即市新聞

11/01/2018 17:45

《小傳日記》魚缸十三連報捷,大象大踏步神情確威武!

  《小傳日記》香江魚缸噚日(10日)寫下史上最光輝嘅一頁,以十二連勝創下恆指
1969年面世以來最長升市,真係史上最強嘅一個升浪!計一計數,期間已經累漲咗超過
1800點,缸友當然唔想畀佢停喇,大家都冀望可以再下一城,突破埋2007年10月嘅史
上新高31958,咁就真係齊齊過肥年喇!
  不過,好友一連打贏12場仗,真係關關皆辛苦,今日(11日)已經出力夾高大象
(00005),再加埋大力推高舜宇(02382),但魚缸最多都只係踢起59點,之後仲
因為股王QQ(00700)腳軟碌低逾2巴仙,而搞到倒跌123點,好彩最後都成功搶番主
導權,以46點升幅,令勝利旗幟增加至13面,收報31120!
  A場亦險守十連升,收3425點升3點,追平2015年3月創下嘅十連升紀錄;國指就
象徵式升6點完場,報12295。
  魚缸升咗咁耐,缸友其實都唔知追定沽好,成交就已經畀噚日少咗D,約有1288億銀。
小傳就一於鎖定部分利潤先喇!

*北水唔停掃大象跳勁舞,街坊齊派對中銀玩破頂*

  魚缸喺高位整固,重磅藍籌就輪流炒高,大象獲逾22億元北水掃貨,今朝競價時段已經跑
出升近84銀,缸友見到個勢咁勁,梗係唔會錯過今次順風車!眨吓眼,大象就高見84﹒3銀
,再創逾9年新高,埋單都仲有逾2巴仙落袋,收84﹒05銀,勁!
  仲帶旺埋一班街坊,當中中銀香港(02388)有大華繼顯升目標至43﹒5銀,收市開
心衝前近3巴仙報40﹒80銀,仲曾經升到去40﹒90銀創新高添!渣打(02888)都
跟住一齊衝,收漲近3巴仙報86﹒7銀,Happy!
  另一邊廂,北水湧晒去大象度,股王QQ、生發發(00388)就無奈失寵,收跌逾2巴
仙及逾1巴仙,分別報429﹒4銀及268﹒4銀。不過話晒呢排升咗咁多,借呢個機會唞唞
其實更加好,有貨缸友唔使太擔心!

*水泥佬撤退海螺獲利吐,中建材中材齊齊跌8個*

  水泥佬好似坐過山車,好似海螺(00914)同潤泥(01313)一開市都有幾好嘅升
幅,分別創上市新高同埋2012年2月以來新高,不過未幾佢哋就拉埋其他街坊一齊向下沉。
因為長三角沿江熟料價格每噸大跌170銀人仔,哎呀!花旗指出,雖然減價大家都預咗,不過
就嚟得比想像中快,幅度都比預期大。海螺最終跌低近6巴仙,報40﹒45銀,係最差表現國
貨佬!潤泥就腳軟近6巴仙,報5﹒5銀;中建材(03323)跌低近8巴仙,報7﹒66銀
,失守埋十天線(7﹒713銀);中材股份(01893)都走低8巴仙,報6﹒41銀,傷


*大行睇得高舜宇踩行油,人仔又再升鐵鳥齊起飛*

  「手機設備孖寶」終於踩行油喇,大阿哥舜宇(02382)就獲中銀國際維持睇188銀
,即刻嚟個大反擊,午後仲愈升愈有添呀,完場時佢爆升約9巴仙,埋單112﹒3銀,可喜可
賀!街坊瑞聲(02018)都唔輸蝕,仲畀野村續予「掃貨」評級,「他屐」208銀,最後
全日飛高逾4巴仙,報148﹒7銀!
  人仔今早高開49個點子,加埋大摩調高「鐵鳥」嘅「他屐」同埋畀「掃貨」評級,今日齊
齊起飛。國航(00753)跳高近4巴仙,報10﹒32銀,皆因獲大升「他屐」近1倍,由
6﹒19銀升至12﹒37銀添呀。東航(00670)「他屐」就由3﹒33銀升至7﹒72
銀,完場時就跳起逾4巴仙,報6﹒26銀;鄉里南航(01055)就獲升至10﹒8銀,完
場時仲圍埋一齊開Party添呀,全日衝前近3巴仙,埋單8﹒66銀。

*鉬價起勢升洛鉬漲唔停,今日靚靚靚美圖笑開眉*

  鉬產品價格快速飛起,洛陽鉬業(03993)即刻就跳起,一度高見5﹒89銀,創
2007年11月以嚟高位,勁!埋單都飛起近7巴仙,報5﹒88銀。
  早前阿爺將部分政府俾錢嘅水利項目,下放到省級發展改革部門審批,要求合理把握水利項
目,同埋嚴控新增地方政府債務咁話。光大國際(00257)午後就突然發力,跳起逾5巴仙
,報11﹒68銀,兼創埋超過兩年高。
  早排有消息話美圖(01357)嘅董事長蔡文勝沽出咗天璽兩個單位,而之前公司已經傳
出插手區塊鏈業務,美圖重新獲北水湧入,今日就彈高近5巴仙,報12﹒58銀,帶動十天線
升破百天線。
  小傳溫提:超級六合彩有1﹒1億銀,係史上最高頭獎獎金,今晚9點半開獎,馬會早15
分鐘截飛。祝大家橫財就手。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新【etnet健康】專頁登場喇!立即成為Fans獲得最貼身實用嘅健康資訊! http://fb.me/health.etnet.com.hk
人氣文章
財經新聞
評論
專題
產品簡介

【etnet Bonus】世界盃《我是估波王》有獎遊戲 送HK$1,000運動禮券

【DIVA Channel】賞睇《嫲煩家族 3 走佬阿嫂》

活動花絮【etnet社創SolN】有種‧味道之容易吞嚥端午粽工作坊