《小傳日記》花旗魚缸噚晚（１５日）大跌１３８點收２３２７１點，油價又連續四日下跌
，不過都無阻香江魚缸今日（１６日）嘅升勢，皆因股王ＱＱ（００７００）喺大廳！ＱＱ噚日
收市後公布省鏡業績，全城爭住畀「Ｌｉｋｅ」，花旗最爆，豪畀「最牛價」６０６銀，比大摩
早排畀嘅５２６銀更「牛」！另一方面，瑞信點名唱好平保（０２３１８）可爆上９６銀，一班
內險佬亦順勢落鑊。
魚缸咁好氣氛，恆指開市彈高１１２點，之後愈升愈有力，最高漲２４３點至２９０９５。
雖然埋單升少咗，但都有１６７點升幅報２９０１８，上返十天線（約２８９５６）；國指當然
唔執輸，衝前１２１點報１１５３３，全日魚缸１１３９億銀。
＊花旗睇ＱＱ最牛６０６，暗盤高一高易鑫甩晒轆＊
ＱＱ噚日魚缸收工後先放榜，第三季手遊業務收入勁升八成四，期內多賺四成半。ＱＱ放榜
後都畀唔少大行唱好，最震撼全城嘅非花旗莫屬！豪畀全城「最牛價」６０６銀，比早排摩笛畀
嘅５２６銀更牛！雖然缸友對於每次業績有驚喜都好似司空見慣，但入市搏殺嘅情緒從未冷卻，
ＱＱ單日成交超過１２７億銀，股價最多升近３巴仙，全日埋單就升咗逾兩巴仙，報３９１﹒８
銀。
ＱＱ有持股埋一份嘅易鑫（０２８５８）雖然成為缸友搶手貨，超購５６０倍，噚日暗盤吹
到高一高，埋單升咗四成，但今日一開市出閘頂多升咗超過３２巴仙，高見１０﹒１８銀就有唔
少缸友食胡散水，搞到即時大插水，低見８﹒１銀，埋單就收報８﹒１２銀，只係較招股價
７﹒７銀高半成多Ｄ，以每手５００股計，唔計手續費，每手只賺２１０蚊，借錢抽嘅，就真係
……有走唔切缸友就埋怨被暗盤「錯誤引導」，唉！
雷蛇（０１３３７）嘅升勢同佢個名一樣，如閃電般喺缸友眼前掠過。星期一（１３日）入
缸友最多升咗超過４１巴仙高見５﹒４９銀就插水，今日就跣低超過３巴仙，報４﹒４８銀，只
係較招股價３﹒８８銀高超過一成半。
今年以嚟最威水嘅半新丁閱文（００７７２）上個周三（８日）入缸第一日升到去高招股價
１倍至１１０蚊後就碌返落嚟，呢幾日都只係喺百蚊關附近徘徊，今日跌咗超過１巴仙，報
９８﹒６銀，但都依然較招股價５５蚊高出近八成，勁！
＊新股潮褪色蘇豪好好息，信利發盈警股價卻有力＊
今日有唔少魚毛表現都幾突出，ＳＯＨＯ（００４１０）噚日收市後宣布派特別中期股息，
人人有份每股０﹒５７６銀人仔，有貨當然就開心！今日一開市就突破５銀大關，之後升唔停，
埋單飛起９巴仙，報５﹒１２銀，勁！
聽日（１７日）將會派成績表嘅信利（００７３２），雖然發咗盈警預計第三季蝕９００萬
，但都懶得理跳高７巴仙，報３﹒７５銀。
不過利標（００７８７）就無咁好彩，即使中期賺多咗３２倍至２５７４﹒８萬美金，但都
係要跌！跣低咗７巴仙，仲失守五十天線（０﹒８０８銀）同百天線（０﹒７８５銀），報
０﹒７９銀。
＊成績大躍進利標卻被質，裝卸費下調碼頭唔多得＊
神州擬明年起下調裝卸費用，搞到招商局（００１４４）今日腳軟咗７巴仙，報２１﹒１銀
，仲失守埋２５０天線（２０﹒６０２銀）啦，係最差表現藍戰。中遠海運港口（０１１９９）
都碌低近８巴仙收７﹒７銀。
內險佬靜咗一排，今日又搶番缸友眼球，當中平保（０２３１８）獲瑞信送上大祝福，將目
標價由７８銀大升至９６銀，缸友見到雙眼發光，即衝入去搶貨！平保埋單大力踢起近６巴仙收
７７﹒８５銀，距離瑞信目標價仲有大把水位！其他兄弟叨光向前衝，太保（０２６０１）、新
華（０１３３６）、太平（００９６６）都有近４至逾５巴仙進帳！
另一邊廂，北水愛股之一嘅美圖（０１３５７）就頭耷耷，眼濕濕，喺無咩壞消息打擊下，
逾７﹒５億銀大跌近８巴仙，跌穿多條平均線，真係傷入肉喇。
＊保保好氣勢瑞信愛平仔，地主腳軟軟秀秀有點翳＊
九倉（００００４）分拆所持有嘅「海港城」同埋「時代廣場」等核心物業，去到九龍倉置
業（０１９９７），每持股有一股九倉嘅股東，就獲派發一股新九倉置業。而九倉今日就除淨，
收報２６﹒９，比開市價２７﹒５銀低逾２巴仙。阿媽會德豐（０００２０）都無咩力，逆市跌
近２巴仙收５４﹒４５銀。
其他地產佬都有消息，信置（０００８３）等五間公司組成嘅財團，包括世房
（００８１３）、會德豐旗下德豐地產、嘉華國際（００１７３）同爪哇（００２５１），成功
以近１７３億銀奪得長沙灣地王，成交額屬預期上限。信置同意外落空嘅新地（０００１６）就
跌逾１巴仙，其他街坊恆地（０００１２）更跌近２巴仙添。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
