《小傳日記》道指八連敗，侵侵勁失威；香江成交靜，賭仔好氣勢！

　　《小傳日記》侵侵第一個重大立法行動失敗，狂人光環失靈，噚晚（２７日）道指連續八日
打敗仗，創近六年來最長跌勢，收跌４５點報２０５５０。
　　不過香江反而無受影響，今朝高開１３５點後就喺十天線（約２４３０３）水平浮浮沉沉，
除咗賭股有Ｄ鑊氣外，其他魚毛都無咩衝勁，所以成交明顯又靜番ＤＤ，比噚日減少２２巴仙至
近６９５億銀。
　　加上仲有兩日就係期指結算日，觀望氣氛比較濃，不過恆指埋單都收升１５２點報
２４３４５上番十天線，讚；國指就踢高６３點報１０４２５。

＊駿傑再上場復牌受重傷，花旗冷箭出康哲往下摔＊
　
　　繼上周輝山乳業（０６８６３）高台跳水後，今日駿傑（０８１８８）舊戲重演，第一日復
牌旋即大插水超過八成，收０﹒６１銀，「順理成章」成為跌幅排行榜第一位。
　　神州醫藥佬康哲藥業（００８６７）成績再好也敵不過大行嘅冷言冷語，花旗將康哲評級狠
狠地由買入降到去沽售，目標價就由１２﹒３銀降至１０﹒１銀，拖累康哲應聲插超過６巴仙，
報１３﹒４６銀。
　　有米雪同三哥做生招牌嘅御藥堂（００９３２）就相當好命水，今日又再次升近６巴仙兼破
埋頂，山頂位去到４﹒６５銀，收報４﹒６２銀，三月至今升咗超過３６個巴仙。
　　神州奶粉佬合生元（０１１１２）今日表現大坐過山車，朝早一度最多升近９巴仙，高見
２６﹒９５銀，其後急速下瀉，全日只係升咗近１巴仙，報２５銀。

＊融創增派息表現好招積，辣招恐殺到磚頭好苦惱＊

　　神州磚頭佬鹹魚翻生，即使融創（０１９１８）舊年賺少咗二成半，但係呢個磚頭佬依然慷
慨解囊，派息大增超過三成，缸友們當然十分歡喜，即刻趁機會入市掃貨，全日急升近９巴仙，
仲要成功登頂，最高去到１０個半，收報１０﹒２６銀。
　　碧桂園（０２００７）雖然爬得冇融創咁快，但係都升咗近半成，最高去到７﹒４銀，係九
年以來最高紀錄，收報７﹒１８銀。
　　即使今日魚缸都升超過百點，香江磚頭佬今日就冇乜力水，皆因花旗出嚟話港府會有新一輪
樓市辣招，仲估話今年樓價會下跌１５巴仙，維持香江磚頭佬減持評級。長實（０１１１３）跌
近１巴仙收５３﹒４５銀，恆地（０００１２）、新地（０００１６）升市中無收穫。

＊大行齊力撐永利向上攀，彈珠同落鑊氣勢更磅礡＊

　　摩通繼續估馬交３月賭收會按年升１０至１５巴仙，又叫「增持」永利馬交
（０１１２８），佢應聲彈高逾４巴仙，報１６﹒１２銀。銀娛（０００２７）早排獲匯證升「
他屐」至５０﹒５銀，今日亦跳高近４巴仙，報４２﹒６５銀。新濠國際（００２００）更誇張
，飆高逾７巴仙，埋單１３﹒８８銀。
　　東瀛幾隻彈珠機佬都落鑊，ＮＩＲＡＫＵ（０１２４５）火箭式直升逾２４巴仙，報
１﹒０２銀；ＤＹＮＡＭ（０６８８９）都跟住彈起７巴仙，收報１４銀。

＊阿媽明放榜聯想沒法擋，順風料轉虧績前被質低＊

　　聯想控股（０３３９６）聽日就會放榜，率先行前近２巴仙，報２０﹒１５銀；佢個仔聯想
集團（００９９２）仲叻，衝前逾４巴仙，收５﹒０８銀，係全日最好打藍戰士。
　　友邦（０１２９９）獲麥格理維持「中性」評級，目標卻只得４７銀，一度微微碌低，好在
最尾冇升跌，報４９﹒３銀。
　　順風清潔能源（０１１６５）之前預告過上年會轉盈為虧，大嗱嗱蝕成２４億人仔，缸友趁
佢今日拎成績前散水，直插逾７巴仙，得返０﹒５２銀。
　　東方電氣（０１０７２）趴低逾６巴仙，報７﹒９銀。佢喺Ａ場啱啱復出，話打算發Ａ股買
母企資產。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。