《小傳日記》魚缸跌夠「真」反擊？ＱＱ平保好招積！

　　《小傳日記》香江魚缸由上個月高見３０２００點之後，就一路向下碌呀碌，不知不覺間已
最多蒸發咗約２０００點！噚日（７日）仲差Ｄ跌穿１００天線，認真危險。好彩，好友唞咗咁
耐終於出兵反擊，恆指最高反彈近４００點至２８７０５點，５０天線（約２８７５６）就在眼
前！
　　總結魚缸戰果，今朝高開９６點後愈戰愈勇，埋單收漲３３６點報２８６３９；國指亦衝前
１３８點報１１２８９。今日大升市，成交亦算活躍，有１１５４億銀。
　
＊ＱＱ與平保皇者返來了，夠膽趁低撈今天賺到笑＊
　
　　魚缸有返Ｄ牛氣，升市功臣當然又係ＱＱ（００７００）同平保（０２３１８）兩大阿哥喇
。ＱＱ百足咁多爪，今日又傳出入股永輝超市（滬：６０１９３３）旗下生鮮超市「超級物種」
，同時公司又正式宣布攞到《Ｈ１Ｚ１》獨家代理運營權，咁多好消息，ＱＱ終於一洗近日頹勢
，發威彈高逾４巴仙收３９４銀。皇者回歸！
　　至於內險佬又點呢？雖然開市早段嘅風頭被手機佬搶走哂，不過勝在夠穩健，慢慢爬高。平
保（０２３１８）一開市只係飛起２巴仙左右，但下午升幅就一度擴大至去到逾５巴仙，高見
７８﹒７５銀，仲一口氣收復十天線（７７﹒５１銀）同廿天線（７８﹒５３５銀）添，最終收
報７８﹒４銀，踢高近５巴仙。財險（０２３２８）都唔弱，最多跳起過逾４巴仙，收復百天線
（１４﹒９銀）同十天線（１４﹒９７８銀），最終就衝前逾３巴仙，報１４﹒９４銀。
　
＊手機佬造好表現甚精靈，瑞聲與舜宇拍住齊齊升＊
　
　　手機佬繼續造好，差唔多收復晒今個星期早段累積跌幅。瑞聲（０２０１８）今朝非常誇張
，最多曾經跳高過近８巴仙高見１５３﹒８銀，最終衝前４巴仙，報１４８﹒９銀；舜宇
（０２３８２）今朝都飛高過近６巴仙，最終跳起４巴仙，報１１６銀。最近表現平平嘅丘鈦
（０１４７８）今日都有得升，踢高４巴仙，報１３﹒７銀。鴻騰精密（０６０８８）都飛起咗
６巴仙，報５﹒８２銀。
　　半新股表現各異，合寶豐年（０８４０６）噚日雖然收市高過招股價１５巴仙，不過今日就
腳仔軟，碌低２４巴仙，報０﹒３１５銀，平手招股價。小ＱＱ閱文（００７７２）噚日跌到人
仰馬翻，今日就非常厲害，衝前近一成，收復８０銀關，最高見過８５﹒６元，收報８４銀。
　　仲有結好控股（０００６４）同結好金融（０１４６９）收市前突然急插近２１巴仙，各收
０﹒２９銀及２﹒４銀，唔知發生咩事呢？！
　
＊升跌皆誇張閱文漲一成，Ｄａｖｉｄ　Ｗｅｂｂ名單缸友昅到實＊
　
　　康宏（０１０１９）噚日上晝停牌，之後就傳出副主席馮雪心被廉署帶走調查。今日中午，
公司終於發正式通告，指知道執法當局對公司兩名執董進行執法行為，已經暫停呢兩名執董職務
，但又無寫明係邊兩位執董。但公告最底部分，就寫咗馮雪心同陳麗兒已暫停職務。咁答案係咪
已揭盅…？
　　另外，康宏主要股東之一嘅君陽（００３９７），今朝試過急插逾１９巴仙至０﹒２９５元
，但午後突然拗腰彈，倒升番逾１６巴仙收０﹒４２５銀，認真誇張！
　　其實咁啱得咁橋，君陽同康宏，其實都出現喺５月中，Ｄａｖｉｄ　Ｗｅｂｂ列出５０隻不
宜買股份名單上面，近日證監發功查有問題魚毛，又咁啱同呢份名單好似有Ｄ關係咁，睇嚟有關
魚毛仔缸友要昅到實喇！
　
＊瑞銀忽轉軚利豐大彈跳，大摩來祝福復醫療抽升＊
　
　　講到今日出位嘅魚毛，真係不得不得講到利豐（００４９４），皆因有「利豐大淡友」之稱
嘅瑞銀分析員梁裕昌轉軚籲買！唔講唔知道，原來大淡友由當年利豐股價仲喺２０銀附近，已經
開始唱淡佢，計埋都已經足足７年，都幾誇張。當然唔單止升評級啦，仲將「他屐」由２﹒９銀
大升至４﹒４銀添！連大淡友都轉口風，當然幫到股價啦，飛起逾８巴仙，報３﹒８５銀。
　　恆安（０１０４４）都有大和唱好，將「他屐」大升一成去到８７﹒４銀，評級由「持有」
上調到去「買入」，缸友們齊齊叫好，仲高見８２﹒９銀，創埋逾兩年新高。最終縮咗些少水，
只係跳高近３巴仙，報７９﹒８銀。
　　仲有大摩吹起隻復星醫療（０２１９６），話６０日內上升，目標價４７蚊；結果，隻股高
收７％，報４０﹒５銀。保利置業（００１１９）就有申銀萬國升「他屐」到５﹒３６銀，一口
氣飛起近１４巴仙，收報４﹒３７銀，勁呀！假期愉快！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。