《小傳日記》大象向上撲，船佬大搞作！

　　《小傳日記》花旗魚缸上星期五（７日）公布非農就業數據，表現勝預期，缸友對當地經濟
愈來愈有信心，刺激道指抽高９４點報２１４１４。另一方面，祖國今日（１０日）亦公布６月
份ＣＰＩ上升１﹒５巴仙，而ＰＰＩ就漲５﹒５巴仙，兩者都符合預期，缸友暫時放下心頭大石
。
　　外圍數據無咩沖喜作用，但香江魚缸今日都好多消息，最矚目嘅非東方海外（００３１６）
高價賣盤畀中遠海控（０１９１９）莫屬；而北水愛股美圖（０１３５７）回吐、祖國磚頭大哥
萬科（０２２０２）又被股東掟貨同內險佬發威，亦都係眼球焦點。而對一眾大象
（００００５）粉絲嚟講，今日大象變飛象，就更加可喜可賀啦！
　　今日恆指微微高開５１點後，最多彈高２８１點至２５６２２，差ＤＤ連十天線（約
２５６２５）都收復埋。可惜，油佬打敗仗，大市得返１５９點進帳收２５５００，僅僅企高
５０天線（約２５４８６）之上；國指更加無晒面，碌低３７點報１０２１４。
　　再睇埋魚缸成交，有咁多單大「刁」之下，都只係得近８０２億銀，睇嚟缸友食花生觀望指
數極高喎！
　
＊高溢價賣盤董船漲兩成，中海控接貨表現甚精靈＊
　
　　前特首董伯伯家族旗下東方海外早排先否認賣盤，但轉過頭就宣布，最終落實賣盤畀中遠海
控，每股作價７６﹒８７銀，大拿拿較前收市價溢價３１巴仙咁多，缸友一開波就不問價衝入去
，東方海外隨即炒起兩成，報７２蚊，中遠海控就踢高逾５巴仙收４﹒２９銀。
　　藍戰士領展（００８２３）都好好景，事關佢獲瑞銀升目標價同埋評級，話現價仲未反映租
金收入持續改善呢個因素，結果佢衝前３巴仙，報６０﹒８５銀。
　　聯通（００７６２）亦好威，連續趴低６日累插近１１巴仙之後今日見反彈，野村仲好有信
心咁重申買貨評級，全日踢高近４巴仙，報１０﹒８４銀，仲做埋最叻藍戰士添！
　
＊領展與聯通有大行祝福，熱錢來簇擁保保谷一谷＊
　
　　個別神州保險佬繼續有熱錢推高，阿爺繼續加強對行業嘅監管，話要實施保險銷售行為可回
溯管理，財險（０２３２８）錄得近４巴仙進帳，報１４﹒８２銀，盤中高見１４﹒８８銀，見
２０１５年１２月以來新高，而平保（０２３１８）就有逾１巴仙落袋，報５４﹒８銀。
　　大象真係威威，今日又高見２００８年１０月以來新高，最高為７４﹒８５銀。孖屐有消息
指，大象分拆嘅米字國零售銀行已經得到當地監管機構發行牌照，消息令大象行前咗近２巴仙，
報７４﹒６銀。名嘴熊麗萍喺《經濟通》個欄叫買三大發鈔行；今日除咗大象靚爆外，隻中銀
（０２３８８）同渣打（０２８８８）亦分別升逾１％同２％，渣打仲破頂添。噢！原來係三大
靚到發癲行！
　　國際保險佬ＡＩＡ（０１２９９）都好得，得到賓架大和將目標價抬高，今日衝前近２巴仙
，報５６﹒２５銀。
　
＊三大發鈔行你追我又趕，美圖過山車ＡＩＡ領放＊
　
　　萬科跣低近４巴仙，得返２２﹒７銀，皆因有機構投資者折讓掟貨，賣出９２００萬股Ｈ股
，套現２１﹒３億；而美圖上星期一（３日）畀Ｔｉｇｅｒ　Ｇｌｏｂａｌ　Ｍｇｔ場外減持４
億股，相當於９﹒４２巴仙股權，涉及３４億銀，而佢今朝開賽前後就錄得總共２﹒１億股大手
。美圖坐過山車咁，最多衝上近半成，但最終碌返低近６巴仙，報１０﹒３８銀。
　　ＱＱ（００７００）旗下手遊《王者榮耀》繼續成為孖屐焦點，有傳最快秋季會喺花旗國推
出，但阿爺依然窮追猛打，批評佢將歷史人物改到面目全非。ＱＱ卻一於少理，企高１巴仙，收
２７１﹒６銀。
　
＊融創有大刁１６９飛升，利福多動作走勢亦好醒＊
　
　　萬達集團決定向融創（０１９１８）出售１３個文化旅遊城項目股權同７６間酒店，單「刁
」大嗱嗱成６３１﹒７億人仔。萬達酒店（００１６９）一度火箭式飆升１﹒５５倍，創約兩年
高１﹒４８銀，佢之後發不明升因，表明交易對佢無直接影響，埋單得返近４７巴仙落袋，報
０﹒８５銀。至於融創今朝就宣告停賽，話係同非常重大收購消息有關。
　　利福地產（０２１８３）動作多多，控股股東Ｍｅｇａ　Ｒｅｇａｌ配售逾７巴仙股權，以
恢復公眾持股量，又斥資１１億人仔成立合營，參與神州土地投標、物業開發項目，仲打算改名
做「三盛控股」。佢急急飛起逾１７巴仙，收報７﹒４銀，曾經破頂高見７﹒９８銀添！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。