《小傳日記》產油國達成延長減產協議，但只得９個月，孖屐預期嘅係１年，所以對此覺得
失望都唔出奇，而外圍油價就借Ｄ意下挫近５巴仙，創下逾一周低位。不過，外圍魚缸又無畀呢
項消息大力打沉士氣，因為花旗嗰邊亞馬遜破頂，令道指連漲六日，納指同標指更加再創新高，
分別高見６２１７點同２４１８點。香江魚缸朝早亦都跟隨彈起４０點，之後喺內險股造好之下
，一度攀升最多９３點，高見２５７２４點，創近２３個月新高。
不過，賣油佬同聯想（００９９２）回調拖累之下，魚缸曾經低見２５５８８點，好彩最後
埋單計都有８點或０﹒０３巴仙升幅，報２５６３９點，同花旗魚缸一樣成為六連升，累計升幅
達２巴仙；而一星期計，魚缸就有１﹒８巴仙進帳，好叻呀！
國貨表現一般，飛起０﹒０８巴仙或８點，報１０５７９點，主板成交６５６億銀。
＊全周升２％魚缸好叻仔，平保上山頂臨尾有點翳＊
神州保險佬今朝好威威，一哥平保（０２３１８）更加係一騎絕塵，過去四日升咗８巴仙，
仲幾乎每日創２２個月新高，今日最高去到５０﹒９銀，但上到山頂就見腳軟，收市跣低唔夠１
巴仙，報５０銀。國壽（０２６２８）今日都創咗近年半高，今日最高去到２５﹒７５銀，但臨
尾都亦跣低近１巴仙，報２５﹒３５銀。中再保（０１５０８）亦好巴閉，全日飛起近２巴仙，
報１﹒７８銀。
聯想集團（００９９２）有頭威無尾陣，今日高佬同中金唱淡之後就被缸友掟貨，最多無咗
近４巴仙，全日埋單都係跌咗超過３巴仙，蒸發晒噚日近４巴仙嘅升幅，報４﹒８８銀。
＊油價插得急油股未被質，鐵鳥齊高飛國航曾好得＊
油價跣低之下，但香江賣油佬勉強都守得住半壁江山，中海油（００８８３）、中石油
（００８５７）齊齊唔見近１巴仙，報９﹒０８銀、５﹒２９銀。而中石化（００３８６）就有
風話公司邀請錢莊，下星期三提交安排分拆旗下銷售公司嘅計劃，支持股價走上近１巴仙，報
６﹒３８銀。油服佬表現就波動Ｄ，巨濤（０３３０３）今日創近３年高高見３﹒３９銀之後，
倒插逾８巴仙，報３﹒０３銀。中海油服（０２８８３）亦唔見逾１巴仙，報７﹒０９銀。
不過油價成本低咗，利好一班飛機佬。東航（００６７０）飛起逾１巴仙，報４﹒４７銀。
而國航（００７５３）同南航（０１０５５）就仲勁，前者曾經飛起逾９巴仙高見７﹒８４銀見
逾年半高，後者亦曾飛起近７巴仙創近年半高。最後埋單兩者都有逾３巴仙落袋，報７﹒４１銀
、５﹒７８銀，勁！
＊復星有大刁粉絲齊鼓掌，瑞信畀個讚信利高意高漲＊
復星國際（００６５６）重組獲得董事局開綠燈，話要入股喺Ａ場上市嘅豫園
（滬：６００６５５），大嗱嗱揸住差唔多七成股權，之後缸友就入場掃貨以示支持，跑起超過
３巴仙，報１２﹒０８銀。
整手機「芒」嘅信利國際（００７３２）前排話頭三個月會賺少七成，但今日就被瑞信唱好
，話已經預左上半年成績唔好睇，仲話下半年會有新手機推出同佢個仔信利光電會喺Ａ場上市，
就將佢嘅「他屐」升到去３﹒３銀。大行畀個讚，信利全日最多爆升超過８巴仙，埋單升咗近半
成，報２﹒６９銀。
嘉利國際（０１０５０）發盈喜話會賺多四至五成，但股價今日坐穩過山車，踢起超過７巴
仙後就碌返落嚟，埋單只喺升咗唔夠１巴仙，報１﹒２６銀。
豬肉佬萬州國際（００２８８）今日比高佬唱好，「他屐」升８巴仙去到８﹒５銀，順便畀
埋「入貨」評級，全日最多升咗近４巴仙破埋頂，去到７﹒１７銀插旗，埋單有超過２巴仙升幅
落袋，報７﹒０９銀。
＊高佬薦萬洲港視再高收，７５９異動股仔玩伸手＊
魚缸魚仔呢排都陸續有鑊氣，而且火候仲好猛！港視（０１１３７）今日再飄起逾８巴仙，
報２﹒４銀，查實公司股價連升六日以嚟，已經累計踢起逾４１巴仙啦！
同樣係本地薑，人稱「７５９」嘅嘅ＣＥＣ國際（００７５９），今日突然衝高２１巴仙，
報０﹒８７銀，認真犀利！
ＳＤＭ（０８３６３）折讓近６巴仙配股，淨籌２８５１萬銀，股價飛上近８巴仙，報
０﹒５５銀。同樣配股嘅金寶寶（０１２３９）就選擇溢價配股，配售價６仙，較前收市價溢價
成兩成八！股價曾經飛上２６巴仙高見０﹒０５９銀，不過之後升幅縮細晒，堆單只係踢起逾４
巴仙，報０﹒０４９銀。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
