即市新聞

19/10/2017 18:04

《小傳日記》狂插六百點,屠牛兼散水!股災三十年,好友也心碎!

  《小傳日記》噚晚(18日)花旗國魚缸風生水起,IBM成績表靚仔帶動道指彈起160
點升破兩萬三,香江今朝都食住個勢高開72點,仲試過創十年高位,高見28798點。但侵
侵未來呢幾日就會公布下任聯儲局揸Fit人人選,本地磚頭佬心神不定腳軟軟,香江魚缸慢慢
由升轉跌。
  雖然祖國第3季GDP增6﹒8巴仙,符合預期,但消息未能撐番起個魚缸,更加有分析師
嫌個數字有所回落。魚缸午後相當恐怖,曾經一度急插617點或逾2巴仙,低見28094點
,最神奇嘅係28150點至28199點原來有大量牛證街貨,屠完74隻牛之後跌幅即刻收
窄返,相當有可疑。收市恆指唔見552點或1﹒9巴仙,報28159點,雖然失守十天線(
28486點),但好在險守廿天線(28158點)。
  A場亦都跣低11點,報3370點;國貨佬就趴低264點或2﹒3巴仙,收報
11357點。全日主板成交有1165億銀,較噚日多33巴仙。
 
*早段好氣勢午後甚閉翳,毋理升與跌健康最可貴*
 
  今日係10月19日,係87股災30年,當年都係由美股下跌而帶動全球股災。話說
1987年10月16日星期五,道指單日跌近5巴仙,恆指星期一(當年10月19日)即急
瀉11巴仙。當晚,美股又無停止跌勢,進一步急挫約兩成二,第二日香江呢邊宣布停市四日,
但10月26日復市暴跌三成三,認真慘烈。
  個市今朝好地地,午後風雲色變極恐怖。適逢股災30年,真係個心離一離……

*德國佬報告磚頭變糟糕,內房好地地淡友忽殺到*

  本地磚頭佬行路打倒褪原來因為德銀出嚟唱淡,話特首林太推出嘅「港人首置上車盤」會影
響細價樓需求,另外又估內地資金會少D嚟香江投地,降咗一堆地主佬目標價。德銀話恆地
(00012)受首置盤影響最大,結果佢趴低近4巴仙,報52銀,係第三渣藍戰士;新世界
發展(00017)慘D唔見4巴仙,報11﹒86銀;街坊新地(00016)就跌低2巴仙
,收報130﹒5銀。
  另一方面,內地磚頭本來都好硬淨,神州首三季房地產投資增超過8巴仙,增速略為增加,
恆大(03333)試過高見32蚊破頂添,但撞正大跌市,再硬淨嘅磚頭都有心碎嘅一日,佢
全日趴低近4巴仙,報29﹒2銀;近日北水交投好活躍嘅融創(01918)都走低近半成,
報37﹒55銀。

*昨日熱炒股今日甚痛苦,車仔與紙品你估我又沽*
 
   砵砵車今日真係唔多掂,雖然吉利(00175)母企宣布,夥拍旗下嘅富豪汽車
(Volvo)搞新能源砵砵車品牌Polestar,不過都係幫唔到吉利股價,最終仲急插
7巴仙,報24﹒85銀,係今日表現最差嘅藍戰士。至於街坊們又點呢,比亞迪
(01211)瞓低近6巴仙,報73﹒6銀,係最渣國貨佬。雖然大部分砵砵車走低,不過部
件製造商浙江世寶(01057)將會向平治母企戴姆勒供應轉向器,刺激股價逆風踢起4巴仙
,報3﹒1銀;大跌市中表現好叻叻!
  先幾日就有消息話神州紙廠要下調廢紙價格,搞到紙業佬瞓低哂。陽光紙業(02002)
跌逾8巴仙,報2﹒46銀;玖龍紙業(02689)都跌低近7巴仙,報14﹒54銀。
 
*跌市來尋寶水泥佬最好,廣核盤數靚收市微微高*
 
  今日個市都係繼續手軟腳軟,不過水泥佬一於少理,齊齊開Party。海螺水泥
(00914)噚日(18日)已經升咗超過3巴仙,今日逆市繼續再上,最終踢高近1巴仙,
報32﹒6銀,已經係最叻國貨佬;中建材(03323)仲架勢,衝前近3巴仙報6﹒02銀
,盤中高見6﹒21銀創逾兩年高!
  中廣核電力(01816)公布,頭三季利潤增加38巴仙去到86億人仔,咁叻仔,抵佢
逆市跳起半個巴仙左右,報2﹒23銀。
  內險佬本身開市初段表現都幾好,平保(02318)仲再破過頂高見67﹒6銀。不過魚
缸午後急瀉,搞到內險佬都齊齊散Band,平保最終跌低逾2巴仙,報64﹒7銀;新保
(01336)瞓低近4巴仙,報48﹒2銀。
 
*瑞信降目標中興受重傷,藥股見鑊氣行情齊看漲*
 
  新絲路文旅(00472)收購互聯網融資平台「你我金融」,仲以溢價近半成發股找數,
今日復牌後一度急升近52巴仙,但尾市升幅收窄到得返4巴仙,報1﹒29銀。
  中興通訊(00763)公布業績快報,首三季多賺近37巴仙去到39億人仔,但被瑞信
降目標,結果瀉超過11巴仙,得番26﹒15銀。
  瑞信升有「上海和黃」之稱嘅復星國際(00656)目標價至21﹒5元,只可惜隻股跟
住個市先升後跌,收市插近4巴仙,報18銀。阿仔復星醫藥(02196)就幾強勢,逆風跳
起超過4巴仙,報37﹒95銀。其他個別藥股都幾炒得,石藥(01093)都有超過2巴仙
進帳,報13﹒34銀!請請!
 
  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全城注視!銀行定存比較神器,助你搵到最佳息率!► 立即了解

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 落單即送保健品!