《小傳日記》魚缸噚日（２５日）微升５點，加上夜期造好，花旗嗰邊標普５００指數同納
指都創下紀錄新高，令到好友今日繼續跳舞。藍戰士友邦（０１２９９）一開波就高見６０蚊破
頂，魚缸因此而高開１０８點創兩年高位，之後仲愈升愈有！十點鐘未夠，魚缸就飛越兩萬七關
口，去到２７００７點，可喜可賀！雖然之後有ＤＤ回軟，但魚缸整體仍然保持到強勢，最終以
２６９４１點埋單，有８８點或０﹒３巴仙進帳。全日主板成交就只得８６３億，同噚日
（７９６億銀）相比，多咗８巴仙。
Ａ場方面報３２４７點，收升３點；國貨佬就跳起４８點，報１０８３１點。
缸外缸內都熱到爆，香港時間周四（２７日）２：００ａｍ花旗公布議息結果兼發出會後聲
明，大家要昅實啦！
＊昅實美議息好友仍有力，恆大發盈喜缸邊夠招積＊
內地磚頭恆大（０３３３３）預計半年多賺２倍左右，話係因為樓價上升同交樓建築面積急
增，大摩亦走出來估佢全年可以賺３００億人仔，比原先預期多好多，但就維持「持平」評級，
同埋１６﹒２銀目標價不變。雖然摩笛無奏，但恆大依然坐火箭咁升高１８巴仙，收報２０﹒９
銀。
街坊融創（０１９１８）配股「吸水」搞到噚日趴低超過７巴仙，今日就跟恆大彈番起逾４
巴仙，收報１９﹒３８銀，總算無咁傷；給你一個五星級的家嘅碧桂園（０２００７）亦唔執輸
，跑前近４巴仙，埋單９﹒８６銀。
＊大象唞一唞ＡＳＭ狂嘔，細摩來踐踏永利如遇咒＊
大笨象（００００５）下禮拜一（３１日）就放榜，炒業績同埋憧憬回購之下，今日股價曾
一度炒到上７７﹒６銀創超過９年高位，但之後要唞唞氣，收報７６﹒５５銀，微跌３格。
ＡＩＡ（０１２９９）就後日（２８日）派成績表，績前獲匯證重申「買貨」評級，今日表現仲
威，除咗最終彈起逾１巴仙，報５９﹒６５銀外，仲試過高見６０蚊破頂添！
ＡＳＭ（００５２２）半年賺多咗兩倍去到１４﹒９億，派１﹒２銀，但揸Ｆｉｔ人就估部
分業務新增訂單第三季度可能會減慢。大摩雖然重申買貨評級，但都係要跣低近１３巴仙，報
１０６﹒５銀。
賭仔永利（０１１２８）阿媽公布業績時順手派埋阿仔成績表，永利第二季多賺近５８巴仙
去到１億美金，摩通就話雖然ＥＢＩＴＤＡ好過預期，但就覺得永利皇宮表現無預期咁好，結果
跪低逾４巴仙，報１６﹒７４銀。
＊油價急急升油佬特別醒，阿爺夠關顧資源確精靈＊
由於沙特唔畀咁多原油出口，同美國石油生產商降低資本開支，國際油價昨日升至超過一個
月來嘅最高價，布蘭特９月期油同美國９月期油齊齊升超過３巴仙。油價係咁升，「三桶油」都
唔示弱，個個變晒超級藍戰士，中石油（００８５７）開咗冇耐，就彈高近４巴仙至５﹒０８銀
，收市前都仲有力，埋單彈起逾３巴仙，報５﹒０５銀，係表現最好嘅藍戰士，街坊中海油
（００８８３）成績都幾好，跳起逾２巴仙，報８﹒７７銀，係第二打得嘅藍戰士；街坊中石化
（００３８６）上揚近２巴仙，報６﹒０１銀。
＊糖果果然甜升破十天線，６５１急插中途要休戰＊
除咗油價造好之外，銅都唔執輸，倫敦金屬交易所（ＬＭＥ）３個月期銅同紐約ＣＯＭＥＸ
的９月期銅，分別上升超過３巴仙同４巴仙，齊齊創兩年新高，銅價期貨亦創兩年新高。仲有，
阿爺確認出年底禁止進口７類廢金屬製品，上海銅價開心跳升！咁多好消息刺激，五礦資源
（０１２０８）同街坊江西銅（００３５８）分別跳高逾６巴仙同近５巴仙，報３﹒１９銀同
１３﹒８２銀。
中國糖果（０８１８２）唔知係唔係平時食得太多糖果，今日佢嘅股價就好似血液中嘅血糖
指數咁不斷上升，一度爆升近４８％，更升破十天線（０﹒２１銀），收市跑前近３９巴仙，報
０﹒２３４銀。
今日最傷嘅就係中海重工（００６５１），朝早突然風高浪急，急插近７０巴仙，之後仲中
途停牌，得番０﹒０４５銀。依家就仲未知發生咩事，唯有等佢公布消息喇。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
