《小傳日記》Ａ場午後突劇震，香江好友腳震震！

　　《小傳日記》香江魚缸噚日（２２日）成功三萬點樓上收市，全城都熱烈慶祝，不禁觀望今
日（２３日）會唔會都再下一城。不過時值花旗國感恩節臨近，當地魚缸又靜返，無咩方向下，
香江魚缸今朝都無乜力，只係輕輕高開２９點，雖然上午曾經去到３０１６９點，但之後就喺三
萬點水平浮浮沉沉。
　　正當缸友以為悶市一場之際，午後Ａ場突然上演「驚險插水」，事關傳出阿爺金融監管趨嚴
，加上資金面緊張，滬深股市三大指數都大跌，Ａ場唔見逾２巴仙報３３５１點，而深Ａ亦唔見
３巴仙報２０１２點，嚇到香江魚缸愈跌愈多，最低仲去到２９５９３唔見４０９點，如果由最
高位起計，直頭唔見５７６點添！
　　好彩，當Ａ場收市後，香江魚缸跌幅先略為收窄，埋單收報２９７０７點，但都唔見２９５
點或近１巴仙；國指當然更傷，重挫２２１點或１﹒９巴仙，魚缸主板成交無早兩日咁多，都有
１３５８億銀，繼續破千億。

＊內銀升太多阿爺叫掟貨，ＱＱ續整固平保亦捱沽＊

　　祖國錢莊呢排接力支撐大市，不過傳來壞消息，阿爺要求安邦集團減持民行（０１９８８）
、招行（０３９６８）持股至不多於５巴仙，但為咗減少對孖屐嘅影響，已經建議安邦通過非公
開方式減持。另一方面，交銀國際就分別畀兩間錢莊目標價８﹒４銀及３０銀，前者即刻無懼減
持消息，彈高逾２巴仙報８﹒０７銀，跑贏晒所有街坊；招行就因為近日升得太多，再加埋Ａ場
突然插水，有貨粉絲都急急掟貨，埋單大跌逾４巴仙收３１﹒９５銀。
　　屢創新高嘅股王ＱＱ（００７００）衝得咁勁，今日大部分時間都喺高位整固，無太大變動
，點知午後畀Ａ股嚇親，一度急回去到４１８﹒２銀，好彩之後企番穩Ｄ，收市都要唔見近２巴
仙報４１９﹒６銀，都咪話唔驚；平保（０２３１８）都係一樣，噚日衝到去８７﹒１銀新高後
，今日尾市跟Ａ場向下碌，畀ＱＱ傷得仲勁，收跌近４巴仙報８０﹒９銀。

＊美金冇運行倫銅向上爬，神州減補貼車佬好鬼怯＊
　
　　下晝Ａ場極速插水，滬指全日蒸發咗超過２巴仙，搞到香江呢邊最多跌咗超過四百點。不過
，ＡＨ場嘅神州金屬佬就同啲金屬一樣咁硬淨，全日都可以保持升勢，加上呢排美金腳軟搞到啲
金屬價格持續向上，倫敦三個月期銅仲連升咗四日，江銅（００３５８）今日不過不失，彈高２
巴仙，報１２蚊。
　　街坊紫金（０２８９９）銅金礦都有搞，仲話佢喺非州剛果嘅銅礦資源量明顯擴大，有埋呢
個好消息，即時跑贏江銅幾個馬位，全日彈起近６巴仙，報２﹒６４銀。
　　神州鋁業一哥中鋁（０２６００）喺九月尾創下超過六年高位７﹒５５銀之後就冇運行，今
日就嚟個報復式反彈，升咗近６巴仙，以今日埋單５﹒４８銀計，兩個月間大嗱嗱唔見咗四分一
有多。
　　市場傳出，神州新能源車最新補貼政策會喺年尾前出台，雖然話唔係「一刀切」減補貼，但
仲有消息話，出年補貼會減少兩成，搞到今日某部分神州車佬表現死晒火，電動車一哥比亞迪
（０１２１１）插咗近４巴仙，報７２﹒８５銀；吉利（００１７５）就跌近３巴仙，報
２８﹒３５銀。

＊易鑫有點頹暴富夢幻滅，九置首入缸表現好滄桑＊

　　講到半新丁，當然要提幾隻喺今個月入缸嘅明星股，雖然佢地搞嘅業務相當前衛，仲畀唔少
缸友瘋狂掃貨，幻想自己身家暴漲幾倍嘅景況，但呢個好夢就喺易鑫（０２８５８）第一日入缸
就破滅，只係升咗超過半成，後來仲繼續下試，第三日開始就已經守唔住招股價７﹒７銀，噚日
仲要低見６﹒４３銀。之後雖然跳返彈床上返７蚊關，但今日埋單都係跌近兩巴仙，報７﹒２４
銀。
　　同樣都搞保險嘅眾安在綫（０６０６０）九月尾入缸，唔夠一個月就差啲升呢做「紅底」，
高見９７﹒８銀，但只係一日貨仔，之後仲要極速回落，到今日埋單升唔夠１巴仙只有
６９﹒９５銀，足足回調咗超過２８巴仙，但都較招股價５９﹒７銀高超過１７巴仙。
　　雷蛇（０１３３７）上個禮拜一（１３日）入缸，計埋今日只係升得三日，雖然噚日一度低
見３﹒９銀，但都仲守得住３﹒８８銀招股價，今日升咗超過１巴仙，報４﹒０９銀，高招股價
超過半成。
　　閱文（００７７２）表現最硬淨，入缸第一日（今個月８號）一度升咗１倍，之後就喺
１１０蚊高位碌落山，今日最新報８９﹒１５銀，又係升咗唔夠１巴仙，仲較招股價５５蚊高
６２巴仙。
　　由四號仔九倉（００００４）分拆出嚟九倉置業（０１９９７）今日首日入缸，開市價報
５４﹒５銀，埋單縮水至５０蚊，較開市價跌超過８巴仙；九倉都冇乜運行，最多跌近半成，好
彩埋單跌唔夠１巴仙，報２５﹒８銀。

＊冷門半新丁靛藍星急升，街貨量恢復滴達彈完散＊

　　冷門創板半新丁呢期大熱跑出，靛藍星（０８３７３）上個禮拜四（１６日）先入缸，頭兩
日加埋已經爆升咗一倍，之後雖然回吐返１８巴仙，嚇到缸友心都離一離，但好彩嘅係只係插咗
一日，今日仲彈高咗超過一成半，報１﹒２銀，啱啱好比招股價０﹒６銀高出１倍，相當勁！
　　都係同一日入缸嘅濠亮環球（０８１１８）仲巴閉，頭兩日爆上１﹒９倍，但之後就連插三
日，跣低近３６巴仙，今日展開報復式反彈，彈起超過１４巴仙，報０﹒６４銀，仍然較招股價
０﹒３銀高出一倍有多。
　　早排因為貨源歸邊而喺九月尾就開始停賽嘅滴達國際（０１４７０），公司主席最終折讓
１９巴仙配股減磅８９９４萬股，令街貨比例恢復至２５巴仙，今日復賽即應聲大漲近１９巴仙
，高見１﹒３２銀，喺超過兩年高位插旗，但瞬即有唔少缸友埋單散水，最終全日只係升近３巴
仙，報１﹒１４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。