花旗急升「他屐」至7﹒59銀兼籲「買入」,話受惠行業「超級整合潮」,今日飛起6巴仙
,報7銀。街坊SOHO去年利潤9﹒1億人仔多逾69巴仙,又派特息34﹒6分,唔執輸彈
高近8巴仙,報4﹒56銀。龍頭中海外(00688)績後卻連日受壓,再跣低近2巴仙,得
返23﹒95銀。
  李寧(02331)即使上年淨利急增44倍,但因為要投入專業舞蹈運動服裝新品牌,短
期內都唔考慮派息。最終李寧趴低近8巴仙,收報4﹒7銀。

*南航遇知音街坊更震奮,李寧被質低皆因揸得緊*

  神州鐵鳥又再度升空,皆因有缸友八到美航計劃揼2億美金入股南航(01055)。南航
開市前停飛,話有重大戰略合作公告,睇嚟好事近喇。鐵鳥界有好消息,一哥國航
(00753)就飛高超過3巴仙祝賀,報6﹒52。最高就去到6﹒62銀,創15個月高位
。食正米奇老鼠概念嘅東航(00670),雖然迪士尼開咗之後,表現麻麻,但今年加埋都升
咗超過三成,而今日都飛高近3個巴仙,報4﹒8銀,最高就去到4﹒99銀,創17個月高位

  相反,首都機場(00694)就斯人獨憔悴,仲要比大和踩多一腳,全日跌咗超過2個巴
仙,報9﹒26銀。
  噚日開足TURBO嘅吉利(00175),今日就入咗後波打倒褪,即使有瑞信同大和出
嚟幫拖,並調高目標價,但都要跌1個巴仙,報11﹒86銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新etnet健康網購,送你【健骨維他命D3(1000IU)】乙樽(價值$108)► 立即行動!

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 落單即送保健品!