即市新聞

20/04/2018 17:23

《小傳日記》A場腳仔軟,香江亦心酸;手機佬重傷,大象卻起舞!

  《小傳日記》港匯噚日(19日)終於止一止跌,今日(20日)都無再觸及弱方兌換保證
,喺7﹒8480水平上上落落,金管局總算暫時放下心頭大石。不過缸友焦點就落番去花旗國
季績身上,始終企業成績,先係真正長遠影響魚缸表現嘅因素。可惜,業績跌晒眼鏡,必需消費
品股成重災區,加上全球最大的晶片代工企業及蘋果供應商台積電警告,今年智能手機需求疲弱
,拖累晶片股大跌,搞到連蘋果公司都要跌近3巴仙。
  香江魚缸今朝本來都係象徵式跟跌60點,但係A場無力插水逾1巴仙再次收低三千一,報
3071。股王QQ(00700)都同病相憐,曾經第五度同400蚊說再見,再加埋手機設
備孖寶瑞聲(02018)同舜宇(02382)受重傷,大市一度唔見逾350點至
30355。埋單就跌少咗D,但都碌低290點收30418,穿十天、廿天、百天線。國指
唔見185點報12054。慶幸嘅係成交唔算多,一千億都無,錄得約993億銀,沽壓都唔
算太大。

*蘋果頭耷耷瑞聲眼濕濕,中興被圍剿終於開記招*

  手機設備佬今日又腳仔軟喇,蘋果主要晶片供應商台積電(TSMC)噚日收市之後公布,
對次季嘅營業利潤率和營收嘅展望,不過兩者都低過預期,分析相信反映咗全球智能手機市場嘅
增長放緩,嚇到蘋果公司噚晚股價急急跌。
  唔止啊,美銀美林就估計,蘋果次季「唉瘋」嘅銷量或者會下跌500萬部,搞到一眾蘋果
概念佬同埋手機設備佬一齊碌低。當中最慘就係瑞聲喇,愈跌愈低,埋單收跌逾7巴仙,報
121﹒3銀,係是日包尾嘅藍戰士。街坊舜宇都唔係好佢好多,都要腳軟近6巴仙,收報
142﹒5銀;丘鈦(01478)都跣低3巴仙,報9﹒05銀。
  至於受貿易戰搞到頭都大晒嘅中興(00763),雖然仲停緊牌,但今日下晝公司就開咗
一個只得十分鐘嘅發布會,董事長坦言,今次花旗國禁令,可能令到中興進入「休克」狀態,慘
。其實除咗中興之外,聯想(00992)同華為都係花旗點名涉商業間諜活動,聯想嚇到腳軟
唔見近4巴仙收3﹒79銀。

*QQ打苦戰何時見晴天?諮詢快公布港所曾叫好*

  近排無晒心機嘅股王QQ,又繼續喺400蚊大關爭扎,今日都試過又跌到去399﹒8銀
,已經係今個月第五次失守了,好彩收市都守得住報400﹒2銀。老實講,貿易戰又唔關QQ
事,而市場對QQ憂慮,都係擔心手遊增長放慢,不過基本上大部分大行都仍睇好QQ前景,麥
格理依然維持555銀目標不變。小傳相信,大市企番穩之時,就係QQ重振聲威之日!
  魚缸呢排夾喺好壞消息入面,Chok到缸友頭都暈。不過,靜咗一排嘅新丁市場開始有D
動靜。除咗由平保(02318)分拆出嚟嘅平安好醫生排緊隊外,近日都傳出有機會成為第一
批「同股不股權」嘅小米,最快喺5月嚟香江交IPO申請。而生發發(00388)CEO李
小加,今日就話同股不同權上市諮詢結果,將會喺下星期二(24日)收市後公布,新規將會喺
30號起接受申請。睇嚟一切都準備就緒了,生發發曾經開心跳起近2巴仙至264﹒8銀,不
過大市下半場無力,生發發又要跟市碌番低DD,收260﹒2銀。

*孖屐望加息港銀有起色,大象好幹勁小象也跟升*

  雖然喺金管局連環出手買港幣下,港匯噚日終於升番D,不過孖屐都相信香江快將調高息口
,呢種大環境下本地錢莊自然受惠。瑞信就預計,大象(00005)首季淨息差可以擴闊,將
大象評級由「差過孖屐」上調到「中性」,他屐由65﹒8銀升到77銀。大象5月4日就會公
布首榜業績,今日已經提早好多跳起近1巴仙,報76﹒8銀。同家族嘅小象(00011)今
日靠穩,報194﹒3銀,仲高見196﹒3銀破頂添!
  街坊方面,東亞(00023)、大新(00440)都微跌,報33﹒4銀同49﹒65
銀,中銀香港(02388)同渣打(02888)就唔見近1巴仙同跳起近2巴仙,報
38﹒95銀、83﹒15銀,請請!

*華融系復賽光采不復再,開源賣酒店勁賺坐火箭*

  華融系四隻魚毛早排因為董事長賴小民涉嚴重違紀受查而停賽,今日齊齊復賽,故事主角中
國華融(02799)就無提到咩原因,只係話賴小民出於個人原因而辭職,公司就計劃提名廣
東銀監局局長王占峰接任。至於其他三隻魚毛,就即係劃清界線,話賴小民唔做對公司業務無影
響。不過,缸友又點會信呢?四隻魚毛復賽後,中國華融重挫近12巴仙收2﹒8銀,而華融金
控(00993)、華融投資(02277)同埋太平洋實業(00767),都分別蒸發約
10巴仙至13巴仙,傷。
  另一邊廂,細細粒嘅開源(01215)今朝復賽就有好消息公布!公司以總代價8億銀賣
咗上環晉逸海景精品酒店,預期出售收益3﹒4億銀左右。以噚日公司0﹒053銀收市價計算
,市值約6﹒8億元,即係今次收益已佔咗公司一半市值喇!難怪開源復賽後最多飆近87巴仙
至0﹒099銀,雖然收市縮咗好多,但都有32巴仙落袋報0﹒07銀。周末愉快,請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力