《小傳日記》花旗聯儲局今晚開始，一連兩日開會傾息魔時間表，基本上孖屐都預咗９月份
唔會加息，只係等緊一姐耶倫有無特別嘢講。噚晚（１８日）道指都無咩影響，收升６３點報
２２３３１。
雖然外圍氣氛靜靜地，但係香江魚缸噚日衝得太勁，今朝微微高開４０點後，升到去
２８２４８點左右就唔夠力，就算有大象（００００５）發力頂住，逆市升近１巴仙都無用。恆
指收市碌低１０８點收報２８０５１；個別內房雖然仲有鑊氣，但其他股份都選擇唞氣；加上重
磅內險佬頭耷耷，國指收市都要唔見７０點報１１１２５。
魚缸炒股不炒市，除咗板塊輪住炒之外，細股都好有鑊氣，全日魚缸成交雖然無噚日咁多，
但都有９６６億銀左右。讚！
＊內房兩邊走中海外唞唞，融創四條三逆市高高收＊
近排熱炒嘅內房開始兩邊走，大阿哥中海外（００６８８）係今日跑最尾嘅藍籌股。隻股連
升咗三日後，今日就腳仔軟喇，全日股價碌低近３巴仙，報２８﹒４５銀。
萬科（０２２０２）逆市吹起咗近１巴仙，報２８﹒３銀；潤地（０１１０９）破頂見
２７﹒４５銀後見獲利回吐，收市衝前唔夠１巴仙報２７﹒２銀；融創（０１９１８）畀花旗升
佢「他屐」，由３１﹒８銀升到去３９﹒８銀，仲畀佢「掃貨」評級添，見到六連陽之後，今日
繼續飛起逾９巴仙，報３７﹒６銀，勁；四條三恆大（０３３３３）亦都唔輸蝕，全日行前逾１
巴仙，埋單２８﹒１銀。融創同恆大又再齊齊寫下上市新高添！
＊ＱＱ好腳頭廣汽急急抽，瑞銀來唱好生發發卻愁＊
廣汽（０２２３８）同股王ＱＱ（００７００）合作搞智能駕駛同大數據等業務，瑞信仲升
埋廣汽目標價去到２１蚊，缸友一聽到同股王合作即刻流曬口水，炒起廣汽近半成，收報
１８﹒１２銀；ＱＱ就腳軟半個巴仙收報３４４﹒２銀，但試過高見３４９﹒６銀破頂！
其他砵砵車都踩油衝前，吉利（００１７５）獲招商證券重申「買貨」評級，一度跑前半成
，但後來無咩力，得返近２巴仙升幅，報２２﹒７銀；長汽（０２３３３）跑前近４巴仙之後都
抖抖，全日行前唔夠半個巴仙，報９﹒９９銀，１０蚊轉格位阻力果然唔細！
大隻佬生發發（００３８８）噚日發力飆前逾４巴仙之後，瑞銀出嚟唱好佢仲升埋「他屐」
去到２４５蚊，今日仲曾經闖破２２０蚊關，但午後見沽壓，腳軟近１巴仙收場，報２１６﹒４
銀。
＊協鑫母與子謝謝了海通，恆大兩囝囝缸邊好輕鬆＊
早前獲海通國際升目標價去到１﹒３５銀嘅保利協鑫（０３８００），今日彈起近７巴仙，
收報１﹒０９銀；阿仔協鑫新能源（００４５１）亦好生猛，仲叻過阿媽，自己跑前１４巴仙，
報０﹒５７銀。
恆大兩個仔今日表現都唔錯，恆大健康（００７０８）彈高兩成，報２﹒４銀，曾高見
２﹒４８銀創近兩年高位；另外恆騰網絡（００１３６）亦都有近２巴仙進帳，報０﹒２９銀。
阿里巴巴聽日（２０日）將會推出「超級九月」促銷活動，協助降低中小企喺內地採購旺季
期間嘅國際貿易限制，阿仔阿里健康（００２４１）今日藉機炒起近９巴仙，報３﹒９２銀。
＊２４１炒上金斯瑞插低，鴻騰與丘鈦連跌甚閉翳＊
金斯瑞（０１５４８）之前獲納入恆生港股通指數，同埋港股通（深）名單。佢哋今日就突
然宣布，正就新技術治療病人的死因展開調查。集團旨在喺約七日之內，就呢個調查向所有試驗
研究者發出初步報告，結果今日股價冇咗近９巴仙，報７﹒６８銀。
手機設備股今日就唔好彩喇，鴻騰精密（０６０８８）繼噚日急挫約１０巴仙兼失守廿天線
（６﹒２２５銀）之後，今日繼續跌逾６巴仙，報５﹒３８銀；神州手機鏡頭佬丘鈦
（０１４７８）連跌咗兩日後，又繼續碌低逾６巴仙，報１３﹒０６銀。謝謝！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
