即市新聞

15/12/2017 17:54

《小傳日記》稅改有阻滯,道指終跪低;QQ見頭暈,香江腳震震!

  《小傳日記》老老實實,香江魚缸之前升咗咁多,缸友都預咗今個月會向下調整。不過,估
唔到消化完息魔降臨後,花旗國又因為稅改方案有阻滯,搞到道指噚晚終斷五連升,收低76點
報24508。
  外圍氣氛唔多好,香江魚缸今早(15日)都跟隨低開166點,點知低處未算低,股王
QQ(00700)質低逾2巴仙穿390銀,埋單收389銀;仲有中資金融股都被拋售,平
保(02318)、工行(01398)等近日焦點股都碌番晒落去,唔見大約2巴仙,分別收
77﹒4銀及6﹒14銀。嚇到恆指最多蒸發427點至28738,穿過10天線
(約28814)。恆指散場仲要唔見318點報28848,50天線(約28856)都一
樣守唔住。國指當然難逃一跌,插低165點報11365。
  魚缸弱咗咁多,缸友嚇到急急掟貨,全日成交急增近19巴仙至1265億左右。
 
*利豐有大刁大和升目標,豪爽派特息無貨心戚戚*
 
  利豐(00494)呢幾年無論係業績抑或股價都Keep住冇運行,呢位本地薑嘅收入雖
然由2013年開始就冇再升過,但缸友原來一早就有先見之明,喺2011年頭已部署空軍,
利豐由山頂位23﹒355銀開始碌落山,跌到去2﹒64銀先開始彈返上嚟,跌幅大嗱嗱有接
近九成!不過,利豐頹咗咁耐終於有翻身嘅一日,喺上個禮拜四(7日),一向都唱淡利豐嘅瑞
銀竟然大轉軚,唱好佢持續Cut成本下,盈利能力有望快D恢復,將評級由中性升到去「掃貨
」,翌日(8日)即大裂口急升。
  好消息又點止一單,利豐喺噚日(14日)收市後話要賣走家具、毛衣同美容產品業務,單
「刁」嘅作價有成11億美金。之後利豐仲話會拎其中嘅5﹒2億美金出嚟豪派特別息,每股派
6﹒14美仙。大和出言力撐,話呢單刁可以強化核心業務,「他屐」升到去4﹒7銀。缸友收
到風後即爭崩頭掃貨,公仔圖即出現多一個上升大裂口,全日逆市爆升近8巴仙,報4﹒43銀
,仲喺近兩年高位4﹒47銀插旗添。
  同系嘅股份都有得搭順風車,利邦(00891)彈起近6巴仙,報0﹒71銀。但利標
(00787)就無升跌,利亞零售(00831)就唔見近1巴仙。
 
*融創突抽水有貨流眼淚,郵儲行被掟嚇到面青青*
 
  噚日祖國內房先拍住香江磚頭佬一齊領軍,點知融創(01918)就傳來壞消息,公司宣
布折讓近12巴仙配股,佔擴大後股本逾5﹒7巴仙,大拿拿淨籌78億銀,有貨缸友當然唔
Happy啦,決定掟貨表示不滿,今日融創就受重傷,蒸發近11巴仙報31﹒55銀,成交
高達117億銀添!
  郵儲銀行(01658)都有壞消息,今朝開市前已經錄得佔H股發行股本3﹒7巴仙嘅大
手,涉及近30億銀,後尾有消息指,原來郵儲行有一名機構投資者沽咗貨畀10個投資者,而
涉及股數就係3﹒7巴仙!結果唔使問,郵儲行收市要瞓低近5巴仙報4﹒04銀喇。
 
*瑞聲未跌完舜宇腳軟軟,賭股逆市升銀娛最精靈*
 
  自從今年嘅手機重頭戲「唉瘋X」同「唉瘋8」出咗台後,缸友好似已經冇咩值得期待,加
上唔少手機設備佬今年以嚟都升咗唔少,唔少缸友都趁機食胡掟貨散水,兩大龍頭瑞聲
(02018)同舜宇(02382)都同樣喺11月頭破頂後插水,瑞聲就喺185蚊山頂位
碌落嚟,兼且到而家都仲未停,今日就跣低超過1巴仙,收139﹒4銀,險守100天線
(138﹒47銀),由山頂位計累跌咗近兩成半。舜宇就喺高位152﹒6銀開始腳軟,到今
日股價已經跌到去102銀,加加埋埋插咗逾33巴仙。
  馬交賭收持續反彈,迎日仲有消息話,六大馬交博彩佬將會一齊搞發財巴(酒店及賭場客運
專車),雖然唔算係D重大利好消息,但今日相當硬淨,即使魚缸一度急插咗超過400點,龍
頭銀娛(00027)都好省鏡,抽高近2巴仙報61﹒85銀,為表現最勁藍戰士;永利馬交
(01128)同新濠國際(00200)分別逆市跳起近2巴仙及逾1巴仙,收報24﹒65
銀同22﹒75銀。
 
*醫藥佬炒完金斯瑞心酸,ASM反擊中芯亦得戚*
 
  唔少醫藥佬近呢幾日都搶晒風頭,並且連續幾日破頂,搞生物科技製藥嘅金斯瑞
(01548)自8月底開始,股價就坐咗上火箭,今日就最高上到去14﹒9銀山頂位,最多
升咗超過半成。不過高處不勝寒,最終倒跌近兩巴仙,報13﹒92銀,但由8月底時5蚊都未
夠嘅水平,升到去而家呢個價位,短短幾個月已經有近兩倍升幅,勁!
  街坊中國生物製藥(01177)一樣相當把炮,已經連續四日破頂,但最終都喺高位腳軟
碌返落嚟,今日跣低逾4巴仙,報12﹒22銀。不過,今年以嚟加埋已經爆升咗超過一倍。
  幾隻半導體大佬都逆市造好,一哥ASM太平洋(00522)相當勁,升咗近4巴仙,報
106﹒4銀。中芯(00981)上個月尾話配股抽水近26億銀,佢嘅兩個主要股東大唐電
信科技產業同國家集成電路基金話會行使優先認購權,額外認購總共5億美金嘅永久次級可換股
證券,中芯今日都彈起逾兩巴仙,報11﹒28銀。
  平時無乜炒作嘅軍工佬,但今日唯獨中船防務(00317)(滬:600684)炒咗上
嚟,原來A仔下個禮拜將會開資產重組說明會,唔少缸友都認為好事近即掃貨H仔全日炒高逾
10巴仙,報12﹒28銀,勁。假期愉快,請請!
 
  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力